ཨི་རན་གྱི་རྡུལ་ཕྲན་ནུས་ཤུགས་བཟོ་བསྐྲུན་གནད་དོན་གྱི་གྲོས་མོལ།

༄༅༎ཨི་རན་གྱིས་འཛམ་གླིང་ནང་གི་འབྱོར་ལྡན་རྒྱལ་ཁབ་དྲུག་དང་མཉམ་དུ་ཕྱི་ཟླ་བཅུ་པའི་ཚེས་གཅིག་ཉིན་ཨི་རན་གྱི་རྡུལ་ཕྲན་ནུས་ཤུགས་བཟོ་སྐྲུན་གནད་དོན་སོགས་ཀྱི་ཐོག་གྲོས་མོལ་གནང་རྒྱུའི་མོས་མཐུན་བྱུང་ཡོད་པ་ཕྱོགས་གཉིས་ཀས་དེ་རིང་གཟའ་ཟླ་བའི་ཉིན་གནས་ཚུལ་ཕྱིར་བསྒྲགས་བྱས་ཡོད་པ་རེད།

ཡོ་རོབ་མཉམ་འབྲེལ་སྒྲིག་འཛུགས་ཀྱི་ཕྱི་འབྲེལ་སྲིད་ཇུས་ལས་དོན་དཔོན་རིགས་ཧ་ལྦི་ཡེར་སོ་ལ་ནཱ་དང་ཨི་རན་གྱི་རྡུལ་ཕྲན་ནུས་ཤུགས་ལས་འཆར་གྱི་འགན་འཛིན་སཱ་ཨི་རྡ་ཇ་ལི་ལི་རྣམ་གཉིས་དབར་ཞལ་པར་ཐོག་བཀའ་མོལ་བྱུང་ནས་ཨི་རན་གྱི་སྐུ་ཚབ་དང་ཡོ་རོབ་མཉམ་འབྲེལ་སྒྲིག་འཛུགས་ཀྱི་ཡུལ་དྲུག་གི་སྐུ་ཚབ་དབར་གྲོས་མོལ་གནང་རྒྱུའི་ཐག་གཅོད་བྱུང་བ་དང་ཨི་རན་གཞུང་གིས་ཕྱི་ཟླ་བཅུ་པའི་ནང་ཞིབ་ཕྲའི་གྲོས་མོལ་བྱ་རྒྱུར་གྲ་སྒྲིག་ཆ་ཚང་ཡོད་ལུགས་ཨི་རན་གྱི་རྡུལ་ཕྲན་ནུས་ཤུགས་བཟོ་སྐྲུན་ལས་འཆར་གྱི་འགན་འཛིན་ཇ་ལི་ལི་ནས་གསུངས་ཡོད་པ་དང་ཕྱོགས་མཚུངས་ཡོ་རོབ་མཉམ་འབྲེལ་སྒྲིག་འཛུགས་ཀྱི་ཕྱི་འབྲེལ་སྲིད་བྱུས་ལས་དོན་གྱི་དཔོན་རིགས་སཱོ་ལ་ན་ཡི་མགྲིན་ཚབ་མ་ཞིག་གིས་ཀྱང་དེ་རིང་ཞོགས་པ་འཛམ་གླིང་ཡུལ་གྲུ་དྲུག་དང་ཨི་རན་བར་ཕྱི་ཟླ་བཅུ་པའི་ནང་གྲོས་མོལ་བྱ་རྒྱུའི་ཐག་གཅོད་བྱུང་བའི་སྐོར་ཕྱིར་བསྒྲགས་གནང་ཡོད་པ་རེད། མགྲིན་ཚབ་མ་དེས་ཨི་རན་དང་གྲོས་མོལ་གནང་མཁན་གྱི་ཡུལ་གྲུ་དྲུག་པོ་དེ་དག་ནི་ཨ་རི་དང་དབྱིན་ཇི་ ཕེ་རན་སི་ འཇར་མ་ནི་ ར་ཤི་ཡ་ རྒྱ་ནག་བཅས་ཡིན་ཞིང་ཨི་རན་གཞུང་གིས་གྲོས་མོལ་གྱི་དགོས་འདུན་ཡི་གེ་གཟའ་ལྷག་པའི་ཉིན་གོང་ཞུས་ཡུལ་གྲུ་དྲུག་ལ་འབུལ་གྱི་ཡོད་པ་གསུངས་བཞག ད་ལོ་ཕྱི་ཟླ་བཞི་པའི་ནང་གོང་ཞུས་ཡུལ་གྲུ་དྲུག་གིས་ཨི་རན་དང་ལྷན་དུ་ཡུལ་དེའི་རྡུལ་ཕྲན་གྱི་ལས་འཆར་ཐོག་གྲོས་མོལ་གནང་རྒྱུའི་འབོད་སྐུལ་གནང་ཡོད་པ་དང་ཡིན་ནའི་ཨི་རན་ཕྱོགས་ནས་ཨི་རན་གྱིས་རྡུལ་ཕྲན་གྱི་ནུས་པས་གློག་སོགས་ཞི་བའི་ལས་གཞིའི་ཐོག་བེད་སྤྱོད་བྱེད་ཀྱི་ཡོད་ལུགས་ཀྱིས་རྡུལ་ཕྲན་ནུས་པའི་ལས་འཆར་མཚམས་འཇོག་ཐོག་གྲོས་མོལ་བྱ་རྒྱུར་མོས་མཐུན་བྱས་མེད་པ་རེད།