རྒྱལ་སྤྱིའི་གཞོན་ནུས་བོད་རང་བཙན་དགོས་པའི་གྲོས་ཆོད་བཞག

༄༅༎ཨོསི་ཀྲིཡེའི་རྒྱལ་ས་ཝིཡེའ་ནའི་ནང་རྒྱལ་སྤྱིའི་གཞོན་ནུའི་ལྷན་ཚོགས་ཀྱིས་ད་རེས་གཟའ་འཁོར་གཅིག་རིང་ཚུགས་པའི་ཚོགས་ཆེན་ཐོག་བོད་འདི་བཞིན་རྒྱ་ནག་གིས་དྲག་པོས་བཙན་བཟུང་བྱས་པའི་རང་དབང་རང་བཙན་གཙང་མའི་རྒྱལ་ཁབ་ཞིག་ཡིན་པ་དང་། རྒྱ་ནག་གཞུང་གིས་བོད་ནང་བོད་མིའི་ཆོས་དང་རིག་གཞུང་། སྐད་ཡིག་ ཁོར་ཡུག་དང་བཅས་པར་གཏོར་སྐྱོན་ཤུགས་ཆེ་གཏོང་བཞིན་པར་འཕྲལ་དུ་མཚམས་འཇོག་དགོས་པའི་གྲོས་ཆོད་བཞག་ཡོད་འདུག་

བོད་དོན་གྲོས་ཆོད་འདི་ International Union of Socialist Youth་ འམ་ སྤྱི་ཚོགས་རིང་ལུགས་ཀྱི་གཞོན་ནུའི་རྒྱལ་སྤྱིའི་མཐུན་ཚོགས་ཀྱི་ཚོགས་ཆེན་ཐོག་བགྲོ་གླེང་གིས་གཏན་འབེབས་གནང་ཡོད་པ་དང་། རྒྱལ་སྤྱིའི་གཞོན་ནུའི་ལྷན་ཚོགས་དེར་རྒྱལ་ཁབ་བརྒྱ་ལྷག་ནས་གཞུང་འབྲེལ་མིན་པའི་ཚོགས་པའི་སྐུ་ཚབ་མཉམ་བཞུགས་གནང་ཡོད་པ་དང་། སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་སྐུ་ཚབ་ཏུ་དབུས་གཞོན་ནུ་ཚོགས་གཞོན་དོན་གྲུབ་ལྷ་དར་ལགས་དང་དྲུང་ཆེ་བསྟན་འཛིན་ཆོས་སྐྱིད་ལགས་དང་དཔལ་འབྱོར་དྲུང་ཆེ་དཀོན་མཆོག་ཡར་འཕེལ་ལགས་གསུམ་ཕེབས་ཡོད་འདུག་

རྒྱལ་སྤྱིའི་གཞོན་ནུའི་ཚོགས་ཆེན་སྟེང་རྒྱ་ནག་གཞུང་གིས་བོད་ནང་ཁོར་ཡུག་ལ་གཏོར་སྐྱོན་དང་། བོད་མིའི་ཆོས་དད་ལ་དམ་དྲག་གི་ཆེད་རྒྱལ་གཅེས་ཆོས་གཅེས་ཞེས་པའི་ལས་འགུལ་སྤེལ་ཏེ་བོད་མི་རིགས་ཀྱི་ཆོས་དད་དང་སྐད་ཡིག་དང་བཅས་པར་དྲག་གནོན་བྱེད་བཞིན་པ་དང་། བོད་ནང་བླ་སྤྲུལ་ངོས་འཛིན་ཐད་ རྒྱ་ནག་གཞུང་གིས་བཀའ་ཁྲོལ་དགོས་པའི་ཁྲིམས་གཞི་གཏན་འབེབས་བྱས་པ་ཁག་འཕྲད་དུ་མཚམས་འཇོག་དགོས་པ་དང་། པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གཙོས་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས་པ་གསུངས་འདུག།