བོད་རང་བཙན་གལ་ཆེ་ཞེས་པའི་བརྗོད་གཞིའི་ཐོག་བགྲོ་གླེང།

༄༅༎རྒྱལ་སྤྱིའི་རྒྱ་གར་བོད་ཀྱི་མཉམ་མཐུན་ཚོགས་པས་རྒྱ་གར་གྱི་མེའེ་རུཏ་གྲོང་ཁྱེར་ནང་གསུམ་བཅུའི་དུས་དྲན་ཐེངས་༥༣པའི་ཐོག། བོད་རང་བཙན་གལ་ཆེ་ཡིན་སྐོར་གྱི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་གོ་སྒྲིག་གནང་འདུག། ༡༩༥༩ལོའི་བོད་མིའི་རང་དབང་སྒེར་ལངས་ཀྱི་དུས་དྲན་སྲུང་བརྩི་ཞུ་ཕྱིར་རྒྱ་གར་མཐོ་སློབ་གྱི་དགེ་ལས་སློབ་ཕྲུག་དང་བོད་དོན་རྒྱབ་སྐྱོར་བ་༢༠༠ཙམ་མཉམ་ཞུགས་གནང་བའི་ཐོག། བཞུགས་མོལ་ལྷན་ཚོགས་ཀྱི་སྐུ་མགྲོན་གཙོ་བོ་ འཕགས་བོད་འབྲེལ་མཐུད་ལས་ཁུངས་ཀྱི་འགན་འཛིན་ཨ་ནན་ཀུ་མའར་མཆོག་གིས་གསུངས་བཤད་གནང་ཡོད་ཅིང༌། ཁོང་གིས་བོད་ནང་རྒྱ་ནག་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་པར་སྐྱོན་བརྗོད་དང་འབྲེལ། རྒྱ་གར་བྱང་ཕྱོགས་ ཧི་མ་ཅལ་ པར་དེཤི་དང་ཇམ་མུ་ དང་ ཀཤི་མིར་མངའ་སྡེ། རྒྱ་གར་བྱང་ཤར་ཨ་རུ་ན་ཅལ་པཱར་རྡེཤ་བཅས་ཀྱི་ནང་རྒྱ་མིའི་དཔུང་དམག་གིས་བཙན་འཛུལ་བྱེད་ཀྱི་ཡོད་པའི་གནད་དོན། དེ་བཞིན་རྒྱ་ནག་གིས་བོད་ནང་རྡུལ་ཕྲན་གྱི་སྙིགས་རོ་ཕུང་གསོག་བྱེད་ཀྱི་ཡོད་པ་མ་ཚད། བོད་ཀྱི་ཁོར་ཡུག་དང་རང་བཞིན་སྐྱེ་ངོས་བཅས་གཏོར་བཤིག་ཚབས་ཆེ་གཏོང་བཞིན་ཡོད་པའི་སྐོར་འགྲེལ་བརྗོད་ཞིབ་ཕྲ་གནང་སྟེ། རྒྱ་གར་མང་ཚོགས་ཀྱིས་བོད་རིགས་སྤུན་ཟླ་ཚོའི་གནས་སྟངས་ཐད་བློ་འཚབ་ཡོད་པ་གསལ་བསྟོན་ཆེད། བགྲོ་གླེང་དང༌། ཟབ་སྦྱོང༌། ངོ་རྒོལ་དང་ཞི་བའི་གོམ་བགྲོས་སོགས་ལས་འགུལ་སྣ་མང་སྤེལ་དགོས་རྒྱུ་དང༌། རྒྱ་གར་རྒྱལ་ཡོངས་ཀྱི་ས་ཁུལ་ཚང་མའི་ནང་བོད་དོན་རྒྱབ་སྐྱོར་ཚོགས་པ་བཙུགས་ནས་རྒྱ་གར་གཞུང་གིས་བོད་མི་ཚོར་ཕན་པའི་ལས་དོན་གནང་སྐྱོང་ཡོང་བའི་གནོན་ཤུགས་སྤྲོད་དགོས་ཀྱི་རེད་ཅེས་གསུངས་བཞག།