རྒྱ་གར་གྱི་སྲིད་བློན་པ་ཀི་སི་ཐན་དུ་ཕེབས་པ།

རྒྱ་གར་གྱི་སྲིད་བློན་མོ་དཱི་མཆོག་གློ་བུར་དུ་པ་ཀི་སི་ཐན་ལ་འཚམས་འདྲིར་ཆེད་ཕེབས་གནང་འདུག དེའང་བི་བི་སི་སོགས་བརྒྱུད་ལམ་དུ་གསལ་བར་ལྟར་ན། རྒྱ་གར་གྱི་སྲིད་བློན་མོ་དཱི་མཆོག་ཁྱིམ་མཚེས་རྒྱལ་ཁབ་པ་ཀི་སི་ཐན་དུ་འཚམས་འདྲིར་ཕེབས་འབྱོར་བྱུང་བ་དེ་ནི་སྔོན་གཏན་ཁྱབ་བསྒྲགས་མ་གནང་བའི་གློ་བུར་གྱི་འཚམས་འདྲི་ཞིག་ཡིན་པ་དང་། དེར་པ་ཀི་སི་ཐན་གྱི་སྲིད་བློན་ན་ཝཛ་ཤ་རིཕ་(Nawaz Sharif)དང་མཇལ་འཕྲད་ཀྱང་གནང་འདུག ད་རེས་རྒྱ་གར་གྱི་སྲིད་བློན་མཆོག་ཨབ་གའ་ནི་སི་ཐན་ཏུ་འཚམས་འདྲིར་ཕེབས་ཏེ་ཕྱིར་རྒྱ་གར་དུ་ཕེབས་པའི་ལམ་ཞོར་དུ་པ་ཀི་སི་ཐན་གྱི་ཤར་རྒྱུད་གྲོང་ཁྱེར་ལའ་ཧོར་ལ་འཁྱུགས་ཙམ་ཕེབས་པ་ཞིག་ཡིན་པ་དང་པ་ཀི་སི་ཐན་གྱི་སྲིད་བློན་ ན་ཝཛ་ཤ་རིཕ་ཡི་སྐྱེས་སྐར་ཡང་འཁེལ་གྱི་ཡོད་འདུག སྲིད་བློན་མོ་དཱི་མཆོག་ནི། སྤྱི་༢༠༠༤ལོ་ནས་ཚུན་པ་ཀི་སི་ཐན་ལ་འཚམས་འདྲིར་ཕེབས་མཁན་རྒྱ་གར་གྱི་སྲིད་བློན་ཨང་དང་པོ་དེ་ཡིན་པ་རེད། རྡུལ་ཕྲན་གྱི་གོ་མཚོན་ལྡན་པའི་ཁྱིམ་མཚེས་རྒྱལ་ཁབ་དེ་གཉིས་པོ་ཉེ་བའི་ལོ་ཤས་ཚུན་དུ་འབྲེལ་བ་ཛ་དྲག་ངང་གནས་པ་ཡིན་ནའང་། ད་ལྟ་ཞི་འཇམ་དུ་འགྲོ་འགོ་ཚུགས་ཡོད་པ་རེད། རྒྱ་གར་དང་པ་ཀི་སི་ཐན་གྱི་རྒྱལ་ཁབ་གཉིས་པོའི་འགོ་ཁྲིད་གོང་ཟླའི་ནང་ཕ་རན་སིར་ཚོགས་པའི་རྒྱལ་སྤྱིའི་ཁོར་ཡུག་ལྷན་ཚོགས་སྐབས་ཡུན་ཐུང་མཇལ་འཛོམས་བྱུང་ཡོད་པ་རེད། རྒྱ་གར་དང་པ་ཀི་སི་ཐན་གཉིས་པོ་སྤྱི་༡༩༤༧་ལོར་ཨིན་ཇིའི་འོག་ནས་རང་བཙན་ཐོབ་པ་ནས་བཟུང་དམག་འཁྲུག་ཐེངས་གསུམ་ཙམ་རྒྱབ་མྱོང་ཡོད་ཅིང་། ཐེངས་གཉིས་ནི་ཀ་ཤི་རྨི་རི་ས་ཁུལ་གྱི་རྩོད་རྙོག་ནས་བྱུང་ཡོད་པ་དང་རྒྱལ་ཁབ་གཉིས་པོའི་ཕན་ཚུན་བར་ཀ་ཤི་རྨི་རིའི་བདག་དབང་ཡོད་ལུགས་ཀྱི་ཐོག་ནས་སྤྱི་༡༩༦༠ལོ་ནས་རྒྱལ་ཁབ་གཉིས་གདོང་ཐུག་བྱུང་སའི་གནས་དེ་ཡིན་པ་རེད།།
གསར་འགོད་པ་འཇམ་དཔལ་ཕུན་ཚོགས།