རྒྱ་གར་རྒྱལ་ཡོངས་གསར་འགོད་པས་༸གོང་ས་མཆོག་མཇལ་བ།

༄༅༎༸གོང་ས་མཆོག་ནས་བོད་བརྒྱུད་ནང་བསྟན་དང་རིག་གཞུང་ཇི་སྲིད་སྲུང་སྐྱོབ་ཐུབ་པ་དེ་སྲིད་དུ་རྒྱ་གར་གྱི་ས་མཚམས་སྲུང་སྐྱོབ་ཐུབ་རྒྱུ་ཡིན་ཞེས་གསུངས་འདུག

ཕྱི་ཟླ་ ༦ ཚེས་ ༢ ཉིན་རྒྱ་གར་རྒྱལ་ཡོངས་གསར་འགོད་མཐུན་ཚོགས་ཀྱི་ཐེབས་རྩ་ཚོགས་པའི་ཚོགས་མི་གྲངས་ ༥༠ ཙམ་བཞུགས་སྒར་དུ་ཆེད་བཅར་གྱིས། ༸གོང་ས་མཆོག་མཇལ་ཁ་ཞུས་ཡོད་པ་དང༌། གོང་ས་མཆོག་ནས་ཀྱང་འགྲོ་བ་མིའི་བཟང་སྤྱོད་དང་འབྲེལ་བའི་ནང་གི་རིན་ཐང་དང་། ཆོས་ལུགས་མཐུན་སྒྲིལ་གོང་མཐོར་གཏོང་ཐབས་ཀྱི་མཛད་འཁུར་གཙོ་བོ་གཉིས་ཀྱི་ཐོག་བཀའ་སློབ་གནང་འདུག

གསར་འགོད་པས་བོད་དོན་དང་འབྲེལ་བའི་སྐོར་བཀའ་དྲི་ཞུ་སྐབས།  བཀའ་ལན་དུ་གསར་འགོད་པ་ཚོས་བོད་ཀྱི་གནད་དོན་ཇི་ཡིན་འཁྱོག་བཤད་མེད་པ་དྲང་པོའི་ལམ་ནས་བྱུང་རབས་ཁྲོད་་ འཕགས་བོད་ཀྱི་འབྲེལ་བ་ཇི་ཡོད་སྐོར་མི་ཐོག་གཞོན་པ་ཚོར་གསལ་བཤད་བྱེད་ཐུབ་པ་གལ་ཆེན་པོ་ཡིན་པ་དང༌། བོད་བརྒྱུད་ནང་བསྟན་ལ་གཞི་བཅོལ་བའི་རིག་གཞུང་དེ་རྒྱ་གར་ཧི་མཱ་ལའི་ས་མཚམས་སུ་ཁྱབ་བརྡལ་ཆགས་ཡོད་པར་བརྟེན། ཇི་སྲིད་རིག་གཞུང་དེ་སྲུང་སྐྱོབ་ཐུབ་པ་དེ་སྲིད་དུ་རྒྱ་གར་གྱི་ས་མཚམས་ཀྱི་རིམ་པ་དང་པོ་དེ་སྲུང་སྐྱོབ་ཐུབ་ཀྱི་རེད་ཅེས་བཀའ་གནང་འདུག།