རྒྱ་གར་གྱི་དཔལ་འབྱོར་གནས་སྟངས་སྲ་བརྟན་ཡོད་གསུངས་བ།

དེ་ཡང་དེང་གི་ཆར་འཛམ་གླིང་གང་སར་དཔལ་འབྱོར་གྱི་གནས་སྟངས་ལྷིང་འཇགས་མེད་པའི་སྐབས་འདིར་རྒྱ་གར་གྱི་དཔལ་འབྱོར་གནས་སྟངས་སྲ་བརྟན་ཡོད་པ་རྒྱ་གར་སྲིད་འཛིན་ Pranab Mukherjeeཡིས་གསུངས་འདུག
དེ་ནི་ཁ་ས་ཕྱི་ཚེས་༢༣ཉིན་རྒྱ་གར་གྱི་གྲོས་ཚོགས་གོང་འོག་ཚང་འཛོམས་ཀྱི་ཐོག་གསུང་བཤད་ཅིག་གནང་བའི་ནང༌། རྒྱ་གར་སྲིད་འཛིན་Pranab Mukherjee ཡིས། རྒྱ་གར་ནང་དཔལ་འབྱོར་འཕེལ་རྒྱས་ཀྱི་ཁོར་ཡུག་བཟང་དུ་གཏོང་རྒྱུའི་ཆེད། ད་ལྟའི་གཞུང་གིས་ཚོང་ལས་གཉེར་མཁན་ཚོར་གཞུང་གི་ཆོག་མཆན་སྤྲོད་རྒྱུ་ལས་སླ་རུ་བཏང་བ་དང༌། ཚོང་ལས་ལ་འགོག་རྐྱེན་བཟོ་གཞིའི་ཁྲིམས་རྙིང་པ་ཁག་ཅིག་མེད་པ་བཟོས་པ། དཔྱ་ཁྲལ་འདུ་ལེན་ལས་སླ་རུ་བཏང་བ། ཕྱི་རྒྱལ་གྱི་ཚོང་འབྲེལ་ཁེ་གཉེར་ལས་ཁང་ཁག་གིས་རྒྱ་གར་ནང་ཚོང་ལས་གཉེར་རྒྱུ་དང་། མ་རྩ་འཛུགས་འཇོག་བྱ་རྒྱུ་ལས་སླ་རུ་བཏང་བ་སོགས་ཀྱི་རྐྱེན་པས་འཛམ་གླིང་དངུལ་ཁང་ནས་ཀྱང་རྒྱ་གར་དེ་བཞིན་ད་ཆ་ཚོང་ལས་གཉེར་རྒྱུར་སྟབས་བདེ་པོ་ཡོད་པའི་རྒྱལ་ཁབ་ཅིག་ཆགས་ཡོད་པར་ངོས་འཛིན་གནང་ཡོད་པ་ལྟར། དེང་སྐབས་རྒྱ་གར་ནི་འཛམ་གླིང་ཁྱོན་ཡོངས་ཀྱི་ནང་ནས་དཔལ་འབྱོར་འཕེལ་རྒྱས་ཀྱི་ཚད་གཞི་མཐོ་ཤོས་ཀྱི་རྒྱལ་ཁབ་ཅིག་ཆགས་ཡོད་པའི་ཐོག་ཉེ་དུས་ནས་བཟུང་རྒྱ་གར་གཞུང་གིས་རྒྱལ་ཁབ་ཀྱི་གཞོན་སྐྱེས་ཚོར་ལས་ཀ་ཐོབ་ཐབས་དང༌། ཡང་ན་གཞོན་སྐྱེས་ཚོས་ཚོང་ལས་རྩག་རྩིག་གཉེར་ཐུབ་རྒྱུར་དམིགས་པའི་ལས་འཆར་འགའ་ཤས་ལག་བསྟར་བྱེད་འགོ་ཚུགས་པ་དེ་དག་གིས་རྒྱལ་ཁབ་ཀྱི་དཔལ་འབྱོར་གནས་སྟངས་ད་དུང་བཟང་དུ་འགྲོ་བའི་རེ་བ་གནང་གི་ཡོད་ཅེས་གསུངས་འདུག   

གསར་འགོད་པ་ངག་དབང་ཆོས་འཕེལ།