རྒྱ་གར་གཞུང་གིས་ཧི་མ་ལ་ཡ་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་ཐོག་མ་ངོ་སྤྲོད་བྱ་འཆར་འདུག

ཟླ་ ༤ ཚེས་ ༩ དགོང་དྲོའི་ཕྱག་ཚོད་ ༡༠ པའི་ཐོག་གནས་ཚུལ་ཁ་སྣོན་བྱས་ཡོད།

རྒྱ་གར་གྱིས་ཟླ་བ་འདིའི་ནང་ཚུན་དུ་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་དང་པོ་དེ་བཞིན་ངོ་སྤྲོད་བྱ་འཆར་དང་། དེས་གཙོ་བོ་དགོན་སྡེ་ཁག་ཏུ་སློབ་གཉེར་བྱེད་བཞིན་པའི་གྲྭ་བཙུན་རྣམས་ལ། ནང་པའི་ཤེས་ཡོན་སློབ་སྦྱོང་གྲུབ་རྗེས་སུ་ངོས་ལེན་ཡོད་པའི་སློབ་ཐོན་ལག་ཁྱེར་བསྐྲུན་ཐོག མ་འོངས་མདུན་ལམ་དང་མུ་མཐུད་མཐོ་རིམ་སློབ་སྦྱོང་སོགས་ཀྱི་ཆེད་རམ་འདེགས་ཞུ་ཆེད་ཡིན་ཞེས་ན་ལེནྡྲ་ནང་པའི་སྲོལ་རྒྱུན་གྱི་རྒྱ་གར་ཧི་མ་ལ་ཡའི་ལྷན་ཚོགས་ (Indian Himalayan Council of Nalanda Buddhist tradition) ཡི་དྲུང་ཆེ་མ་ལིང་གོམ་བུ་ (Maling Gombu) ལགས་ཀྱིས་ཟླ་ ༤ ཚེས་ ༩ ཉིན་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་དེ་འབྲེལ་གནས་ཚུལ་འཁོད་པ་ལྟར་ན། ཐེངས་འདིའི་རྒྱ་གར་གཞུང་གིས་ཧི་མ་ལ་ཡའི་ཁུལ་གྱི་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་གནང་འཆར་དེ་ནི། རྒྱ་ནག་དང་ས་མཚམས་སུ་ཆགས་པའི་ཧི་མ་ལ་ཡའི་ཆོས་ལུགས་བསྟི་གནས་ཁག་ཏུ་རྒྱལ་གཅེས་རིང་ལུགས་གོང་སྤེལ་གཏོང་རྒྱུར་དམིགས་ཡོད་པ་རེད་ཅེས་བཀོད་འདུག

འོན་ཀྱང་གནད་དོན་དེ་འབྲེལ་ན་ལེནྡྲ་ནང་པའི་སྲོལ་རྒྱུན་གྱི་རྒྱ་གར་ཧི་མ་ལ་ཡའི་ལྷན་ཚོགས་ཀྱི་དྲུང་ཆེ་མ་ལིང་གོམ་བུ་ (Maling Gombu) ལགས་ཀྱིས། ཐེངས་འདིར་རྒྱ་གར་གཞུང་ངོས་ནས་ཧི་མ་ལ་ཡའི་ནང་པའི་དགོན་སྡེ་ཁག་ཏུ་སློབ་ཚན་གཏན་འབེབས་ཀྱི་ལས་གཞི་དེ་བཞིན་རྒྱ་གར་རྒྱལ་ཁབ་ཀྱི་ངོ་བོ་སྲ་བརྟན་དང་རྒྱ་ནག་ལ་རྒོལ་ལན་སོགས་ཀྱི་གནད་དོན་དང་འབྲེལ་བ་མེད། གཙོ་བོ་དགོན་སྡེ་ཁག་ཏུ་སློབ་གཉེར་བྱེད་བཞིན་པའི་གྲྭ་བཙུན་རྣམས་ལ། ནང་ཆོས་ལ་སློབ་གཉེར་གྲུབ་མཚམས་སུ་ངོས་ལེན་ཡོད་པའི་སློབ་ཐོན་ལག་ཁྱེར་མཁོ་སྤྲོད་བརྒྱུད། མ་འོངས་བཟང་ཕྱོགས་ཀྱི་མདུན་ལམ་དང་མུ་མཐུད་མཐོ་རིམ་སློབ་སྦྱོང་སོགས་ཀྱི་ཆེད་རམ་འདེགས་ཞུ་ཆེད་ཡིན་ཞེས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། མ་ཟད་ཁོང་གིས་ལས་འཆར་དེས་ཧི་མ་ལ་ཡའི་ནང་པའི་དགོན་སྡེ་ཁག་གི་བསླབ་གཞིར་སྒྲོམ་གཞི་ཞིག་གསར་འཛུགས་བྱས་པ་ཞིག་ལས། དེ་སྔ་ནས་ཧི་མ་ལ་ཡ་ནང་པའི་དགོན་སྡེ་ཁག་ཏུ་གྲྭ་བཙུན་རྣམས་ཀྱི་བསླབ་གཞིར་དམིགས་བསལ་འགྱུར་བ་གང་ཡང་ཕྱིན་མེད་པ་ངོ་སྤྲོད་གནང་གི་འདུག

མ་ལིང་གོམ་བུ་ལགས་ཀྱིས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་པ་ལྟར་ན། ཧི་མ་ལ་ཡའི་ཁུལ་གྱི་ནང་པའི་དགོན་སྡེ་ཁག་ ༢༥ ཡིས་བསླབ་གཞི་གསར་པ་དེ་དག་ཟླ་ ༤ པ་དང་ ༥ པའི་ནང་ཚུན་དུ་དངོས་སུ་ལག་བསྟར་བྱ་རྒྱུར་མོས་མཐུན་བྱས་ཡོད་ཅིང་། གཙོ་བོ་ལས་གཞི་དེས་དགོན་སྡེ་ཁག་གི་གྲྭ་བཙུན་རྣམས་ལ་དེ་སྔ་སློབ་སྦྱོང་གི་ཚད་རིམ་དང་མཐུན་པའི་ངོས་ལེན་ཡོད་པའི་ལག་ཁྱེར་མེད་པའི་དཀའ་ངལ་དེ་དག་སེལ་ཆེད་ཡིན་པ་འགྲེལ་བརྗོད་གནང་གི་འདུག

རོ་ཡི་ཊར་གསར་ཁང་གིས་གནས་ཚུལ་སྤེལ་བ་ལྟར་ན་ལས་འཆར་དེ་བཞིན་ལག་བསྟར་བྱས་མེད་པའི་དགོན་སྡེ་ཁག་ནས་ལོ་རྗེས་མར་རིམ་པས་ལག་བསྟར་བྱ་རྒྱུ་ཡིན་འདུག་ཀྱང་། ད་ལྟའི་ཆར་ལས་གཞི་དེའི་འབྲེལ་ཡོད་ལས་བྱེད་ཁག་གཅིག་གིས་དགོན་སྡེ་དེ་དག་གི་འབྲེལ་ཡོད་རྣམས་དང་ལྷན་དུ་སློབ་ཚན་འཁྲིད་ཕྱོགས་ཀྱི་བགྲོ་བསྡུར་བྱེད་སྐབས། དགོན་སྡེ་དེ་དག་ནང་སློབ་དེབ་གསར་པ་པར་སྐྲུན་དང་། མི་འབོར་ཉུང་བའི་ས་ཁུལ་ཡིན་པའི་ཆ་ནས་སློབ་འཁྲིད་བྱེད་མཁན་དགེ་རྒན་འཚོལ་རྒྱུར་དུས་ཚོད་དགོས་སྐོར་བརྗོད་ཡོད་པ་རེད་འདུག

རྒྱ་གར་གྱི་ཤེས་ཡོན་ལྷན་ཁང་དང་རྒྱ་གར་གྱི་ནང་པའི་མཁས་པ་ཚོས་ནང་པའི་དགོན་སྡེ་ཁག་གི་ཆེད་དུ་གྲ་སྒྲིག་བྱས་པའི་སློབ་དེབ་འདོན་ཐེངས་དང་པོར་ཞིབ་འཇུག་བྱས་པའི་ནང་། སློབ་དེབ་དེ་དག་ནང་རྒྱ་གར་གྱི་དེང་རབས་དང་གནའ་བོའི་ལོ་རྒྱུས། དེ་བཞིན་བོད་ཀྱི་རང་དབང་འཐབ་རྩོད་ནང་རྒྱ་གར་གྱི་ལྷག་བསམ་བཅས་ཀྱི་སྐོར་ཡོད་པ་རེད་འདུག་ལ། གཞན་ཨིན་ཡིག་དང་། ཧིན་དྷི། བོད་ཡིག ཨང་རྩིས། ཚན་རིག གློག་ཀླད་བཅས་ཀྱི་སློབ་ཚན་ཡང་ཡོད་པ། ན་ལེནྡྲ་ནང་པའི་སྲོལ་རྒྱུན་གྱི་རྒྱ་གར་ཧི་མ་ལ་ཡའི་ལྷན་ཚོགས་ཀྱི་དྲུང་ཆེ་མ་ལིང་གོམ་བུ་ (Maling Gombu) ལགས་ཀྱིས་འདི་ག་རླུང་འཕྲིན་ཁང་ལ་གསུངས་བྱུང་།

མ་ཟད་ཁོང་གིས་ལས་འཆར་དེའི་བརྒྱུད་གྲྭ་བཙུན་རྣམས་ལ་ནང་ཆོས་ཀྱི་སློབ་མཐར་སོན་པའི་ལག་ཁྱེར་སྤྲད་དེ་སྔར་དང་མི་འདྲ་བའི་མདུན་ལམ་གསལ་སྟོན་གྱིས། དགོན་སྡེ་ཁག་ཏུ་གྲྭ་བཙུན་གསར་ཞུགས་མང་དུ་འགྲོ་རྒྱུའི་སྐུལ་དེད་གཏོང་རྒྱུ་ཡིན་པ་ནི། ནང་བསྟན་གྱི་ཤེས་ཡོན་ཡར་རྒྱས་ཐད་ལོ་རྒྱུས་རང་བཞིན་ལྡན་པའི་གོམ་སྟབས་ཤིག་ཡིན་པ་འགྲེལ་བརྗོད་གནང་གི་འདུག

གནད་དོན་དེ་འབྲེལ་བཙན་བྱོལ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ཐར་ལམ་སྒྲོལ་མ་ལགས་ཀྱིས་རོ་ཡི་ཊར་གསར་ཁང་ལ། ནང་པའི་དགོན་སྡེ་ཁག་ཏུ་དེ་སྔ་ནས་དགོན་ཁག་སོ་སོའི་གྲྭ་བཙུན་རྣམས་ནས་སོ་སོའི་མ་དངུལ་ལ་གཞི་བཅོལ་བའི་ཐོག་འགན་བཞེས་ཏེ་འཛིན་སྐྱོང་གནང་གི་ཡོད་པ་ལས། བཙན་བྱོལ་བོད་མིའི་སྒྲིག་འཛུགས་ལ་དགོན་སྡེ་དེ་དག་གི་འཛིན་སྐྱོང་ཐད་དམིགས་བསལ་འཛིན་སྐྱོང་སོགས་ཀྱི་བདག་དབང་མེད་པ་གསུངས་འདུག་ལ། གནད་དོན་དེ་འབྲེལ་དགའ་ལྡན་ཕོ་བྲང་ཡིག་ཚང་གི་ལས་ཀྱི་སྣེ་མོ་བ་ཞིག་གིས་དེའི་ཐད་ལ་བཀའ་མོལ་གནང་རྒྱུར་ཞལ་བཞེས་གནང་མེད་པ་རེད་འདུག་ལ། མིང་བརྗོད་འདོད་མེད་པའི་རྒྱ་གར་གྱི་ནང་སྲིད་ལས་ཁུངས་ཀྱི་འབྲེལ་ཡོད་ལས་བྱེད་ཅིག་གིས། ཐེངས་འདིར་རྒྱ་གར་གཞུང་ངོས་ནས་མཐའ་མཚམས་ཁུལ་དུ་ཡོད་པའི་དགོན་སྡེ་ཁག་ཏུ་ཤེས་ཡོན་གཅིག་གྱུར་བཟོ་རྒྱུ་ནི། ས་མཚམས་ཁུལ་གྱི་ཆོས་ལུགས་སྒྲིག་འཛུགས་ཁག་ལ་རྒྱ་ནག་གི་ཤུགས་རྐྱེན་མི་ཐེབས་པའི་ཆེད་དུ་ཡིན་པ་རོ་ཡི་ཊར་གསར་ཁང་ལ་གསུངས་འདུག

ཐེངས་འདིའི་ལས་འཆར་གསར་པ་དེའི་བརྒྱུད་རྒྱ་གར་གཞུང་ངོས་ནས། དགོན་སྡེ་དེ་དག་ཏུ་མ་དངུལ་མཁོ་སྤྲོད་དང་ནང་པའི་ཆོས་བརྒྱུད་འདྲ་མིན་གྱི་ཕྱི་རྒྱལ་རོགས་སྐྱོར་བརྒྱུད། དགོན་སྡེ་ཁག་ལ་དགེ་རྒན་གསར་བསྐོ་དང་། དགེ་འདུན་པ་ཚོར་སློབ་ཡོན་སྤྲོད་རྒྱུ། དེ་བཞིན་ལོ་རེའི་ཡིག་རྒྱུགས་གཏོང་རྒྱུའི་ལམ་བུ་བཟོས་ཏེ་ལོ་བཅུ་ཕྲག་མང་པོ་གནས་ཐབས་ལ་འབད་བརྩོན་གནང་རྒྱུ་ཡིན་པ་རེད་འདུག

རྩ་བའི་ཕྱི་ལོ་ ༢༠༢༠ ནས་བཟུང་རྒྱ་དཀར་ནག་གཉིས་ཀྱིས་ལ་དྭགས་ཀྱི་གྷལ་ཝན་ཡུལ་གཤོངས་ས་ཁུལ་དུ། ཕྱོགས་གཉིས་ཀྱི་དམག་དཔུང་བར་གདོང་ཐུག་དང་དམག་མི་ཤི་སྐྱོན་བྱུང་པ་སོགས་ཡུན་རིང་རྩོད་རྙོག་ནང་ལྷག་པ་སོགས་བྱུང་ཡོད་པའི་ཁར། སྔ་ལོའི་ཟླ་ ༡༠ པའི་ནང་རྒྱ་གར་གྱི་སྲིད་བློན་ན་རནདྲ་མོ་དྷི་དང་རྒྱ་ནག་སྲིད་འཛིན་ཞི་ཅིན་ཕིང་གཉིས་ཐུག་འཕྲད་མ་བྱུང་གོང་ཞི་འགྲིག་གྲོས་མོལ་གྱི་ལམ་ཁ་འགོ་བཙུགས་ཡོད་པ་དང་། དེ་ནས་རིམ་པས་ཕྱི་སྲིད་བློན་ཆེན་སོགས་ཀྱི་བརྒྱུད་ས་མཚམས་ཞི་འགྲིག་ཐད་གྲོས་མོལ་བྱུང་ཡོད་ཀྱང་། རྒྱལ་ཁབ་ཕན་ཚུན་དབར་གྱི་ས་མཚམས་སུ་དངོས་གསལ་དོད་མིན་གཉིས་ཀའི་སྒོ་ནས་དོགས་གཟོན་སོགས་བསྟུད་མར་བྱེད་བཞིན་ཡོད་པ་རེད།

གསར་འགོད་པ། བདེ་སྐྱིད་ཀུན་སྒྲོལ། རྡོ་རྗེ་སྒྲོལ་མ།

རྩོམ་སྒྲིག་པ། བསྟན་འཛིན་པདྨ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།