འབར་མའི་སྲིད་འཛིན་རྒྱ་གར་དུ་གཞུང་དོན་འཚམས་འདྲི།

༄༅༎འབར་མའི་སྲིད་འཛིན་ཐེཨིན་སེན་རྒྱ་གར་གྱི་རྒྱལ་ས་སྡི་ལིར་ཉིན་གསུམ་རིང་གཞུང་དོན་ཕྱོགས་ཕེབས་ལ་འབྱོར་སྐབས་རྒྱ་གར་གཞུང་གིས་ཕེབས་བསུ་གཟབ་རྒྱས་ཞུས་འདུག    འབར་མའི་སྲིད་འཛིན་ཐེཨིན་སེན་ནི། དེ་སྔོན་དམག་སྤྱི་ཡིན་ཡང་ཉེ་སྔོན་རྩོད་གཞི་ཅན་གྱི་རྒྱལ་ཡོངས་འོས་བསྡུའི་རྗེས་སུ་སྲིད་འཛིན་གོ་གནས་བཟུང་བ་ཡིན་པ་རེད། ཁོང་གིས་སྡི་ལིར་མ་ཕེབས་གོང་ཕྱོགས་འགལ་ཚོགས་པའི་སྲིད་དོན་མི་སྣ་ཉིས་བརྒྱ་སྐོར་བཙོན་གྲོལ་བཏང་སྟེ་ཕྲན་བུ་གུ་ཡངས་སྲིད་བྱུས་བཟུང་འཆར་ཡོད་པའི་རྣམ་འགྱུར་བསྟན་ཡོད་པ་རེད།    རྒྱ་གར་རྒྱ་ས་སྡི་ལིར་རྒྱ་གར་གྱི་སྲིད་བློན་མན་མོ་ཧན་སིང་མཆོག་དང་མཇལ་འཕྲད་བཀའ་བསྡུར་གནང་ཡོད་པ་མ་ཟད། འགོ་ཁྲིད་གཞན་ཁག་ཀྱང་མཇལ་འཕྲད་གནང་གི་ཡོད་པ་རེད།    དེ་སྔོན་སྲིད་དབང་གཅིག་སྡུད་འབར་མའི་དྲག་པོའི་སྲིད་གཞུང་ལ་རྒྱ་ནག་ཕུད་པའི་རྒྱལ་སྤྱིའི་ཡུལ་གྲུ་ཕལ་མོ་ཆེས་སྐྱོན་བརྗོད་དང་དཔལ་འབྱོར་བཀག་སྡོམ་གནང་ཡོད་ཀྱང་ཉེ་ལམ་འབར་མའི་སྲིད་འཛིན་ཐེཨིན་སེན་ཡིས་འབར་མའི་ཕྱོགས་འགལ་ཚོགས་པའི་དབུ་ཁྲིད་ལྕམ་ཨོང་སན་སུ་ཆི་མཆོག་དང་མཇལ་འཕྲད་བཀའ་བསྡུར་གནང་བ་མ་ཟད། སྲིད་དོན་བཙོན་པ་ཉིས་བརྒྱ་གློད་གྲོལ་བཏང་བ་དང་། ད་དུང་བཅོས་བསྒྱུར་གཏོང་རྒྱུའི་ལས་འཆར་ཡོད་ལུགས་ཕྱི་བསྒྲགས་གནང་ཡོད་པ་རེད།   
འཛམ་གླིང་མཉམ་སྦྲེལ་རྒྱལ་ཚོགས་ཀྱི་སྤྱི་ཁྱབ་པ་སྦན་ཀི་མུན་དང་། ཨ་མེ་རི་ཁ་སོགས་ཀྱིས་འབར་མའི་གཞུང་གིས་སྲིད་དོན་བཙོན་པ་ཉིས་བརྒྱ་གློད་གྲོལ་བཏང་བར་དགའ་བསུ་ཞུས་ཡོད་ཀྱང་ད་དུང་སྲིད་དོན་བཙོན་པ་ཉིས་སྟོང་སྐོར་བཙོན་ཁང་ནང་ཡོད་པ་དེ་དག་ཡོངས་རྫོགས་གློད་གྲོལ་གཏོང་དགོས་ལུགས་གསུངས་ཡོད་པ་རེད།   
འབར་མའི་གཞུང་གིས་འབར་མའི་མི་མང་གི་མངོན་འདོད་འགྲུབ་པ་ནི་གོམ་སྟབས་གལ་ཆེ་ཞིག་ཏུ་གཟིགས་ཀྱི་འདུག་ཀྱང་ད་དུང་སྲིད་དོན་བཙོན་པ་འཕོན་ཆེ་ཡོད་པ་དེ་དག་ཚང་མ་གློང་གྲོལ་གཏོང་དགོས་ཀྱི་རེད་ཅེས་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་མ་ལྦིཀ་ཀྲོ་རི་ཡ་ནུ་ལེནདྲ་གྱིས་གསུངས་གནང་འདུག ཡང་ཉེ་ལམ་འབར་མའི་གཞུང་གིས་རྒྱ་ནག་ནས་དངུལ་གྲོན་བཏང་སྟེ་རྩོད་གཞི་ཅན་གྱི་ཆུ་མཛོད་གསར་རྒྱག་ལས་གཞི་དེ་མཚམས་འཇོག་བྱ་རྒྱུའི་གསལ་བསྒྲགས་བྱས་པར་འབར་མའི་མང་གཙོའི་དབུ་ཁྲིད་ཨོང་སན་སུ་ཆི་ཡིས་གོམ་གང་མདུན་སྤོས་ཡིན་པར་འགྲེལ་བརྗོད་གནང་ཡོད་པ་རེད། རྒྱ་ནག་གཞུང་གིས་འབར་མའི་གཞུང་དང་འབྲེལ་ལམ་གཏིང་ཟབ་བྱས་ཏེ་ཚོང་འབྲེལ་ཁེ་ཕན་འབྱུང་ཐབས་བྱས་པར་བརྟེན་ཁྱིམ་མཚེས་རྒྱལ་ཁབ་རྒྱ་གར་གཞུང་གིས་འབར་མའི་གཞུང་དང་གང་ཅིའི་འབྲེལ་ལམ་རྒྱ་ཆེ་རུ་གཏོང་ཐབས་གནང་བཞིན་པ་རེད།    འབར་མ་དང་རྒྱ་ནག་དབར་སྔར་ལོའི་ཚོང་འབྲེལ་མ་གནས་བསྡོམས་འབོར་ཨ་སྒོར་ཐེར་འབུམ་ ༤ དང་ཕྱེད་ཙམ་བྱེད་ཀྱི་ཡོད་ཀྱང་ལོ་དེ་གའི་ནང་འབར་མ་དང་རྒྱ་གར་དབར་གྱི་ཚོང་འབྲེལ་མ་གནས་བསྡོམས་འབོར་ཨ་སྒོར་གཅིག་ལྷག་ཙམ་ལས་བྱེད་ཀྱི་མེད་པ་རེད།