རྒྱ་གར་གྱི་རྡོ་སྣུམ་དང་སོལ་བའི་དགོས་མཁོ་ཆེ་རུ་འགྲོ་རྒྱུ།

༄༅༎དེ་རིང་རྒྱ་གར་གྱི་སྲིད་བློན་མན་མོ་ཧན་སིངྒ་མཆོག་གིས་མ་འོངས་ལོ་བཅུའི་ནང་རྒྱ་གར་ཡུལ་གྱི་རྡོ་སྣུམ་དང་སོལ་རླངས་ཀྱི་དགོས་མཁོ་བརྒྱ་ཆ་༤༠འཕར་རྒྱུ་ཡིན་སྐོར་གསུངས་ཏེ། རྒྱ་གར་གྱི་ནུས་ཤུགས་ལས་ཁང་ཁག་གིས་ཕྱི་རྒྱལ་ཡུལ་ཁག་གི་ནུས་པའི་འབྱུང་ཁུངས་ནང་མ་རྩ་འཛུགས་འཇོག་གིས་རྒྱ་བསྐྱེད་གཏོང་ཐབས་བྱེད་དགོས་རྒྱུའི་འབོད་བསྐུལ་གནང་འདུག།

མི་འབོར་ཐེར་འབུམ་གཅིག་དང་དུང་ཕྱུར་གཅིག་ཡོད་པའི་རྒྱ་གར་རྒྱལ་ཁབ་ཀྱིས་མ་བཅོས་རྡོ་སྣུམ་བརྒྱ་ཆ་༨༠ཕྱི་ཕྱོགས་ནས་ནང་འདྲེན་བྱེད་དགོས་ཀྱི་ཡོད་པ་རེད།

རྒྱ་གར་གྱི་རྒྱལ་ས་ལྡི་ལི་གསར་པའི་ནང་ཚུགས་པའི་རྡོ་སྣུམ་ཚོགས་འདུའི་ཐོག་སྲིད་བློན་སིངྒ་མཆོག་གིས་ད་ཕན་ལོ་བཅུའི་ནང་རྒྱ་གར་གྱི་རྡོ་སྣུམ་དང་སོལ་བ། རང་བཞིན་རླུང་རླངས་བཅས་ཀྱི་དགོས་མཁོ་བརྒྱ་ཆ་༤༠ལྷག་འཕར་རྒྱུ་ཡིན་པ་ལྟར། རྒྱ་གར་ཡུལ་གྱི་རྡོ་སྣུམ་གཏེར་ཁ་ཁག་ནས་ཐོན་སྐྱེས་བརྒྱ་ཆ་༡༢མ་གཏོགས་བྱེད་ཐུབ་རྒྱུ་མིན་སྟབས། དགོས་མཁོ་དེ་ཚོ་ཕལ་ཆེ་བ་ཕྱིའི་ཡུལ་ཁག་ནས་ནང་འདྲེན་བྱེད་དགོས་ཆགས་རྒྱུ་ཡིན་སྐོར་འགྲེལ་བརྗོད་གནང་བཞག།

རྒྱ་གར་གཞུང་གིས་རྒྱ་གར་རྒྱལ་ཡོངས་རྡོ་སྣུམ་བཟོ་ཚོང་ལས་ཁང་ཁག་ལ་ཕྱིའི་རྒྱལ་ཁབ་ཀྱི་རྡོ་སྣུམ་ཁེ་གཉེར་ལས་ཁང་ནང་མ་རྩ་འཛུགས་འཇོག་གང་ཐུབ་བྱས་ནས་གོ་སྐབས་གསར་པ་འཚོལ་ཐབས་བྱེད་དགོས་རྒྱུའི་སྐུལ་ལྕགས་ཤུགས་ཆེ་གནང་བཞིན་ཡོད་སྐོར་ སྲིད་བློན་ སིངྒ་མཆོག་གིས་གསུངས་འདུག།