ཀཤ་མིར་གྱི་ས་ཁུལ་དུ་ཛ་དྲག་གི་ཚོར་བ་ཆུང་དུ་འགྲོ་རྒྱུའི་རེ་བ།

༄༅༎རྒྱ་གར་དང་པ་ཀིསི་ཐན་སོ་སོས་དབང་འཛིན་བྱེད་བཞིན་པའི་ཀཤ་མིར་ཕྱོགས་གཉིས་དབར་ལོ་ངོ་དྲུག་བཅུ་ལྷག་རིང་ཐད་ཀར་ཚོང་ལས་བཀག་ཡོད་ཀྱང་དེ་རིང་གཟའ་མིག་དམར་ཉིན་ཐད་ཀར་གྱི་ཚོང་ལས་འགོ་བཙུགས་བྱས་ཡོད་པ་དང་འདིས་ས་ཁུལ་དེའི་ནང་གི་ཛ་དྲག་གི་ཚོར་བ་དེ་ཆུང་དུ་འགྲོ་རྒྱུར་རེ་བ་བྱེད་བཞིན་ཡོད་པ་རེད་

རྒྱ་གར་གྱི་ཀཤི་མིར་ས་ཁུལ་ནས་ཐོན་པའི་ཀུ་ཤུ་རླངས་འཁོར་བཅུ་གསུམ་ཞིག་པ་ཀི་སི་ཐན་གྱི་ས་ཐོག་ཏུ་འོར་འདྲེན་བྱས་ཡོད་ཅིང་ཡང་དེ་བཞིན་པ་ཀི་སི་ཐན་གྱི་ཀཤ་མིར་ས་ཁུལ་ནས་ཤིང་ཏོག་སྣ་ཚོགས་བླུག་པའི་རླངས་འཁོར་བཅུ་བཞི་རྒྱ་གར་གྱི་ས་ཐོག་ཐོན་ཡོད་པ་ཕེརན་སི་གསར་སྤེལ་ལས་ཁང་གིས་གནས་ཚུལ་སྤེལ་འདུག

ད་རེས་ཀྱི་འཕེལ་རིམ་གསར་པ་འདི་ནི་ཀཤི་མིར་གྱི་ས་ཁུལ་གཉིས་ཀའི་དཔལ་འབྱོར་གྱི་གནས་སྟངས་ཡར་རྒྱས་འབྱུང་རྒྱུར་ལོ་རྒྱུས་རང་བཞིན་ལྡན་པའི་འཕེལ་རིམ་ཞིག་ཡིན་པ་རྒྱ་གར་གྱི་དབང་འཛིན་འོག་ཡོད་པའི་ཀཤི་མིར་གྱི་སྲིད་སྐྱོང་པ་སྐུ་ཞབས་ཨེན་ཨེན་ལྦོ་རས་གསུངས་འདུག ཁོང་གིས་ད་དུང་འཕེལ་རིམ་འདིས་ས་ཁུལ་འདིའི་ནང་གི་ཞི་བདེ་གོང་འཕེལ་འགྲོ་རྒྱུར་ཡང་ཕན་ཐོགས་འབྱུང་བའི་རེ་བ་ཡོད་སྐོར་འགྲེལ་བརྗོད་གནང་ཡོད་པ་རེད་