རྒྱ་གར་དང་པ་ཀི་སི་ཐན་གྱི་ཞི་གྲོས་བསྐྱར་ཚུགས།

༄༅༎དེ་སྔོན་༢༠༠༨ལོར་རྒྱ་གར་གྱི་གྲོང་ཁྱེར་མུམ་སྦའེ་ནང་འཇིགས་སྐུལ་བས་དྲག་སྤྱོད་གྱི་དོན་རྐྱེན་བྱུང་རྗེས་ཕྱོགས་གཉིས་དབར་བར་མཚམས་ཆད་པའི་ཞི་བདེ་གྲོས་མོལ་དེ་ད་ཆ་བསྐྱར་དུ་དབུ་འཛུགས་གནང་རྒྱུར་རྒྱ་གར་དང་པ་ཀིསི་ཐན་གཉིས་དབར་མོས་མཐུན་བྱུང་བཞག།

ཁ་ས་འབྲུག་གི་རྒྱལ་ས་ཐིམ་པུར་རྒྱ་གར་གྱི་ཕྱི་འབྲེལ་དྲུང་ཆེ་ལྕམ་ནི་རུ་པ་མ་རའོ་དང་པ་ཀིསི་ཐན་གྱི་ཕྱི་འབྲེལ་དྲུང་ཆེ་སལ་མའན་སྦ་ཤིར་རྣམ་གཉིས་དབར་སྔ་ལོ་ཕྱི་ཟླ་༧པ་ནས་བཟུང་གཞུང་འབྲེལ་གྲོས་མོལ་ཐེངས་དང་པོ་དེ་གནང་ཡོད་པ་དང༌། གྲོས་མོལ་གནང་གྲུབ་པའི་རྗེས་ཟུང་འབྲེལ་སྤྱི་བསྒྲགས་ཤིག་སྤེལ་གནང་ཡོད་པའི་ནང༌། རྒྱ་གར་དང་པ་ཀིསི་ཐན་དབར་ཡོད་བཞིན་པའི་དཀའ་རྙོག་སེལ་ཐབས་སུ་ཕྱོགས་གཉིས་དབར་གྲོང་མོལ་དོན་ཕན་ལྡན་པ་ཞིག་གནང་རྒྱུ་གལ་ཆེ་ཡིན་པར་དབུ་འཁྲིད་གཉིས་ཀས་མོས་མཐུན་གནང་ཡོད་སྐོར་འགྲེལ་བརྗོད་གནང་བཞག། འོན་ཀྱང་ཁོང་རྣམ་གཉིས་དབར་མཇལ་འཕྲད་གནང་སྐབས་ ལོ་འདིའི་ནང་པ་ཀིསི་ཐན་གྱི་ཕྱི་འབྲེལ་བློན་ཆེན་ཤའ་མེ་མུརྡ་ཁུ་རེ་ཤི་རྒྱ་གར་ལ་ཕེབས་རྒྱུའི་འཆར་གཞི་ཡོད་པ་དེ་དུས་ཚོད་གང་འདྲ་ཞིག་ལ་ཕེབས་མིན་གྱི་ཚེས་གྲངས་གཏན་འབེབས་གནང་ཐུབ་མེད་པ་རེད།

འབྲུག་གི་རྒྱལ་ས་ཐིམ་པུར་ལྷོ་ཨེ་ཤི་ཡའི་མངའ་ཁུལ་གྱི་ཡུལ་ཁག་མཉམ་འབྲེལ་ལྷན་ཚོགས་ཀྱི་ཚོགས་ཆེན་གནང་བའི་ཞོར་འཕྲོས་སུ་ གོང་ཞུས་ཕྱི་འབྲེལ་དྲུང་ཆེ་རྣམ་གཉིས་དབར་གྱི་མཇལ་འཕྲད་དེ་བྱུང་འདུག།