བཙན་ཤེད་བྱ་རྒྱུ་མཚམས་འཇོག་དགོས།

༄༅།    །རྒྱ་ནག་གཞུང་གིས་བོད་ཀྱི་ཞིང་འབྲོག་ས་ཁུལ་ཁག་ནས་བོད་མི་རྣམས་བཙན་ཤེད་ཀྱི་གྲོང་ཁྱེར་ཁུལ་གནས་སྤོ་བྱེད་བཞིན་པའི་སྲིད་ཇུས་མཚམས་མཇོག་བྱེད་དགོས་པའི་སྐོར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འབོད་སྐུལ་གནང་འདུག    ཕྱི་ཚེས་༢༦ཉིན་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་Human Rights Watch འམ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྙན་ཐོ་ཞིག་འདོན་སྤེལ་གནང་ཡོད་པའི་ནང༌། ༢༠༠༦ནས་བཟུང་རྒྱ་ནག་གཞུང་གིས་བོད་ཁྱོན་ཡོངས་སུ་བོད་མི་ས་ཡ་གཉིས་ཙམ་ས་གནས་གཞན་དུ་བཙན་ཤེད་ཀྱིས་གནས་སྤོ་བྱེད་དུ་བཅུགས་ཡོད་པ་དང་། དམིགས་བཀར་མདོ་སྟོད་ཁུལ་གྱི་ཞིང་འབྲོག་ས་ཁུལ་ནས་བོད་མི་ཁྲི་འཚོ་བརྒྱ་ཕྲག་མང་པོ་གྲོང་ཁྱེར་ནང་གནས་སྤོ་བྱས་དང་བྱེད་མུས་ཀྱི་སྲིད་ཇུས་ལག་བསྟར་བྱེད་བཞིན་པ་དེ་དེང་དུས་རྒྱ་ནག་གི་ལོ་རྒྱུས་ནང་བཙན་བཤེད་ཐོག་ནས་མི་འབོར་གནས་སྤོ་བྱེད་པའི་ལས་འཆར་ཆེ་ཤོས་ཤིག་ཡིན་པས་མ་ཟད། ཐབས་ཇུས་དེ་བཞིན་བོད་མིའི་སྲོལ་རྒྱུན་གྱི་གོམས་གཤིས་དང་ལམ་ལུགས་རྩ་མེད་བཟོ་ཐབས་ཤིག་ཡིན་པའི་སྐྱོན་བརྗོད་དང་འབྲེལ། ཞིང་འབྲོག་བོད་མི་ཚོའི་སེམས་ཚོར་དང་། བསམ་ཚུལ་བརྗོད་ས་མེད་པར་བརྟེན། རྒྱ་གཞུང་གིས་སྲིད་ཇུས་དེ་དག་ལག་བསྟར་འཕྲལ་དུ་མཚམས་མཇོག་བྱེད་དགོས་རྒྱུའི་ནན་སྐུལ་གནང་བཞག།