ཕྱི་ཚེས་༣༠འི་ཉིན་འཚེ་མེད་ཞི་བའི་ལས་འགུལ་སྤེལ་རྒྱུའི་སྐོར།

༄༅༎བོད་ཀྱི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་བརྒྱད་པའི་ཚེས་༣༠ཉིན་འཛམ་གླིང་ཁྱོན་ཡོངས་སུ་དུས་གཅིག་ཏུ་སྤེལ་རྒྱུའི་འཚེ་མེད་ཞི་བའི་ལས་འགུལ་ཞེས་པའི་ནང་ལྷན་བཞུགས་གནང་རྒྱུ་ཡིན་འདུག

བོད་མི་དང་བོད་དོན་རྒྱབ་སྐྱོར་བ་དེ་བཞིན་འཛམ་གླིང་ནང་ཞི་བདེར་དགའ་བའི་མི་ཚང་མས་ཕྱི་ཟླ་བརྒྱད་པའི་ཚེས་༣༠ཉིན་གྱི་སྔ་དྲོའི་ཆུ་ཚོད་བདུན་པ་ནས་ཕྱི་འདྲོའི་ཚོུད་༧པ་བར་དུས་གཅིག་ཏུ་ལས་འགུལ་དེའི་ནང་མཉམ་བཞུགས་བྱ་རྒྱུ་ཡིན་པ་དང་། དེའི་རིང་ལས་འགུལ་དེའི་ནང་བཞུགས་མཁན་ཚོས་བཟའ་ཆ་མི་ཆོད་པར་ ཞལ་འདོན་སོགས་གནང་རྒྱུ་ཡིན་ཞིང་ ལས་འགུལ་དེ་བཞིན་བཙན་བྱོལ་བོད་གཞུང་བཀའ་ཤག་གིས་སྣེ་ཁྲེད་གནང་བ་ཞིག་ཡིན་ཞིང༌། ལས་འགུལ་སྣེ་ཁྲིད་གནང་མཁན་བཙན་བྱོལ་བོད་གཞུང་བཀའ་ཤག་ནས་ ད་རེས་ཀྱི་ལས་འགུལ་དེའི་ནང་བཙན་བྱོལ་སྤྱི་ཚོགས་ནང་ཡོད་པའི་ཚོགས་སྡེ་ཁག་དང་དེ་བཞིན་བཙན་བྱོལ་ནང་གནས་པའི་བོད་མི་དང་བོད་དོན་རྒྱབ་སྐྱོར་བ་དེ་བཞིན་ཞི་བདེར་དགའ་བའི་མི་སྣ་ཡོངས་རྫོགས་ཀྱིས་དུས་གཅིག་ཏུ་དུས་ཡུན་ཚོུད་༡༢རིང་འཚེ་བ་མེད་པའི་ལས་འགུལ་དེའི་ནང་མཉམ་བཞུགས་གནང་རྒྱུའི་འབོད་སྐུལ་གནང་ཡོད་པ་དང་། འཚེ་མེད་ཞི་བའི་ལས་འགུལ་དེ་བརྒྱུད་ནས་ཞི་བདེ་དང་དྲང་བདེན་གྱི་ཐོག་ནས་བོད་ཀྱི་གནད་དོན་དེ་གང་མགྱོགས་སེལ་རྒྱུར་རྒྱལ་སྤྱིའི་ཐོག་ནས་རྒྱབ་སྐྱོར་གང་མང་ཐོབ་ཐབས་གནང་རྒྱུའི་དམིགས་ཡུལ་འཛིན་གནང་གི་ཡོད་པ་རེད།