༸གོང་ས་མཆོག་ནས་ཆོས་འབྲེལ་གསུང་ཆོས།

༄༅༎བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཚེས་དགུ་ཉིན་རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་ལོའོ་སེ་པི་ཊི་རྫོང་གི་ཀ་ཛ་ཁུལ་དུ་ཆིབས་བསྒྱུར་གནང་སྟེ་ཉིན་ཞག་ལྔའི་རིང་ཀ་ཛ་ཏ་སྦོ་སངས་དཀར་བཅས་སུ་ཆོས་ཕྱོགས་མཛད་འཕྲིན་བསྐྱངས་དང་སྐྱོངས་བཞིན་པ་རེད།

ཕྱི་ཚེས་དགུ་ཉིན་ཀ་ཛ་ས་གནས་ནང་གསར་བཞེངས་གནང་བའི་ས་སྐྱ་ཁང་གསར་དགོན་པར་རང་གནས་དབུ་འབྱེད་གནང་ཡོད་པ་དང་ཕྱི་ཚེས་བཅུ་ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་ཁུལ་དེའི་ནང་གི་ཆོས་ཞུ་བ་ཆིག་ཁྲི་ལྔ་སྟོང་བརྒལ་བར་ཆོས་འབྲེལ་དབུ་ཚུགས་གནང་ཡོད་འདུག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཆོས་ཞུ་བ་ཚོར་ཐོག་མར་ཆོས་འབྲེལ་དབུ་ཚུགས་གནང་བའི་སྐབས་བཀའ་གནང་དོན་ལ་ཧི་མ་ལ་ཡའི་རི་རྒྱུད་དུ་གནས་བའི་མི་རྣམ་གྱིས་ནང་པའི་ཆོས་ལ་ཉམས་ལེན་བྱས་ནས་བདག་གཅེས་རྒྱུན་འཁྱོངས་བྱ་རྒྱུ་དེ་གལ་འགངས་ཆེན་པོ་ཡིན་པ་བཀའ་གནང་མཛད་ཡོད་ཅིང་༸གོང་ས་མཆོག་ནས་གསང་སྔགས་རྡོ་རྗེ་ཐེག་པའི་ཆོས་ཉམས་ལེན་བྱས་པ་ལ་ཐོག་མར་རྒྱུད་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བས་འཛིན་པ་ཞིག་དགོས་རྒྱུ་དེ་གལ་ཆེ་ཡིན་པའི་སྐོར་ཡང་བཀའ་གནང་མཛད་ཡོད་པ་རེད། ཆོས་འབྲེལ་ཉིན་དང་པོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་ས་སྐྱ་ཀུན་དགའི་སྙིང་པོར་རྗེ་བཙུན་འཇམ་དཔལ་དབྱངས་ཀྱིས་གདམ་པར་བསྩལ་བའི་ཞན་པ་བཞི་བྲལ་གྱི་གདམ་ངག་བཀའ་ཁྲིད་གནང་ཡོད་པ་དང་དེ་ནི་རྗེ་བཙུན་འཇམ་དཔལ་དབྱངས་ཀྱིས་ས་སྐྱང་ཀུན་དགའ་སྙིང་པོར་བསྩལ་བའི་ལུང་བསྟན་ལྟར་ས་སྐྱ་གྲགས་པ་རྒྱལ་མཚན་གྱིས་འགྲེལ་པ་མཛད་པ་ཞིག་ཡིན་པ་རེད། གསུང་ཆོས་ཞུ་བར་བཅར་མཁན་གྱི་གྲས་སུ་ཀ་ཛ་ཁུལ་གྱི་དཔོན་རིགས་ཁག་ཅིག་དང་དེ་བཞིན་རྫོང་གསར་མཁན་རིན་པོ་ཆེ་ཀ་ཛ་ཁུལ་གྱི་བཙན་བྱོལ་བོད་མི་མང་སྤྱི་འཐུས་དང་ས་སྐྱ་ནང་སློབ་ཀྱི་དགེ་སློབ་སོགས་ཀྱི་གཙོས་མི་གྲངས་སྟོང་ཕྲག་གསུང་ཆོས་ཞུ་བར་བཅར་ཡོད་འདུག