ནང་པའི་དགེ་འདུན་པ་ཚོར་ཚན་རིག་སློབ་ཁྲིད་གནང་འཆར།

༄༅༎སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་དུ་ཡོད་པའི་བོད་པའི་དགོན་སྡེ་ཁག་ནང་དུས་ཚོད་མི་རིང་བའི་ནང་དེང་རབས་ཀྱི་ཚན་རིག་སློབ་ཁྲིད་གནང་རྒྱུའི་འཆར་གཞི་ཡོད་པའི་བཀའ་གནང་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་ཡུ་པི་མངའ་སྡེའི་རྒྱལ་ས་ལཀི་ནོ་ནང་དུ་ཚོགས་པའི་ཀླད་པའི་རྩ་ཁམས་རིག་པའི་ཚན་རིག་ཚོགས་འདུ་ཐེངས་༥༨པའི་ཐོག་ཚོགས་མགོན་དུ་ཆིབས་བསྒྱུར་བཀའ་དྲིན་བསྐྱངས་གནང་བ་བཞིན་ཁ་ས་ཕྱི་ཚེས་བཅུ་བདུན་ཉིན་ཚོགས་བཅར་བའི་འདུ་འཛོམས་དེའི་ཐོག་ལ་གསུང་བཤད་གནང་བའི་ནང། མ་འོངས་པར་བཙན་བྱོལ་ནང་གི་བོད་པའི་དགོན་སྡེ་ཁག་ནང་ནང་ཆོས་སློབ་ཁྲིད་ཀྱི་སློབ་ཚན་དང་མཉམ་དུ་དེང་དུས་ཀྱི་ཚན་རིག་སློབ་གཉེར་བྱ་རྒྱུ་སློབ་ཚན་ཁོངས་སུ་བཅུག་རྒྱུའི་དགོངས་གཞི་ཡོད་ཅེས་བཀའ་གནང་བ་མ་ཟད། ད་ལྟའི་འཆར་བཙན་བྱོལ་ནང་ཚན་རིག་སློབ་སྦྱོང་བྱེད་མཁན་གྱི་སློབ་ཕྲུག་འདེམས་ཐོན་བྱས་ཏེ་ཨ་མི་རི་ཀའི་ཨེཏ་ལེན་ཊ་མཐོ་རིམ་སློབ་གྲའི་ནང་ལོ་ལྔའི་རིང་ཚན་རིག་སློབ་སྦྱོང་དུ་ཆེད་གཏོང་བྱེད་པའི་ལས་དོན་གྱི་རྨང་གཞི་འགོ་བཙུགས་ཟིན་པ་དང། བཞུགས་སྒར་རྡ་རམ་ས་ལའི་ཁུལ་གྱི་དགོན་སྡེ་ཁག་ནང་ལའང་སེམས་དང་རྒྱུ་འབྲས་ཀྱི་རྣམ་བཞག་གཞི་བཅོལ་ཏེ་ཚན་རིག་སློབ་ཁྲིད་བྱེད་རྒྱུ་འགོ་བཙུགས་ཟིན་པའི་བཀའ་གནང་ཡོད་པ་རེད།

ཀླད་པའི་རྩ་ཁམས་རིག་པའི་ལྷན་ཚོགས་དེའི་ནང་ལ། རྒྱ་གར་གྱི་སྲིད་བློན་དམ་པ་ལྕམ་ཨིན་རྡི་ར་གེན་རྡི་ཡི་བུ་ཆུང་བ་སཱན་ཇེ་གེན་རྡི་ཡི་མཚན་ཐོག་གི་སྨན་གྱི་མཐོ་རིམ་སློབ་གཉེར་ཁང་ནང་གི་རྒྱལ་ཁབ་ཁག་མི་འདྲ་བའི་སྨན་པ་དང་དབང་རྩའི་ཆེད་ལས་སྨན་པ། ཞིབ་འཇུག་པ་སོགས་ཁྱོན་ཚོགས་ཞུགས་མི་གྲངས་༧༠༠ལྷག་ཕེབས་ཡོད་པ་རེད།