དུས་དབང་སྔོན་འགྲོའི་གསུང་ཆོས་ཞུ་ཐུབ་དགོས་པའི་བཀའ་སློབ།

༄༅༎༧གོང་ས་༧སྐྱབས་མགོན་ཆེན་པོ་མཆོག་ནས་དུས་དབང་ཞུ་འདོད་ཡོད་པ་ཚོས་་ངེས་པར་སྔོན་འགྲོའི་གསུང་ཆོས་ཞུ་ཐུབ་པ་དགོས་པའི་བཀའ་སློབ་ནན་པོ་གནང་བཞིན་ཡོད་པ་རེད།
ཡང་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས༸རྒྱལ་བསྟན་མི་ནུབ་ཡུན་དུ་གནས་པ། བསྟན་པ་དེ་འཛིན་ཀུན་གྱི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། བསྟན་འཛིན་གྱི་སྐྱེས་ཆེན་དམ་པ་རྣམས་སྐུ་ཚེ་༸ཞབས་པད་བརྟན་ཅིང་བཞེད་དོན་ལྷུན་གྱིས་འགྲུབ་པ། ཉེ་འཆར་རྒྱ་གར་བྱང་ཤར་ཁུལ་དང་། ཉི་ཧོང་། ཊཱར་ཀི་སོགས་སུ་ས་ཡོམ་དང་། ཐེ་ལེནྜ་དང་། ཨི་ཊཱ་ལི། པ་ཀི་སི་ཐཱན། ན་ཡེ་ཇེ་རི་ཡ་སོགས་སུ་ཆུ་ལོག་བྱུང་བ་སོགས། འཛམ་གླིང་འདིར་འབྱུང་བའི་གོད་ཆགས་འོག་འཆི་རྐྱེན་དང་དཀའ་ངལ་མྱོང་བཞིན་པའི་འགྲོ་བ་སྤྱི་དང་། བྱེ་བྲག་གངས་ཅན་ལྗོངས་སུ་འབྱུང་བའི་གནོད་རྐྱེན་དང་། ལྷག་པར་ཕྱི་ལོ་ ༡༩༥༠ ནས་ད་བར་རྒྱ་དམར་སྲིད་དབང་གི་བཙན་གནོན་མནར་གཅོད་འོག་རྐྱེན་འདས་སུ་གྱུར་བ་རྣམས་དང་། དེ་མིན་སྡུག་སྦྱོང་ཚད་མེད་མྱངས་དང་མྱོང་བཞིན་པ་ཀུན་གྱི་ཚེ་རབས་ཕྲེང་བར་བྱས་ཤིང་བསགས་པའི་སྡིག་ལྟུང་ཐམས་ཅད་བྱང་ཞིང་དག་སྟེ། དལ་འབྱོར་རྟེན་བཟང་རིམ་བརྒྱུད་བླ་མེད་རྫོགས་བྱང་གི་གོ་འཕང་ཐོབ་པ་དང་། བོད་གཞིས་བྱེས་མཉམ་འཛོམས་ཀྱི་དགའ་བདེའི་དཔལ་ལ་སྤྱོད་ཐུབ་པ་སོགས་ཀྱི་ཆེད་དུ། གྲོས་ཚོགས་ཚོགས་དུས་གཉིས་པའི་སྐབས་ཐུགས་སྣང་གཞེན་བསྐུལ་ཡང་བྱུང་དོན་བཞིན། རྡོ་རྗེ་གདན་བྱང་ཆུབ་མཆོད་རྟེན་གྱི་རྟེན་གཙོ་ཐུབ་པའི་དབང་པོའི་སྐུ་བརྙན་ལ་ཞལ་གསེར་དང་ན་བཟའ་སྒྲོན་འབུལ་ཐོག རིས་མེད་འཕགས་ཚོགས་འདུས་པ་རྒྱ་མཚོར་བསྙེན་བཀུར་མཆོད་འབུལ་རྒྱས་པ་ཞིག་ཞུ་རྒྱུ་ལགས་ན། བོད་སྤྱི་མཐུན་གྱི་བསོད་ནམས་གསོག་པའི་དམིགས་ཡུལ་དང་བཅས་བོད་མི་རེ་རེ་ནས་སོ་སོའི་གནས་ཡུལ་རྒྱལ་ཁབ་ཀྱི་དངུལ་སྒོར་གཅིག་རྒྱས་བཅད་དང་། ཕྱོགས་མཚུངས་བློས་བཅད་ཞལ་འདེབས་ཀྱང་གནང་སྐྱོང་ཡོང་བའི་དགེ་སྐུལ་ཞུ་རྒྱུ་ཡིན་ཅེས་འཁོད་འདུག།