ཨ་རིའི་ཕྱི་སྲིད་དྲུང་ཆེ་ཀམ་སྦོ་དྲི་ཡར་འཚམས་གཟིགས་སུ་ཕེབས།

༄༅༎ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཀྲེན་ཀམ་སྦོ་དྲི་ཡའི་ནང་རྒྱལ་དོན་འཚམས་གཟིགས་སུ་ཕེབས་སྐབས་ཡུལ་དེས་རྒྱ་ནག་ལ་ཤུགས་ཆེ་རྟེན་དྲག་ན་ཡག་པོ་མེད་པའི་གཏམ་བཤད་གནང་ཡོད་པ་རེད།

ལྕམ་ཀི་ལིན་ཀྲེན་ལ་ཀམ་སྦོ་དྲི་ཡའི་ན་གཞོན་ཁག་ཅིག་གིས་དེང་སྐབས་ཀམ་སྦོ་དྲི་ཡའི་ནང་རྒྱ་ནག་གི་ཤུགས་རྐྱེན་ཆེན་པོ་ཡོད་པ་དེའི་སྐོར་འདྲི་བ་ཞུས་སྐབས་ཁོང་གིས་ཡུལ་གཞན་ལ་རྟེན་རྒྱུ་དེར་ཕྱོགས་ལྷུང་ཤུགས་ཆེ་མེད་པ་དང་རྒྱལ་ཁབ་གང་ཞིག་ལ་རྟེན་ཤུགས་ཆེ་དྲག་ན་ཡག་པོ་མེད་སྐོར་ལན་འདེབས་གནང་ཡོད་པ་རེད། ཀམ་སྦོ་དྲི་ཡའི་ཡུལ་ནང་རྒྱ་ནག་གིས་དངུལ་གྲོ་ལར་འཐེར་འབུམ་མང་པོ་མ་གནས་ཀྱི་བཟོ་ལས་ཚན་པ་༤༠༠སྐོར་ཞིག་གིས་ཡུལ་དེའི་ནང་ཆུ་གློག་བཟོ་འདོན་ཆུ་རག་དང་རྡོ་སོལ་གྱི་བཟོ་གྲ་སོགས་ལས་འཆར་དུ་མ་ཞིག་བཀོད་སྒྲིག་བྱས་ཡོད་པ་རེད། ཡང་ལྕམ་ཀི་ལིན་ཀྲེན་མཆོིག་གིས་ཀམ་སྦོ་དྲི་ཡས་རྒྱ་ནག་དང་འབྲེལ་ལམ་ཡག་པོ་གཉེར་རྒྱུ་དེར་རྒྱུ་མཚན་མང་པོ་ཡོད་པ་རེད་            ཡིན་ནའང་གནད་དོན་གལ་ཆེ་ཁག་ཅིག་ཐོག་རྒྱ་ནག་དང་གླེང་སློང་བྱེད་རྒྱུ་དེ་ཡང་གལ་འགང་ཆེན་པོ་ཆགས་ཡོད་པ་རེད་བསམ་གྱི་འདུག་ཅེས་གསུངས་འདུག 

སྔ་ལོ་རྒྱ་ནག་གིས་ཀམ་སྦོ་གྲི་ཡ་ལ་ཨ་རིའི་གྲོ་ལར་འཐེར་འབུམ་༡ལྷག་གི་རོགས་དངུལ་དང་དངུལ་བུན་གཡར་མ་གནང་གོང་ཀམ་སྦོ་གྲི་ཡའི་ནང་རྒྱ་ནག་ནས་ཡུ་གུར་མི་རིགས་༢༠ཞིག་སྲིད་དོན་གྱི་སྐྱབས་བཅོལ་ཞུ་བར་འབྱོར་བ་རྣམས་ཡ་ང་སྙིང་རྗེ་གང་ཡང་མེད་པར་རྒྱ་ནག་ལ་ཕྱིར་སློག་བྱས་ཡོད་པ་རེད།

རྒྱ་ནག་གིས་གོང་ཞུས་ཀྱི་རོགས་དངུལ་དེ་དང་ཡུ་གུར་བའི་མི་རིགས་རྣམས་རྒྱ་ནག་ལ་ཕྱིར་སློག་བྱེད་རྒྱུའི་གནད་དོན་ཐོག་འབྲེལ་བ་མེད་སྐོར་ཧམ་བཤད་བྱས་ཡོད་པ་རེད་ ཡང་ལྕམ་ཀི་ལིན་ཀྲེན་ཡིས་ཀམ་སྦོ་དྲི་ཡའི་མི་སེར་རྣམས་པར་ཡུལ་དེའི་ནང་རྒྱུགས་པའི་མེ་ཀོང་ཞེས་པའི་བོད་ཀྱི་ཛ་ཆུའི་སྟེང་རྒྱ་ནག་གིས་ཆུ་རག་རྒྱབ་རྒྱུའི་གནད་དོན་དེར་གདོང་ལེན་གནང་དགོས་པའི་སྐོར་ཡང་གླེང་ཡོད་པ་རེད། འཛམ་གླིང་གི་འཁོར་ཡུག་ཐོག་ལས་འགུལ་སྤེལ་མཁན་ཚོགས་པ་ཁག་གིས་རྒྱ་ནག་གིས་ཛ་ཆུའི་སྟེང་ཆུ་རག་མང་པོ་ཅིག་རྒྱབ་རྒྱུའི་འཆར་གཞི་དེར་སྐྱོན་བརྗོད་གནང་གི་ཡོད་པ་རེད་ རྒྱ་ནག་ནི་ཕྱི་ལོ་༡༩༧༠ལོ་རབས་ནང་ཀམ་སྦོ་དྲི་ཡའི་ཀེ་མེར་རུཇ་ཞེས་པའི་གཞུང་དེར་རྒྱབ་བསྐྱོར་བྱེད་མཁན་གྱི་རྒྱལ་ཁབ་ཞིག་ཡིན་པ་དང་སྐབས་དེར་ཀེ་མེར་རུཇ་གཞུང་དེས་ཡུལ་མི་ས་ཡ་༢ལྷག་དམར་གསོད་བཏང་ཡོད་པ་རེད༎