༧གོང་ས་མཆོག་གིས་ནུབ་ཕྱོགས་སུ་རི་བོ་དགེ་ལྡན་པའི་བསྟན་པ་འཛིན་སྐྱོང་སྤེལ་གསུམ་གནང་མཁན་གཙོ་གྲས། བླ་མ་ཐུབ་བསྟན་བཟོད་པ་རིན་པོ་ཆེར་མཇལ་ཁ་བཀའ་སློབ་སྩལ་ཡོད་པ།

བལ་ཡུལ་རྒྱལ་ཁབ་ནས་ཡིན་པ་དང་འདས་པའི་མི་ལོ་༥༠ཙམ་རིང་ནུབ་ཕྱོགས་སུ་ཐུབ་བསྟན་སྤྱི་དང་ཁྱད་པར་རི་བོ་དགེ་ལྡན་པའི་བསྟན་པ་འཛིན་སྐྱོང་སྤེལ་གསུམ་གཙོ་བོ་གནང་མཁན་གྱི་གྲས། སྐྱབས་རྗེ་བླ་མ་ཐུབ་བསྟན་བཟོད་པ་རིན་པོ་ཆེ་མཆོག། འདས་པའི་ལོ་ངོ་ཁ་ཤས་རིང་ཏོག་དབྱིབས་ནད་ཡམས་ཁྱབ་བརྡལ་གྱི་སྐབས་སུ། བལ་ཡུལ་ཀོ་པཎ་དགོན་པ་རུ་བཞུགས་ཏེ་༧གོང་ས་མཆོག་ལ་དངོས་སུ་མཇལ་བའི་གོ་སྐབས་བྱུང་མེད་པར་བརྟེན། ཉེ་ལམ་རིན་པོ་ཆེ་མཆོག་ཆེད་དུ་བཞུགས་སྒར་དགའ་ལྡན་ཆོས་ཚོགས་སུ་ཞབས་སོར་འཁོད་པ་དང་ཆབས་ཅིག་ཏུ། སྤྱི་ཟླ་༡༡པའི་ཚེས་༢ཉིན་བཞུགས་སྒར་ཕོ་བྲང་དུ། བོད་མིའི་དབུ་ཁྲིད་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པར། ལོ་མང་རིང་བླ་མ་བཟོད་པ་རིན་པོ་ཆེའི་རྒན་དམ་པ་ཐུབ་བསྟན་ཡེ་ཤེས་ལགས་ནས། ཕྱི་རྒྱལ་ཡུལ་གྲུ་ཁག་ནང་ཆོས་ཁྱབ་སྤེལ་གྱི་དཀའ་ལས་བརྒྱབས་པར་༧གོང་ས་མཆོག་ཧ་ཅང་གིས་ཐུགས་དགྱེས་ཚོར་ཆེན་པོ་གནང་གི་འདུག་ཅེས། བླ་མ་ཐུབ་བསྟན་བཟོད་པ་རིན་པོ་ཆེ་མཆོག་ནས་འགྲེལ་བརྗོད་གནང་གི་འདུག

བླ་མ་བཟོད་པ་རིན་པོ་ཆེ་མཆོག་ལ་འཛམ་གླིང་ཤར་ནུབ་གང་སར་རི་བོ་དགེ་ལྡན་པའི་ཆོས་བརྒྱུད་འཛིན་པའི་ཆོས་ཚོགས་དང་། བཙུན་དགོན། དགོན་པ་བཅས་ཧ་ཅང་མང་པོ་ཡོད་པ་མ་ཟད། ལྷག་པར་ཁོང་གི་གསུང་རྩོམ་དེབ་རིགས་ཧ་ཅང་མང་པོ་ཞིག་སྐད་ཡིག་སྣ་ཚོགས་ཀྱི་ནང་ཕབ་བསྒྱུར་ཞུས་ཡོད་པ་སོགས་ཀྱིས། ཆོས་འཆད་སྤེལ་སྤྱི་དང་ཁྱད་པར་ནུབ་ཕྱོགས་པ་ཚོར་ཆོས་འཆད་སྤེལ་དང་འབྲེལ་བའི་ཐད།༧གོང་ས་མཆོག་གིས་ལམ་སྟོན་ཕེབས་མིན་གྱི་ཐོག་བཀའ་འདྲི་ཞུས་པར། ད་ལྟའི་ཆར་དམིགས་བསལ་དེ་ལ་བཀའ་སློབ་གང་ཡང་ཕེབས་མ་སོང་མོད། དཀའ་ལས་བརྒྱབས་པར་ཐུགས་རྗེ་ཆེ་ཞེས་གསུངས་པ་འགྲེལ་བརྗོད་གནང་གི་འདུག

ནུབ་ཕྱོགས་སུ་ནང་ཆོས་འཛིན་སྐྱོང་སྤེལ་བར་ཕྱག་རྗེས་ཆེ་བའི་བླ་མ་ཐུབ་བསྟན་བཟོད་པ་རིན་པོ་ཆེ་མཆོག་ནི། སྤྱི་ལོ་༡༩༤༦ལོར་བོད་དང་ས་མཚམས་ཀྱི་བལ་བོའི་ནང་གི་ཤར་ཁུམ་བུའི་ས་གནས་སུ་འཁྲུངས་ཤིང་། སྐུ་ན་ཆུང་དུས་ནས་བོད་ནང་སློབ་སྦྱོང་དུ་ཕེབས་ཡོད་པ་མ་ཟད། སྤྱི་ལོ་༡༩༧༤ཙམ་ནས་ནུབ་ཕྱོགས་སུ་ཆིབས་བསྒྱུར་དང་ཆོས་འཆད་སྤེལ་གྱིས། ཐེག་ཆེན་འཛིན་སྐྱོང་ཚོགས་པ་དང་དགའ་ལྡན་ཆོས་ཚོགས་སོགས་བཙུགས་ཏེ་འགན་འཛིན་དུ་བཞུགས་པའི་ཡན་ལག་ཏུ། ཨེ་ཤེ་ཡ་དང་ཡོ་རོབ། བྱང་ཨ་མི་རི་ཀ་བཅས་རྒྱལ་ཁབ་༣༧ནང་རི་བོ་དགེ་ལྡན་པའི་ཆོས་བརྒྱུད་འཛིན་པ་ཆོས་ཚོགས་དང་དགོན་སྡེ་བརྒྱ་དང་ལྔ་བཅུ་ལྷག་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། བསྟན་འཛིན་འཕགས་སྒྲོན། 
དྲ་ཐོག་སྤེལ་མཁན། བསྟན་འཛིན་འཕགས་སྒྲོན།