བཀའ་བརྒྱུད་རྒྱལ་ཡོངས་ཁོར་ཡུག་སྲུང་སྐྱོབ་ཀྱི་ཚོགས་ཆེན་སྐོར།

༄༅༎བཞུགས་སྒར་རྡ་རམ་ས་ལར་ཡོད་པའི་བརྒྱུད་སྟོད་གྲ་ཚང་གིས་ཕྱི་ཟླ་བཅུ་པའི་ཚེས་གསུམ་ནས་བརྒྱད་བར་ཁོར་ཡུག་སྲུང་སྐྱོབ་ཀྱི་འབྲེལ་ཡོད་ལྷན་ཚོགས་ཤིག་བསྐོང་ཚོགས་གནང་ཡོད་པ་དང་དེའི་ཐོག་བཙན་བྱོལ་ནང་ཡོད་པའི་བཀའ་བརྒྱུད་དགོན་སྡེ་ཁག་༣༣་དང་དེ་བཞིན་རྒྱ་གར་དང་བལ་ཡུལ་དང་འབྲུག་ཡུལ་སོགས་ནས་སྐུ་ཚབ་མཉམ་བཞུགས་གནང་ཡོད་པ་རེད།

འཁོར་ཡུག་དང་འབྲེལ་བའི་ལྷན་ཚོགས་དེའི་ཐོག་རྒྱལ་བ་ཀརྨ་པ་དབུ་རྒྱན་འཕྲིན་ལས་རྡོ་རྗེ་མཆོག་དང་བཙན་བྱོལ་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་ལགས་རྣམ་གཉིས་ལྷན་ཚོགས་ཐོག་དབུ་བཞུགས་གནང་ཡོད་ཅིང་འཕྲོད་བསྟེན་བཀའ་བློན་མཆོག་ནས་ལྷན་ཚོགས་ཐོག་དངོས་པོ་དང་མིས་འཁོར་ཡུག་ལ་གནོད་ཚབས་བཟོ་ཡས་ཀྱི་ཉེན་ཚབས་ཇེ་ཆེར་འགྲོ་བཞིན་པ་དེས་ཆུ་དང་རླུང་སོགས་ལ་འབག་བཙོག་ཡོང་གི་ཡོད་སྟབས་དེས་རྐྱེན་པས་འཕྲོད་བསྟེན་གྱི་དཀའ་གནད་ཡང་ཇེ་མང་དུ་འགྲོ་བཞིན་ཡོད་པའི་སྐོར་གསུང་བཤད་གནང་ཡོད་པ་དང་འཕྲོད་བསྟེན་བཀའ་བློན་མཆོག་ནས་རྒྱལ་བ་ཀརྨ་པ་མཆོག་གིས་ཁོར་ཡུག་གནད་དོན་ཐོག་དགོངས་བཞེས་ཟབ་མོ་གནང་སྟེ་ལྷན་ཚོགས་དེ་རིགས་སྤེལ་གནང་བ་བརྒྱུད་ནས་བཙན་བྱོལ་བོད་མིའི་སྤྱི་ཚོགས་ཁྲོད་ཁོར་ཡུག་སྲུང་སྐྱོབ་ལས་དོན་ཐོག་དོ་སྣང་དང་ཐུགས་འཁུར་བྱེད་མཁན་མང་དུ་འགྲོ་རྒྱུའི་ཐུགས་རེ་གནང་གི་ཡོད་གསུངས་བཞག ཀརྨ་པ་རིན་པོ་ཆེ་མཆོག་ནས་ལྷན་ཚོགས་ཐོག་སྐྱེ་དངོས་གནས་སྟངས་རིག་པ་དང་ནང་ཆོས་བཟུང་འབྲེལ་ཐོག་ནས་ཁོར་ཡུག་ལ་སྲུང་སྐྱོབ་བྱ་རྒྱུ་དེ་ནི་གལ་འགངས་ཆེན་པོ་ཡིན་པའི་སྐོར་ཞིབ་ཕྲའི་བཀའ་སློབ་གནང་ཡོད་པ་རེད། དེ་མིན་ལྷན་ཚོགས་དེའི་ཐོག་ཚུགས་བཞུགས་གནང་བའི་འཛམ་གླིང་རི་དྭགས་སྲུང་སྐྱོབ་ཚོགས་པ་སོགས་ཀྱི་སྐུ་ཚབ་རྣམ་པ་ཚོས་ཀྱང་སྟོང་ལ་ཉེ་བའི་རི་དྭགས་སྲོག་ཆགས་སྲུང་སྐྱོབ་བྱ་རྒྱུའི་སྐོར་དང་དེ་བཞིན་ནུས་ཤུགས་སླར་ཡང་བེད་སྤྱོད་བྱ་རྒྱུ་དེས་ནུས་པའི་འབྱུང་ཁུངས་བེད་སྤྱོད་བྱ་རྒྱུ་ཉུང་དུ་ཕྱིན་ནས་ཆུ་དང་འཁོར་ཡུག་འབག་བཙོག་ཉུང་དུ་འགྲོ་རྒྱུར་ཕན་ཐོགས་ཡོད་པའི་ཁར་རི་དྭགས་སེམས་ཅན་སྲུང་སྐྱོབ་བྱ་རྒྱུར་ཕན་ཐོགས་ཡོད་པ་སོགས་ཁོར་ཡུག་དང་འབྲེལ་བའི་གནད་དོན་མང་པོ་ཞིག་གི་ཐོག་ཕན་ཚུན་གྲོས་མོལ་གནང་ཡོད་པ་རེད༎