དཀར་མཛེས་བོད་རིགས་རང་སྐྱོང་ས་ཁུལ་གྱི་རྩ་ཐང་ཐོག་མེ་སྐྱོན།

༄༅༎རེས་གཟའ་ཉི་མའི་ཉིན་རྒྱ་ནག་གཞུང་གི་ཤིང་ཧྰ་གསར་ཤོག་ཐོག་ལ། དཀར་མཛེས་བོད་རིགས་རང་སྐྱོང་ས་ཁུལ་གྱི་རྩ་ཐང་ཐོག་མེ་སྐྱོན་བྱུང་སྟེ་ཉུང་མཐར་མི་གྲངས་༢༢རྐྱེན་ལམ་དུ་ཕྱིན་ཡོད་པའི་གནས་ཚུལ་སྤེལ་བཞག

དེ་ཡང་ཤིང་ཧྰ་གསར་ཤོག་དེའི་ཐོག་ལ་གནས་ཚུལ་བཀོད་པར་གཞིགས་ན། རེས་གཟའ་ཉི་མའི་ཉིན་གུང་ཙམ་ལ་ཟི་ཁྲོན་ཞིང་ཆེན་གྱི་དཀར་མཛེས་བོད་རིགས་རང་སྐྱོང་གི་རྟའུ་ཁུལ་དུ་མེ་སྐྱོན་བྱུང་བ་དང༌། དེ་ཉིན་གྱི་ཆུ་ཚོད་༣པ་ཙམ་ལ་མེ་སྐྱོན་བཀག་འགོག་བྱེད་ཐུབ་པ་བྱུང་ཡོད་ཀྱང་ས་གནས་མི་དམངས་དང་དམག་མི་མེ་གསོད་ལས་ཀ་བྱེད་མཁན་མེ་སྐྱོན་ནང་དུ་ཚུད་དེ། རེས་གཟའ་ཉི་མའི་དགོང་དྲོ་བར་ཉུང་མཐར་མི་གྲངས་༢༢རྐྱེན་ལམ་དུ་ཕྱིན་པ་དང་མི་གཅིག་ལ་ཚབས་ཆེའི་རྨས་སྐྱོན་བྱུང་ཡོད་པ་རེད། རེས་གཟའ་ཉི་མའི་དགོང་དྲོ་གནས་ཚུལ་དེ་ཐོན་པའི་སྐབས་ལ། མེ་སྐྱོན་ནང་རྐྱེན་འདས་སུ་ཕྱིན་པའི་མི་༢༢དེའི་ནང་བོད་མི་ཇི་ཙམ་ཡོད་མེད་དང༌། རྨས་སྐྱོན་ཚབས་ཆེ་བྱུང་བ་དེ་བོད་མི་ཡིན་མིན། གནོད་འཚེ་བྱུང་བའི་མི་དེ་རྣམས་ཀྱི་མིང་དང་ཕོ་མོ་སོགས་གང་ཡིན་ངོ་སྤྲོད་དང༌། མེ་སྐྱོན་གྱི་དོན་རྐྱེན་ཇི་ལྟར་བྱུང་ཚུལ་སོགས་གནས་ཚུལ་ཞིབ་ཕྲ་སྤེལ་མེད་པ་རེད།