མའོ་ཙེ་ཏུང་གི་ཚ་བོ་ཞིག་དམག་དཔོན་གྱི་གོ་མིང་གནས་སྤར།

༄༅༎རྒྱ་ནག་གི་གསར་བརྗེའི་འགོ་ཁྲིད་དང་ཕྱི་ལོ་༡༩༤༩ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་གསར་འཛུགས་བྱེད་མཁན་མའོ་ཙེ་ཏུང་གི་ཚ་བོ་མའོ་ཤིན་ཡུ་ལ་དམག་དཔོན་གྱི་གོ་གནས་སྤར་ཡོད་པའི་སྐོར་དེ་རིང་རེས་གཟའ་མིག་དམར་ཉིན་རྒྱ་ནག་གི་གསར་ཤོག་ཐོག་གནས་ཚུལ་སྤེལ་ཡོད་པ་རེད།

དེ་ཡང་ཀྲོང་ཆིང་དགོང་དྲོའི་གསར་པར་ཐོག་ལ་མའོ་ཤིན་ཡུ་ནི་སྲིད་དོན་པ་ཞིག་ཡིན་པ་མ་ཟད་རྒྱ་ནག་མི་དམངས་བཅིངས་འགྲོལ་དམག་ནང་གི་དམག་དོན་ཚན་རིག་ཁང་གི་ཞིབ་འཇུག་པ་ཞིག་ཡིན་ཞིང་ཁོང་ལ་ཕྱི་ཟླ་དྲུག་པའི་ནང་རྒྱ་ནག་མི་དམངས་བཅིངས་འགྲོལ་དམག་གི་ཧྲའོ་ཅང་རིམ་པའི་དམག་དཔོན་དུ་བསྐོ་བཞག་བྱས་པ་དང་ཡིན་ནའང་ཁོང་ལ་དམག་དཔོན་གྱི་གོ་གནས་སྤར་བའི་གནས་ཚུལ་སྐོར་སྤྱི་ཚོགས་ཐོག་གསལ་བསྒྲགས་གང་ཡང་སྤེལ་མེད་ཀྱང་ཉེ་ཆར་མའོ་ཙེ་ཏུང་གི་ཕ་ཡུལ་ཧུ་ནན་ཞིང་ཆེན་ས་གནས་གཞུང་གིས་གོ་སྒྲིག་བྱས་པའི་རྒྱལ་སྤྱིའི་ཡུལ་སྐོར་དུས་ཆེན་གྱི་འགོ་འབྱེད་མཛད་སྒོའི་ཐོག་ལ་མའོ་ཤིན་ཡུ་མཉམ་ཞུགས་བྱེད་པའི་སྐབས་རྒྱ་སྐད་དུ་ཧྲའོ་ཅང་ཟེར་བའི་དམག་དཔོན་གྱི་གོ་གནས་ཀྱི་སྒྲིག་ཆས་གྱོན་ཡོད་པའི་སྐོར་གནས་ཚུལ་སྤེལ་ཡོད་པ་རེད། དེ་བཞིན་རྒྱ་ནག་ཀྲང་ཆིང་ཉིན་རེའི་གསར་ཤོག་ཐོག་ལའང་མའོ་ཤིན་ཡུ་ནི་ལོ་༣༩ཡིན་པར་བརྟེན་ནས་རྒྱ་ནག་མི་དམངས་བཅིངས་འགྲོལ་དམག་ནང་དུ་ཧྲའོ་ཅང་གོ་གནས་ཡོད་པའི་ལོ་ན་ཆུང་ཤོས་ཡིན་ཞིང་ཁོང་ད་ལྟའི་ལས་གནས་ནི་རྒྱ་ནག་མི་དམངས་བཅིངས་འགྲོལ་དམག་གི་ཆེད་གཉེར་ཞིབ་འཇུག་ཁང་དུ་དམག་འཁྲུག་དང་དམག་དོན་ཐབས་ཇུས་སྐོར་ལ་ཞིབ་འཇུག་འགན་འཛིན་གཞོན་པའི་ལས་ཀ་བྱེད་བཞིན་ཡོད་པའི་ཁར་ད་དུང་རྒྱ་ནག་གུང་ཁྲན་ཏང་གི་གཞོན་ནུ་སྡེ་ཚོགས་ཀྱི་ཚོགས་མི་དང་གྲོས་ཚོགས་ཀྱི་ཆབ་སྲིད་སློབ་སྟོན་པ་གཙོ་བོ་ཞིག་ཀྱང་ཡིན་པའི་སྐོར་བཀོད་ཡོད་པ་རེད། མའོ་ཤིན་ཡུ་ནི་མའོ་ཙེ་ཏུང་གི་བུ་མའོ་ཨན་ཆིང་གི་བུ་ཡིན་ཞིང་ལྷག་པར་དུ་ད་རེས་མའོ་ཤིན་ཡུ་ལ་དམག་དོན་གྱི་གོ་གནས་སྤར་བའི་གནས་ཚུལ་དེ་ནི་མའོ་ཙེ་ཏུང་གིས་ཕྱི་ལོ་༡༩༤༩ལོའི་ཕྱི་ཟླ་བཅུ་པའི་ཚེས་གཅིག་ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ཏེ་མི་ལོ་དྲུག་བཅུ་འཁོར་བའི་དུས་དྲན་ཟིན་པར་གཟའ་འཁོར་གཅིག་ལྷག་ཙམ་ལས་མེད་པའི་སྐབས་དེར་བྱུང་ཡོད་པ་རེད།