བལ་པོའི་མི་རིགས་ལ་རང་སྐྱོང་གནས་བབ་དགོས་པའི་ལས་འགུལ།

༄༅༎རྡོ་རྗེ་གླིང་ཁུལ་དུ་གོར་ཁ་ཇན་མུཀ་ཏི་མོར་ཆ་ཞེས་པའི་རྡོ་གླིང་ཁུལ་དུ་གནས་སྡོད་བལ་པོའི་མི་རིགས་ཀྱི་སྲིད་དོན་ཚོགས་པ་ཞིག་གིས་བལ་པོའི་མི་རིགས་ལ་རང་སྐྱོང་གནས་བབ་དགོས་པའི་ལས་འགུལ་སྤེལ་བཞིན་པ་ལྟར་ཁ་ས་རྡུ་ཨར་སེ་ཞེས་པའི་ས་ཁུལ་དུ་ཕྱོགས་གཉིས་དབར་འཁོན་འཁྲུག་བྱུང་སྟེ་མི་གཉིས་བསད་པ་དང་གཞན་མང་པོ་རྨས་སྐྱོན་ཕོག་འདུག

གོར་ཁ་ཇན་མུཀ་ཏི་མོར་ཆ་ཞེས་པས་རྡོ་རྗེ་གླིང་རྫོང་ཁོངས་ས་གནས་ཡོངས་ལ་ཆུ་ཚོད་ཉི་ཤུ་རྩ་བཞིའི་རིང་ལས་མཚམས་བཞག་སྟེ་ངོ་རྒོལ་ལས་འགུལ་སྤེལ་དགོས་པའི་དྲིལ་བསྒྲགས་བྱས་པ་ལྟར་རྡུ་ཨར་སེ་ཞེས་ཇལ་པའེ་གུ་རི་ས་ཁོངས་ཤིག་ཏུ་ས་གནས་དེ་གང་སྐྱེས་པའི་མི་རིགས་ཀྱི་སྲིད་དོན་ཚོགས་པ་དང་མཉམ་དུ་འཁོན་འཁྲུག་བྱུང་བ་ཡིན་པ་རེད། ཉེན་རྟོག་བསྐོར་སྲུང་བས་སྟངས་འཛིན་ཇི་བཞིན་བྱེད་ཐུབ་མེད་སྟབས་མི་མང་སྡོད་ཁང་དང་སྤྱི་ཁྱང་སོགས་བརྒྱ་སྐོར་ཞིག་གཏོར་བཤིག་དང་མེར་བསྲེགས་བཏང་ཡོད་པ་རེད། གོར་ཁ་ཇན་མུཀ་ཏི་མོར་ཆ་ཞེས་པས་རྡོ་གླིང་ཁུལ་དུ་ཆུ་ཚོད་ཉི་ཤུ་རྩ་བཞིའི་རིང་ལས་མཚམ་འཇོག་དགོས་པའི་ངོ་རྒོལ་ལས་འགུལ་སྤེལ་དགོས་དོན་ནི་ཉེ་ལམ་སི་ལི་གུ་རི་གྲོང་ཁྱེར་དུ་གོར་ཁ་ཇན་མུཀ་ཏི་མོར་ཆ་ཞེས་པས་ངོ་རྒོལ་ལས་འགུལ་སྤེལ་སྐབས་བུད་མེད་བདུན་ཅུ་དོན་བརྒྱད་ཙམ་གཞུང་གིས་འཛིན་བཟུང་དོ་དམ་བྱས་པ་རྣམས་གློད་འགྲོལ་གཏང་དགོས་པའི་དགོས་འདུན་བཏོན་ཏེ་ངོ་རྒོལ་ལས་འགུལ་སྤེལ་བ་ཡིན་པ་རེད། བར་ལམ་ནས་གོར་ཁ་ཇན་མུཀ་ཏི་མོར་ཆ་ཞེས་པས་ངོ་རྒོལ་ལས་འགུལ་སྤེལ་སྐབས་རྒྱ་གར་མཀ་སེ་དམར་ཤོག་ཚོགས་པ་ཞེས་པ་ལ་སོགས་པས་སྲིད་དོན་ཚོགས་པ་ཁག་གིས་ཁ་གཏད་བཅོག་གི་ཡོད་སྟབས་དྲག་ཟིང་ཇེ་ཆེར་འགྲོ་བཞིན་པ་རེད༎