བོད་དོན་ཐོག་གྲོས་ཆོད་བཞག་གནང་བར་ཐུགས་རྗེ་ཆེ་ཞུ།

༄༅༎བོད་མི་མང་སྤྱི་འཐུས་ལྷན་ཚོགས་ནས་ཨ་རིའི་གྲོས་ཚོགས་གོང་མའི་ནང་བོད་དོན་ཐོག་དོན་ཚན་དྲུག་ཅན་གྱི་གྲོས་ཆོད་བཞག་གནང་ཐུབ་པར་རྗེས་སུ་ཡི་རང་དང་བཅས་ཐུགས་རྗེ་བཀྲིན་ཆེ་ཞུའི་ཕྱག་བྲིས་ཤིག་ཕུལ་གནང་འདུག
དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་སྤེལ་དོན་ལྟར་ན་ ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌ་ཡེན་ཕའེན་སི་ཀྲའེན་མཆོག་དང་ སྐུ་ཞབས་ཇོ་སེཕ་ལི་སྦར་མེན་མཆོག་རྣམ་གཉིས་ཀྱིས་ཨ་རིའི་གྲོས་ཚོགས་གོང་མའི་ནང་བོད་དོན་སྤྱི་དང་ བྱེ་བྲག་རྒྱ་ནག་གཞུང་གིས་བོད་ནང་གདུག་རྩུབ་མནར་གཅོད་ཀྱི་སྲིད་བྱུས་ལག་བསྟར་བྱེད་བཞིན་པ་དེ་དག་མཚམས་འཇོག་དགོས་པའི་རྒྱབ་སྐྱོར་གནང་རྒྱུར་གྲོས་ཆོད་གྲོས་འཆར་ཞིག་འདོན་གནང་མཛད་པར་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མའར་ཀོ་རུ་སྦི་ཡོ་མཆོག་དང་ ལྕམ་སྐུ་སྦའར་སྦ་ར་སྦོཀ་སར་མཆོག་སྐུ་ཞབས་ཌིཀ་ཌར་སྦིན་མཆོག་སོགས་གྲོས་ཚོགས་གོང་མའི་འཐུས་མི་བཅུ་ཙམ་ནས་གྲོས་འཆར་དེའི་ཐད་རྒྱབ་སྐྱོར་གནང་བར་བརྟེན་དོན་ཚན་དྲུག་ཅན་གྱི་གྲོས་ཆོད་བཞག་་གནང་ཐུབ་པར་བོད་མི་མང་སྤྱི་འཐུས་ལྷན་ཚོགས་ནས་རྗེས་སུ་ཡི་རང་དང་བཅས་ཐུགས་རྗེ་བཀའ་དྲིན་ཆེ་ཞེས་ཞུ་རྒྱུ་དང་ གྲོས་ཆོད་འདིས་རྒྱ་ནག་གིས་བོད་ཐོག་འཛིན་པའི་དྲག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་པ་རྣམས་གསལ་བཏོན་དང་འབྱུང་འགྱུར་བོད་དོན་བདེན་མཐའ་གསལ་ཐབས་བཅས་ལ་ཕན་ཐོགས་ངེས་ཅན་ཞིག་ཡོང་བའི་ང་ཚོས་རེ་བ་ཞུ་བཞིན་པ་དང་ ཁོང་རྣམ་པས་ཐུགས་བརྩེའི་ངང་གཡོ་བ་མེད་པའི་རྒྱབ་སྐྱོར་གནང་བ་དེར་ང་ཚོས་དུས་རྟག་ཏུ་བཀའ་དྲིན་སྙིང་བཅངས་ཞུ་རྒྱུ་ཡིན་ཞེས་འཁོད་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གི་མཚན་ཐོག་ནས་ཕུལ་གནང་ཡོད་པ་རེད་