བཀའ་ཁྲི་མཆོག་ལ་ཡོ་རོབ་གྲོས་ཚོགས་ནས་མགྲོན་འབོད་ཞུས་པ།

༄༅།བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དེང་ཡུ་རོབ་ཡུལ་ཁག་ནང་གཞུང་དོན་ཕྱོགས་ཐོག་མ་དེ་སྐྱོང་བཞིན་པའི་ཐོག་ཕྱི་ཚེས་༢༧ནས་༢༩བར་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་མགྲོན་འབོད་ཞུས་པ་ལྟར། བཀའ་ཁྲི་མཆོག་སྦེལ་ཇེམ་གྱི་རྒྱལ་ས་སྦར་སེལ་སི་རུ་བོད་དོན་ལྷན་ཚོགས་སྐབས་མིང་དོན་མཚུངས་པའི་རང་སྐྱོང་གི་གནས་བབ་ཅེས་པའི་བརྗོད་གཞི་ཐོག་སྐུ་མགྲོན་གཙོ་བོར་གསུང་བཤད་གནང་རྒྱུ་ཡིན་པའི་སྐོར། བཙན་བྱོལ་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་འདུག
བཀའ་ཁྲི་མཆོག་གིས་རྒྱལ་ས་སྦ་ར་སེལ་སི་རུ་ཉིན་གསུམ་གྱི་གཞུང་དོན་མཛད་འཆར་ལྟར་ན་ ཡུ་རོབ་གྲོས་ཚོགས་ཀྱི་ཆབ་སྲིད་མི་སྣ་གཙོ་གྲས་ཁག་གཅིག་དང་ལྷན་མཇལ་འཕྲད་གནང་རྒྱུ་མ་ཟད། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་རྒྱུ་ཡིན་འདུག་ལ། གཞན་ཡང་མཛད་འཆར་འདིའི་སྐབས་བཀའ་ཁྲི་མཆོག་གིས་ཡུ་རོབ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དུ་གསུང་བཤད་གནང་རྒྱུ་དང་། དེ་བཞིན་གསར་འགོད་པ་དང་། གནད་ཡོད་མི་སྣ། ཉམས་ཞིབ་པ་རྒན་གྲས་ཁག་གཅིག་དང་ཡང་མཇལ་འཕྲད་གནང་རྒྱུ་ཡིན་འདུག  ཕྱོགས་མཚུངས་གོང་གསལ་གྱི་ཆིབས་བསྒྱུར་འདིའི་སྐབས་བཀའ་ཁྲི་མཆོག་གིས་ས་གནས་བོད་རིགས་ཚོ་དང་སྦེ་ནེ་ལུཀ་སི་ཞེས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ། བཙན་བྱོལ་བོད་མིའི་སྒྲིག་འཛུགས་ཀྱི་འཛིན་སྐྱོང་དང་འབྲེལ་བའི་ལས་རིམ་དང་ལས་འཆར་ཁག་གི་སྐོར་ངོ་སྤྲོད་གསུང་བཤད་གནང་རྒྱུ་ཡིན་འདུག ཡང་ཕྱི་ཚེས་༢༨ཉིན་སྦ་ར་སེལ་སི་གསར་འགོད་མཐུན་ཚོགས་ཀྱི་མགྲོན་འབོད་ཞུས་པ་ལྟར། བཀའ་ཁྲི་མཆོག་གིས་བོད་ནང་གི་ད་ལྟའི་གནས་སྟངས་དང་གསར་འགོད་པའི་དྲི་བར་ལན་འདེབས་གནང་རྒྱུ་ཡིན་འདུག་པ་བཅས་ཀྱི་གནས་ཚུལ་ཐོན་འདུག།