བོད་རང་བཙན་སློབ་ཕྲུག་ཚོགས་པས་རྒྱ་ནག་རྒྱལ་སྟོན་ལ་ངོ་རྒོལ།

༄༅༎ཨ་རིའི་གྲོང་ཁྱེར་ནིའུ་ཡོག་ནང་རྒྱ་ནག་གི་རྒྱལ་སྟོན་དུས་ཆེན་སྲུང་བརྩི་ཞུས་པའི་མཛད་རྒྱན་གྱི་ཁ་གཏད་དུ་བོད་རང་བཙན་སློབ་ཕྲུག་ཚོགས་པས་ངོ་རྒོལ་གྱི་ལས་འགུལ་ཞིག་སྤེལ་འདུག

དེ་ཡང་ཕ་ཡུལ་དྲ་གནས་སུ་གནས་ཚུལ་ཐོན་པར་གཞིགས་ན་ཁ་ས་དགོང་དྲོ་ཨ་རིའི་གྲོང་ཁྱེར་ནིའུ་ཡོག་གི་ཁང་རྩེགས་མཐོ་ཤོས་ཨེམ་པ་ཡར་སི་ཀྲེདྲ་སྦིལ་དྲིང་ཞེས་པའི་སྟེང་རྒྱ་ནག་གི་རྒྱལ་སྟོན་ཉི་མོ་སྲུང་བརྩི་ཞུ་བའི་སྔ་ནུབ་ཏུ་གློག་དམར་པོ་དང་སེར་པོས་མཚོན་ཁྲ་ཅན་གྱི་མཛེས་རྒྱན་བཟོས་ཏེ་སྤར་བཞག་ནས་གང་ལྟར་རྒྱ་ནག་མི་མང་སྤྱི་མཐུན་རྒྱལ་ཁབ་འགོ་བཙུགས་ནས་ལོ་ངོ་དྲུག་བཅུ་འཁོར་བའི་དུས་ཆེན་སྲུང་བརྩི་ཞུ་བའི་རྣམ་པ་བསྟན་པ་དེར་བོད་མི་ཚོས་ངོ་རྒོལ་བྱས་ཡོད་འདུག

དེ་ཡང་ཁུལ་དེར་ཡོད་པའི་བོད་རང་བཙན་སློབ་ཕྲུག་ཚོགས་པས་ཁང་རྩེགས་དེའི་ཁ་གཏད་དུ་ཡོད་པའི་ཁང་པ་ཐོག་རྩེགས་ཅན་ཞིག་སྟེང་ལ་གློག་འཕྲུལ་གྱི་ཐོག་ནས་བོད་རང་བཙན་ཡིན། རྒྱ་མི་བོད་ནས་ཕྱིར་ཐོན་ཞིག་ཅེས་པའི་བརྗོད་ཚིག་འཁོད་པའི་བརྙན་པར་བརྒྱུད་ལམ་ནས་བསྟན་ཡོད་པས་མ་ཟད་སློབ་ཕྲུག་ཚོགས་པའི་ཚོགས་གཙོ་བཀྲས་མཐོང་ལྷ་སྒྲོན་ལགས་ནས་ཨེམ་པ་ཡར་སི་ཀྲེདྲ་སྦིལ་དྲིང་འམ་ཁང་རྩེགས་དེའི་འཛིན་སྐྱོང་གི་ངོས་ནས་རྒྱ་ནག་ལྟབུའི་སྲིད་དབང་གཅིག་སྡུད་རིང་ལུགས་དང་འགྲོ་བ་མིའི་ཐོབ་ཐང་དང་རང་དབང་ལ་བརྩི་མེད་གཏོང་མཁན་གྱི་རྒྱལ་ཁབ་ཅིག་གི་དུས་ཆེན་སྲུང་བརྩི་ཞུས་པ་དེར་ང་ཚོས་མཐའ་ཅིག་ཏུ་ངོ་རྒོལ་ཡོད་ཅེས་འགྲེལ་བརྗོད་གནང་འདུག ཡང་ནིའུ་ཡོག་གི་གྲོས་ཚོགས་འཐུས་མི་ཨེན་ཐོ་ནི་ལྦེ་ནར་མཆོག་གིས་ཀྱང་འགྲོ་བ་མིའི་ཐོབ་ཐང་ལ་བརྩི་མེད་གཏོང་མཁན་གྱི་ལོ་རྒྱུས་ཡོད་པའི་རྒྱལ་ཁབ་ཅིག་གི་དུས་ཆེན་ལ་གུས་བཏུད་བྱས་པ་དེ་ནི་ནོར་འཁྲུལ་རེད་ཅེས་གསུངས་པ་དང་དེ་བཞིན་ཡུལ་སྐོར་སྤྲོ་འཆམ་པ་ཀེ་ཐིས་གྲོང་ཁྱེར་གྱི་ངོས་ནས་དམར་པོའི་རིང་ལུགས་ཀྱི་རྒྱལ་ཁབ་ཅིག་ལ་ཆེ་བསྟོད་ཞུས་པ་ནི་ཡ་མཚན་པོ་དང་མ་འགྲིགས་པ་ཞིག་རེད་ཅེས་འགྲེལ་བརྗོད་བྱས་འདུག འོན་ཀྱང་ཁང་རྩེགས་དེའི་འཛིན་སྐྱོང་གི་ངོས་ནས་དུས་སྟོན་སྲུང་བརྩི་ཞུས་པ་དེའི་ཐོག་འགྲོ་སོང་གང་ཡང་འགྲོ་གི་མ་རེད་ཅེས་འགྲེལ་བཤད་རྒྱབ་ཡོད་པ་རེད།