རྒྱ་ནག་བྱང་ཕྱོགས་སུ་འཐུང་ཆུའི་དཀའ་ངལ་འཕྲད་བཞིན་པ།

༄༅༎རེས་གཟའ་ཉི་མའི་ཉིན་རྒྱ་ནག་གཞུང་འབྲེལ་ཤིང་ཧཱ་གསར་ཤོག་ཐོག་ལ་གནས་ཚུལ་སྤེལ་བའི་ནང་རྒྱ་ནག་གི་བྱང་ཕྱོགས་དང་བྱང་ཤར་ས་ཁུལ་དུ་ཆར་ཆུ་མི་འབབ་པར་ས་ཞིང་ཐེན་པ་བསྟན་པའི་རྐྱེན་གྱིས་མི་དམངས་ས་ཡ་གཅིག་དང་ཕྱེད་ཀ་འཐུང་ཆུ་མེད་པའི་དཀའ་ངལ་འཕྲད་བཞིན་པར་རྒྱ་ནག་གཞུང་གིས་འཐུང་ཆུ་མཁོ་སྤྲོད་བྱས་པའི་གནས་ཚུལ་སྤེལ་ཡོད་པ་རེད།

དེ་ཡང་རྒྱ་ནག་གི་མངའ་འོག་ཏུ་ཡོད་པའི་ནང་སོག་རང་སྐྱོང་ས་ཁུལ་ཟེར་བ་དང་ཧྲན་ཤི་ཞིང་ཆེན་ལོའོ་ནིང༌།ཅི་ལིན་ཞིང་ཆེན་བཅས་བཞིའི་ནང་གི་མི་དམངས་ས་ཡ་བཞི་ཙམ་ལ་འཐུང་ཆུ་མི་རག་པའི་དཀའ་ཚེགས་ཆེན་པོར་ལྷུང་ཡོད་པ་མ་ཟད་གཞུང་གིས་ས་ཞིང་མུའུ་ས་ཡ་བཞི་ཅུ་ཞེ་བདུན་གྱི་སྟོན་ཐོག་ལ་ཞིང་ཆུ་འདྲེན་ཡོད་ཀྱང་རང་འབྱུང་གནོད་འཚེ་དེའི་ཐོག་ནས་ཁྱོན་ཡོངས་ནས་ས་ཞིང་མུའུ་ས་ཡ་༡༦༨ལ་གནོད་འཚེ་ཕོག་ཡོད་པ་རེད། ཁ་སྔོན་ཕྱི་ཟླ་བདུན་པའི་ཟླ་མཇུག་ནས་ཆར་ཆུ་མི་འབབ་པར་ཐེན་པ་བསྟན་པ་དེ་ནི་རྒྱ་ནག་གི་བྱང་ཕྱོགས་ནས་བྱང་ཤར་ཕྱོགས་ས་ཁུལ་ནང་ཁྱབ་ཆེ་རུ་ཕྱིན་ཡོད་ཅིང་དེའི་འབྱུང་རྐྱེན་ནི་གནམ་གཤིས་ཚ་བ་ཆེན་པོ་བསྟན་པས་ཆར་ཆུ་དུས་ཐོག་ཏུ་མ་འབབ་པ་དང་ཕྲན་བུ་འབབ་ཀྱང་ལོ་ཏོག་དང་ས་ཞིང་ལ་འདེངས་ངེས་མི་འབབ་པ་ལས་བྱུང་བ་ཡིན་པ་འགྲེལ་བརྗོད་བྱེད་ཀྱི་ཡོད་པ་རེད། ཡིན་ནའང་རེས་གཟའ་ཉི་མའི་ཉིན་རྒྱ་ནག་རྒྱལ་ཡོངས་གནམ་གཤིས་བརྟག་དཔྱད་ལས་ཁང་གིས་རྒྱ་ནག་གི་བྱང་ཕྱོགས་ཁུལ་དུ་ཆར་ཤོད་དྲག་པོ་ཞིག་རྒྱབ་རྒྱུའི་སྔོན་བརྡ་བཏང་ཡོད་པ་དང་དེ་ཡས་ཐེན་པའི་དཀའ་ངལ་དང་གནམ་གཤིས་ཚ་བ་ཆེ་བའི་དཀའ་ངལ་སེལ་བར་ཕན་ཐོགས་ཡོང་རྒྱུའི་རེ་བ་བྱེད་ཀྱི་ཡོད་པ་རེད།