དཔལ་འབྱོར་དཀའ་ངལ་འོག་རྒྱ་གར་ནང་འགྲོ་སོང་ཇེ་ཉུང༌།

༄༅༎དཔལ་འབྱོར་ཉམས་རྒུད་འགྲོ་བཞིན་པ་དེས་རྒྱ་གར་ནང་། དུས་ཆེན་གལ་ཆེ་ཁག་སྲུང་བརྩི་ཞུས་པའི་སྐབས་འགྲོ་སོང་གཏོང་རྒྱུར་ཡང་རང་བཞིན་གྱི་དོ་ཕོག་འགྲོ་སྲིད་པའི་ཚོད་རྩིས་བྱེད་ཀྱི་ཡོད་འདུག

རྒྱ་གར་ནང་རིག་གཞུང་དང་ཆོས་ཕྱོགས་ཀྱི་དུས་ཆེན་ཁག་མང་པོ་ཞིག་ཡོད་པའི་ཁོངས་སུ་ཨིད་ཨུལ་ཕི་ཏར་དང་། དི་ཝ་ལི་ཞེས་པའི་དུས་ཆེན་དེ་གཉིས་སྐབས་ཁྲོམ་རའི་ནང་། མོ་དྲ་དང་། གསེར་དང་རྒྱན་ཆ། དེ་བཞིན་འཕྲུལ་ཆས་རིགས་ཚོང་བསྒྱུར་བྱེད་རྒྱུའི་དུས་ཚོད་ཡག་ཤོས་ཤིག་བརྩི་ཡི་ཡོད་པ་མ་ཟད་རྒྱ་གར་མང་ཚོགས་ནས་དུས་ཆེན་དེ་གཉིས་སུ་དམིགས་བསལ་དངོས་ཆས་ཉོ་གི་ཡོད་པ་རེད། ཡིན་ནའང་ལོ་འདིར་དངོས་ཆས་ཚང་མར་རིན་གོང་ཧ་ཅང་ཆེན་པོ་འཕར་བ་དང་།

འབུན་གཡར་གྱི་སྐྱེད་མཐོ་བ་སོགས་ཀྱིས་འགྲོ་སོང་གཏོང་རྒྱུའི་ཐོག་འཛེམས་བཟོན་བྱེད་རྒྱུའི་ཉེན་ཁ་ཡོད་པའི་དཔྱད་ཞིབ་བྱེད་ཀྱི་ཡོད་འདུག དེ་ཡང་དཔལ་འབྱོར་ཉམས་ཞིབ་པ་སི་དར་ཐ་སན་ཡལ་ནས། བཅའ་དངོས་རིན་གོང་ཆེན་པོ་དང་། འབུན་གཡར་གྱི་ཐོག་ནས་ཉོ་དགོས་པའི་དངོས་ཟོག་རིགས་ལ་དོ་ཕོག་ཐེབས་རྒྱུ་ཉེན་ཁ་ཡོད་ལུགས་གསུངས་འདུག ཡང་མོ་ཊ་ཉོ་ཚོང་ཉམས་ཞིབ་པ་ས་བྷ་རཏ་ནས། མང་ཚོགས་ཀྱི་ཡོང་བབས་ཆེ་རུ་འགྲོ་ན་མ་གཏོགས་གནས་སྟངས་ཡག་ཏུ་འགྲོ་རྒྱུ་མིན་ལུགས་འགྲེལ་བརྗོད་བྱེད་པ་སོགས་གང་ལྟར་མོ་ཊ་དང་བཅའ་དངོས་གཞན་ཁག་གི་ཐོག་རིན་གོང་དམིགས་བསལ་གཅོག་ཆ་བྱེད་ཀྱང་དེ་ཙམ་འགྲོ་རྒྱུགས་ཆེན་པོ་ཡོང་བཟོ་མེད་པའི་དཔྱད་ཞིབ་བྱེད་ཡོད་པ་རེད། འོན་ཀྱང་རྒྱུན་གཏན་རྒྱ་གར་ནང་ཆང་སའི་གཉེན་བསྒྲིགས་ཀྱི་དུས་ཚོད་ཕྱི་ཟླ་བཅུ་གཉིས་པའི་ནང་ཡིན་སྟབས་དེའི་སྐབས་གསེར་གྱི་ཚོང་འགྲེམས་ལ་དེ་ཙམ་དོ་ཕོག་འགྲོ་བཟོ་མེད་པ་དང་དེའི་རྒྱུ་མཚན་ནི་གསེར་གྱི་འགྲོ་རྒྱུགས་འཛམ་གླིང་ཁྱོན་ཡོངས་སུ་མ་རྩ་གཙོ་བོ་ཞིག་ལ་ངོས་འཛིན་བྱེད་ཀྱི་ཡོད་པ་དེས་ཡིན་པའི་དགོངས་ཚུལ་གསུངས་ཀྱི་ཡོད་པ་རེད།།