བོད་ནང་ས་ཡོམ་གྱི་གོད་ཆག་ཁྲོད་བོད་མི་༢༥རྐྱེན་འདས་སུ་ཕྱིན་འདུག

བོད་ཀྱི་ནུབ་བརྒྱུད་སྐྱིད་གྲོང་སོགས་སུ་ས་ཡོམ་གྱི་གོད་ཆག་བྱུང་སྐབས། ༢༠༡༥།༤།༢༥

བོད་ཀྱི་ནུབ་བརྒྱུད་སྐྱིད་གྲོང་སོགས་སུ་ས་ཡོམ་གྱི་གོད་ཆག་བྱུང་སྐབས། ༢༠༡༥།༤།༢༥

བོད་ནང་ས་ཡོམ་གྱི་གོད་ཆག་ཁྲོད་ད་བར་མི་གྲངས་༢༥རྐྱེན་འདས་དང་༤གར་སོང་ཆ་མེད་༣༨༣ལ་རྨས་སྐྱོན་ཕོག་འདུག
དེ་ཡང་གནས་ཚུལ་ལྟར་ན། ཟླ་བ་འདིའི་སྤྱི་ཚེས་༢༥ཉིན་བལ་ཡུལ་དུ་ས་ཡོམ་འགུལ་ཚད་བརྒྱད་ལ་ཉེ་བ་ཞིག་བརྒྱབ་པའི་གོད་ཆག་ཁྲོད་བལ་ཡུལ་ནང་ད་བར་མི་གྲངས་༥༢༠༠ཙམ་རྐྱེན་འདས་སུ་ཕྱིན་ཡོད་པ་དང༌། བོད་ཀྱི་ནུབ་བརྒྱུད་མཐའ་མཚམས་ཁུལ་དུ་ཡང་ས་ཡོམ་གྱི་གོད་ཆག་ཁྲོད་ད་བར་ཉུང་མཐར་བོད་མི་མི་གྲངས་༢༥ཙམ་གྲོངས་ཡོད་པ་དང་། བཞི་གར་སོང་ཆ་མེད་ཡིན་པ། མི་གྲངས་༣༨༣ཙམ་ལ་ཚད་གཞི་འདྲ་མིན་གྱི་རྨས་སྐྱོན་ཕོག་པ་སོགས་མདོར་ན་མི་གྲངས་ཁྲི་ཕྲག་ཁ་ཤས་ལ་གོད་ཆགས་བྱུང་ཡོད་པ་རེད། བོད་ཀྱི་ནུབ་བརྒྱུད་སྐྱིད་གྲོང་དང་། གཉའ་ནང་། དིང་རི་བཅས་རྫོང་ཁག་གསུམ་ནང་ཁང་པ་བརྒྱ་ཆ་༨༠ཙམ་བརྡིབས་པ་མ་ཟད། སྐྱིད་གྲོང་རྫོང་གི་གནས་རྙིང་ཆོས་སྡེའི་འདུ་ཁང་གི་རྩེག་གསུམ་པ་ཞིག་རལ་དུ་གྱུར་ཡོད་འདུག བྲག་དཀར་རྟ་སོ་དགོན་དང་། འཕགས་པ་དགོན། སྨོན་མཁར་ལྷ་ཁང་སོགས་ཀྱི་གྱང་ལ་གས་སྲུབས་བྱུང་བ་སོགས་ཁྱོན་དགོན་སྡེ་༥༤ལ་ཚད་མི་འདྲ་བའི་གནོད་འཚེ་ཕོག་འདུག
དེ་བཞིན་བལ་ཡུལ་ནང་ས་ཡོམ་གྱི་གོད་ཆག་ཆེ་ཤོས་བྱུང་བ་སོགས་ལ་གདུང་སེམས་མཉམ་བསྐྱེད་མཚོན་ཆེད་ཁ་ས་བལ་ཡུལ་སྤོག་ར་གློ་སྒྲིག་འཛུགས་དཔལ་འབྱོར་གླིང་ས་གནས་སུ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཐུན་མོང་ནས་མཆོད་འབུལ་སྨོན་ལམ་ཚོགས་གནང་འདུག

གསར་འགོད་པ་ཀླུ་འབུམ་དང་ཚེ་དབང་དངོས་གྲུབ།