དྲིལ་བསྒྲགས་དྲུང་ཆེ་རྒྱ་གར་ནུབ་ཕྱོགས་ཁུལ་དུ་ཕེབས་པ།

དབུ་མའི་ལམ་གྱི་སྲིད་བྱུས་ནི་ཧ་ཅང་བརྟན་པོ་དང་ལམ་བཟང་པོ་ཞིག་ཡིན་པ་དྲིལ་བསྒྲགས་དྲུང་ཆེ་ཡིས་ངོ་སྤྲོད་གནང་འདུག
དེ་ཡང་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གནས་ཚུལ་བཀོད་པར་གཞིགས་ན། འདི་ཟླའི་ཚེས་༤ནས་༨བར་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་རྡ་སའི་ཉེ་འཁོར་བཀྲ་ཤིས་ལྗོངས་དང་། སྦིར་ཅོན་ཏ་ར་བོད་མིའི་གཞིས་ཆགས་ཁུལ་གྱི་དགོན་པ་དང་མང་ཚོགས། སློབ་གྲྭ་བཅས་ལ་༧གོང་ས་མཆོག་གི་བཀའ་དྲིན་རྗེས་དྲན་ཞུ་བ་དང་ཆབས་ཅིག་དབུ་མའི་ལམ་གྱི་གོ་རྟོགས་རྒྱ་ཆེ་སྤེལ་གནང་འདུག དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་གཏམ་བཤད་ནང་། ༧རྒྱལ་བའི་བཀའ་དྲིན་རྗེས་དྲན་ཞུ་སླད་མང་ཚོགས་ལ་སྐུའི་རླབས་ཆེན་གྱི་མཛད་ཁུར་གསུམ་ཡོད་པ་དེ་དག་རིམ་བཞིན་ངོ་སྤྲོད་གནང་འདུག་ཅིང་། དེ་ཡང་དང་པོ་མགོན་པོ་མཆོག་གིས་འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་སྤེལ་བའི་མཛད་འཕྲིན་རྒྱ་ཆེ་བསྐྱངས་གནང་མཛད་དང་མཛད་མུས་དང་། དེས་ཕན་རླབས་བརྗོད་ལས་འདས་པ་བྱུང་ཡོད་པའི་སྐོར་དང་། མཛད་ཁུར་གཉིས་པ་འཛམ་གླིང་སྟེང་གི་ཆོས་ལུགས་ཕན་ཚུན་བར་མཐུན་འབྲེལ་གོང་མཐོར་གཏོང་གནང་མཛད་པའི་མཛད་འཕྲིན་སྐོར་དང་། གསུམ་པ། མགོན་པོ་མཆོག་བོད་མི་ཞིག་ཡིན་པའི་ངོས་ནས་བོད་ཀྱི་རྩ་དོན་ལ་ཐུགས་ཁུར་དང༌། བཙན་འོག་ལ་གནས་པའི་བོད་མི་ཚོའི་རང་དབང་གི་མགྲིན་ཚབ་པ་ཞིག་མཛད་ཡོད་པ་བཅས་ཀྱི་མཛད་ཁུར་རྣམས་ངོ་སྤྲོད་གཏིང་ཟབ་གནང་འདུག དེ་དང་ཕྱོགས་མཚུངས་དྲུང་ཆེ་བཀྲིས་ཕུན་ཚོགས་ལགས་ནས་དབུ་མའི་ལམ་གྱི་སྲིད་བྱུས་ཀྱི་ངོ་སྤྲོད་དང་། དེའི་ངོ་བོ་དང་བྱུང་རིམ། རྒྱབ་ལྗོངས། དབུ་མའི་ལམ་གྱི་སྲིད་བྱུས་ལ་བརྟེན་ནས་བོད་མིའི་མངོན་འདོད་གང་དང་གང་སྒྲུབ་ཐུབ་པ། དབུ་མའི་ལམ་གྱི་སྲིད་བྱུས་ནི། ཧ་ཅང་བརྟན་པོ་ཞིག་དང་ལམ་བཟང་པོ་ཞིག་ཡིན་པ་སོགས་ངོ་སྤྲོད་ཁ་གསལ་གནང་འདུག

གསར་འགོད་པ་དོན་གྲུབ་རྣམ་རྒྱལ།