༸གོང་ས་མཆོག་ཡོ་རོབ་ལ་ཆིབས་བསྒྱུར་གནང་རྒྱུ།

༄༅༎བོད་མིའི་དབུ་ཁྲིད་སྤྱི་ནོར༸གོང་ས་སྐྱབས་མགོན་ཆེན་པོ་མཆོག་རེས་གཟའ་ལྷག་པའི་ཉིན་བཞུགས་སྒར་ནས་ཡོ་རོབ་ཀྱི་རྒྱལ་ཁབ་ཇར་མ་ནི་དང་། དབྱིན་ཡུལ་དང༌། ཕ་རན་ས྄་དང་དེ་བཞིན་ཨ་མི་རི་ཀ་དང་ཨས྄་ཊེ་ལིཡ་བཅས་ནང་ཆིབས་བསྒྱུར་གནང་རྒྱུ་ཡིན་པ་རེད། ༸གོང་ས་སྐྱབས་མགོན་ཆེན་པོ་མཆོག་གི་ཐེངས་འདིར་ཐོག་མར་ ཇར་མ་ནི ་ལ་ཆིབས་བསྒྱུར་གྱིས་བར་ལམ་ཕྱི་ཟླ་གསུམ་པའི་ཚེས་ ༡༠ བོད་མི་རང་དབང་གྱེན་ལངས་ཉིན་མོ་ནས་བོད་ནང་རྒྱ་ནག་གཞུང་ལ་ངོ་རྒོལ་རྔམ་སྟོན་གྱི་ལས་འགུལ་སྤེལ་བར།  རྒྱ་ནག་གཞུང་གིས་དྲག་གནོན་བྱས་ཏེ་ཟླ་བ་གཉིས་འཁོར་བ་བཞིན་ཇར་མ་ནི་ལ་འགྲོ་བ་མིའི་ཐོབ་ཐང་གི་གནད་དོན་སྐོར་ལ་གསུང་བཤད་གནང་རྒྱུའི་མཛད་འཆར་ཡོད་པ་དང་དེ་རྗེས་མུ་མཐུད་ཨ་མི་རི་ཀ་དང་། ཨས྄་ཊེ་ལི་ཡ་དང༌། དབྱིན་ཡུལ་དང༌། ཕ་རན་ས྄་བཅས་ནང་ཆིབས་བསྒྱུར་གནང་རྒྱུའི་མཛད་འཆར་ཡོད་པ་རེད། ཡིན་ནའང་སྐུ་སྒེར་ཡིག་ཚང་གི་མགྲིན་ཚབ་པ་སྟག་ལྷ་བསྟན་འཛིན་ལགས་ཀྱིས།  ད་རེས་༸གོང་ས་མཆོག་ཇར་མ་ནི་ལ་གཟའ་འཁོར་གཅིག་གི་ཆིབས་བསྒྱུར་རིང་། ཇར་མ་ནི་སྲིད་བློན་ལྕམ་ ཨེན་ཇི་ལྰ་ མར་ཀེལ་ མཆོག་ལེ་ཊེན་ཨ་མི་རི་ཀའི་ནང་འཚམས་འདྲིར་ཕེབས་ཀྱི་ཡོད་པའི་དུས་ཚོད་འཁེལ་ཡོད་པར་བརྟེན་ནས། ཇར་མ་ནི་ཕྱི་སྲིད་བློན་ཆེན་ ཕེ་རེན་ཀ་ ཝལ་ཊར་ སེན་མི་ཡར་གྱིས་༸གོང་ས་སྐྱབས་མགོན་ཆེན་པོ་མཆོག་མཇལ་འཕྲད་ཞུ་རྒྱུའི་འཆར་གཞི་མེད་པ་དང་། འོན་ཀྱང་ཇར་མ་ནིའི་གྲོས་ཚོགས་ཀྱི་ཚོགས་གཙོ་སྐུ་ཞབས་ ནོར་བྷཊ་ ལམ་མརྚ དང་མངའ་སྡེའི་བློན་ཆེན་ཁག་ཅིག་གིས་མཇལ་འཕྲད་ཞུ་རྒྱུ་ཡིན་པ་གསུངས་ཡོད་པ་རེད། ༸གོང་ས་མཆོག་ན་ནིང་ཕྱི་ཟླ་དགུ་པའི་ནང་ ཇར་མ་ནི་ལ་ཆིབས་བསྒྱུར་བསྐྱངས་བའི་སྐབས་ཇར་མ་ནི་སྲིད་བློན་ལྕམ་ ཨེན་ཇི་ལཱ་ མར་ཀེལ་

མཆོག་གིས་མཇལ་འཕྲད་ཞུས་པར་བརྟེན། རྒྱ་ནག་དང་ཇར་མ་ནི་བར་གྱི་འབྲེལ་ལམ་ཡང་ཇེ་སྡུག་ཏུ་ཕྱིན་ཡོད་ཀྱང་། ཇར་མ་ནི་གཞུང་གིས་བོད་ཐོག་རྒྱབ་

སྐྱོར་ཆེན་པོ་ཡོད་པ་མ་ཟད། བར་ལམ་བོད་ནང་དོན་རྐྱེན་འཕྲད་པའི་སྐབས་རྒྱ་ནག་གཞུང་ལ་༸གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་གྲོས་མོལ་ཞུ་དགོས་པའི་གནོན་ཤུགས་སྤྲད་པ་དང་། ད་རེས་༸གོང་ས་མཆོག་གི་དམིགས་བསལ་སྐུ་ཚབ་རྒྱ་ནག་ཏུ་ཕེབས་ཏེ་ད་ལྟའི་བོད་ནང་གི་ཛ་དྲག་གི་གནས་སྟངས་མཚམས་འཇོག་ཡོང་

ཐབས་ཀྱི་འབད་བརྩོན་གནང་བ་དེར་དགའ་བསུ་ཞུས་ཡོད་པ་རེད༎