༧གོང་ས་མཆོག་བཞུགས་སྒར་དུ་ཞབས་སོར་འཁོད་པ།

༄༅།    །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཕྱི་ལོ་གསར་པའི་མཛད་འཕྲིན་ཐོག་མ་དེ་ནི།    ཕྱི་ཟླ་༡ཚེས་༣ཉིན་ བི་ཧར་མངའ་སྡེའི་སྐུ་མགྲོན་ཐོག་སྟོན་པའི་སྐུ་བརྙན་ལ་རབ་གནས་དང་རྒྱལ་སྤྱིའི་ནང་པའི་ཚོགས་ཆེན་དུ་ཆིབས་བསྒྱུར་གྱིས་བཀའ་སློབ་བསྩལ་གནང་ཡོད་ཅིང་།  དེ་རྗེས་ཕྱི་ཚེས་༦ནས་༡༢བར་གནས་མཆོག་ཝཱ་རཱ་ཎ་སཱིར་སྤྱོད་འཇུག་གི་ཆོས་འབྲེལ་དང་བཀའ་སློབ་སོགས་ཀྱི་མཛད་འཕྲིན་བསྐྱངས་ཡོད་པ་རེད།   དེ་ནས་ཕྱི་ཚེས་༡༧ནས་དུས་ཡུན་བཞུགས་ཞག་དྲུག་རིང་༧གོང་ས་མཆོག་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་རྟེན་གཞི་བྱས་པའི་དཔལ་ལྡན་འབྲས་སྤུངས་བླ་སྤྱིའི་འདུ་ཁང་ནང་སེམས་དང་སྲོག་གི་བགྲོ་གླེང་ཐེངས་༢༦པའི་ཐོག་དབུ་བཞུགས་ཀྱིས་བགྲོ་གླེང་མཛད་ཡོད་པ་དང་།  ཕྱི་ཚེས་༢༣ཉིན་༧གོང་ས་མཆོག་གིས་རྒྱ་གར་གྱི་ཚོང་འབྲེལ་གྲོང་ཁྱེར་མུམ་བཡ་ནང་རྟེན་གཞི་བྱས་པའི་སེན་ཛེ་ཝིར་ཞེས་པའི་ཡི་ཤུའི་གཙུག་ལག་སློབ་གྲྭ་ཆེན་མོའི་ནང་བཀའ་སློབ་དང་།  ཕྱི ཚེས་༢༤ཉིན་རྒྱ་གར་རཱ་ཇེ་སྠན་མངའ་སྡེའི་གྲོང་ཁྱེར་ཇཡ་པུར་ནང་རྩོམ་རིག་སྒྱུ་རྩལ་གྱི་དུས་སྟོན་མཛད་སྒོར་ཆིབས་བསྒྱུར་བསྐྱངས་ཏེ་ བཀའ་སློབ་བསྩལ་གནང་མཛད་ཡོད་པ་རེད།    ༧གོང་ས་མཆོག་ནས་ཟླ་བ་འདིའི་ནང་བསྐྱངས་པའི་ཉིན་གྲངས་༢༣ཙམ་གྱི་མཛད་འཕྲིན་ཁག་ལེགས་པར་གྲུབ་སྟེ། ཕྱི་ཟླ་༡ཚེས་༢༥ཉིན་ཇཡ་པུར་ནས་ཕེབས་ཐོན་གྱིས་སྔ་དྲོའི་ཚོུད་༩པ་ཙམ་ལ་ག་གལ་གནམ་ཐང་དུ་༧ཞབས་སོར་འཁོད་ཡོད་པ་རེད།    སྐབས་དེར་ སྲིད་སྐྱོང་མཆོག་གིས་དབུས་བདེ་སྲུང་བཀའ་བློན་དང་། བོད་མི་མང་སྤྱི་འཐུས་རྣམ་པའི་སྐུ་ཚབ་སོགས་ཀྱིས་ཕེབས་བསུ་ཞུས་གནང་འདུག   དེ་རྗེས་བཞུགས་སྒར་དུ་ཆིབས་བསྒྱུར་བསྐྱངས་སྐབས་ གངས་སྐྱིད་དང་རྡ་སའི་མི་མང་གིས་གཙོས་དད་ལྡན་པ་རྣམས་ནས་ལག་དུ་མཇལ་དར་ཐོགས་ཏེཕེབས་བསུ་གཟབ་རྒྱས་ངང་། ༧གོང་ས་༧སྐྱབས་མགོན་ཆེན་པོ་མཆོག་བཞུགས་སྒར་དུ་ཞབས་སོར་བདེ་བར་འཁོད་གནང་མཛད་འདུག།