༸གོང་ས་མཆོག་གིས། ཧི་མ་ཅལ་ཁུལ་དུ་སླར་ཡང་ཆར་ཞོད་ཀྱི་གོད་ཆག་བྱུང་བར་ཐུགས་གསོ་མཛད་པ།

འདི་ཚེས་ ༡༥ ཉིན་ལ་དྭགས་ཞི་བའི་ཚལ་ཕོ་བྲང་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གི་མཚན་ཐོག་ལ་གསུང་འཕྲིན་ཞིག་སྩལ་བའི་ནང་། འདས་པའི་ཉིན་ཤས་ནང་ཧི་མ་ཅལ་ཁུལ་དུ་ཆར་ཞོད་ཆེ་བའི་རྐྱེན་གྱིས་ཡུལ་མི་ ༥༠ ལྷག་རྐྱེན་འདས་སོང་བར་མགོན་པོ་གང་ཉིད་མཆོག་ཐུགས་ཕམ་བྱུང་ཞེས་བཀའ་སྩལ་འདུག

ཡང་༸གོང་ས་མཆོག་གི་གསུང་འཕྲིན་ནང་། ངོས་ཀྱིས་ཐེངས་འགའ་ཞུས་པ་བཞིན་ཧི་མ་ཅལ་མངའ་སྡེ་ནི་ངོས་ཀྱི་ཁྱིམ་ལྟ་བུ་ཆགས་ཡོད་པས། ཡུལ་འདིའི་ཡུལ་མི་རྣམས་ལ་རང་བཞིན་གྱིས་སེམས་ཚོར་ཡོད། ཅེས་དང་། ངོས་ནས་རང་བྱུང་གོད་ཆག་གི་རྐྱེན་པས་རྐྱེན་འདས་སོང་བའི་གཅེན་གཅུང་རྣམས་དང་། དེ་བཞིན་གོད་ཆག་ཕོག་པ་རྣམས་ལ་ཐུགས་སྨོན་ཡོད་ཅེས་བཀའ་སྩལ་འདུག

 ཐེངས་འདིའི་རང་བྱུང་གོད་ཆག་ལ་རྒྱབ་སྐྱོར་མཚོན་ཆེད། ཏཱ་ལའི་བླ་མའི་ཐེབས་རྩ་ནས་ངལ་སེལ་རོགས་དངུལ་འབུལ་རྒྱུ་ཡིན་ཞེས་བཀའ་སྩལ་ཡོད་སྐོར་དགའ་ལྡན་ཕོ་བྲང་གི་དྲུང་ཆེ་ཆོས་སྐྱབས་པ་འཆི་མེད་རིག་འཛིན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་། 

དེ་སྔོན་ཕྱི་ཟླ་ ༧ པའི་ཚེས་ ༡༢ ཉིན་༸གོང་ས་མཆོག་གིས་ཧི་མ་ཅལ་ཁུལ་དུ་ས་རུད་དང་ཆུ་ལོག་གི་རྐྱེན་པས་ཁྱོན་མི་གྲངས་ ༣༠ ཙམ་གྱི་ཚེ་སྲོག་ཤོར་བ་རྣམས་ལ་ཐུགས་སྨོན་སྩལ་ཡོད་ཅིང་། ཐེངས་འདིའི་ཆར་ཞོད་ཀྱི་རྐྱེན་པས་ཧི་མ་ཅལ་ཁུལ་དུ་སླར་ཡང་མི་གྲངས་ ༥༥ ལྷག་འདས་གྲོངས་སུ་གྱུར་ཡོད་པ་རེད། གཞི་རྩའི་རྒྱ་གར་གནམ་གཤིས་ལྷན་ཁང་ནས་འདི་ཚེས་ ༡༤ ཉིན་ཧི་མ་ཅལ་ཁུལ་དུ་ཆར་ཞོད་ཆེ་བའི་ཉེན་བརྡ་དམར་པོ་དེ་བཏང་ཡོད་པར་མ་ཟད། འདི་ཚེས་ ༢༠ ཉིན་ལའང་ཆར་ཞོད་ཆེ་བའི་ཉེན་བརྡ་ཡོད་སྐོར་བསྒྲགས་འདུག

གསར་འགོད་པ། ཡེ་ཤེས་ཟླ་བ།
རྩོམ་སྒྲིག་པ། ཡེ་ཤེས་ཟླ་བ།
དྲྭ་ཐོག་སྤེལ་མཁན། ཡེ་ཤེས་ཟླ་བ།