རྒྱ་ནག་གི་འགོ་ཁྲིད་ཚོའི་བསམ་བློའི་འཁྱེར་སོར་ཞན་ཆ་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ལྟ་བ་མཁྲེགས་བཟུང་གི་ལངས་ཕྱོགས་བཟུང་མཁན་རྒྱ་ནག་གི་འགོ་ཁྲིད་ཚོའི་བསམ་བློའི་འཁྱེར་སོར་ཞན་ཆ་ཞིག་ཡོད་པ་གསུངས་འདུག
དེ་ཡང་ཨ་མི་རི་ཀའི་HBOབརྙན་འཕྲིན་དགོད་བྲོའི་ལས་རིམ་མདོ་འཛིན་པ་སྐུ་ཞབས་(John Oliver)བདུན་ཕྲག་སྔོན་མའི་ནང་བཞུགས་སྒར་རྡ་རམ་ས་ལར་ཆེད་བཅར་གྱིས། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་མ་འོངས་༧གོང་ས་མཆོག་གི་ཡང་སྲིད་དང་འབྲེལ་བའི་སྐོར་སོགས་བཀའ་འདྲི་འདྲ་མིན་ཞུས་སྐབས། ༧གོང་ས་སྐྱབས་མགོན་ཆེན་པོ་མཆོག་གིས་གཅིག་བྱས་ན་ད་རེས་ཀྱི་ཏཱ་ལའི་བླ་མ་མཐའ་མ་དེ་ཡིན་སྲིད་ཀྱི་རེད། དེ་ལྟར་ཡོང་སྲིད་པ་རེད། གལ་ཏེ་ང་ཏཱ་ལའི་བླ་མ་མཐའ་མ་དེ་ཆགས་པ་ཡིན་ན་ཧ་ཅང་གི་དགའ་པོ་ཡོད་ཅེས་བཀའ་ལན་གནང་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དུས་རྟག་ཏུ་གཉིས་ཕན་དབུ་མའི་ལམ་གྱི་ཐོག་ནས་བོད་ཀྱི་བདེན་མཐའ་སེལ་རྒྱུར་འབད་བརྩོན་གནང་བཞིན་ཡོད་ཀྱང་། རྒྱ་ནག་གཞུང་གིས་དུས་རྟག་ཏུ་༧གོང་ས་སྐྱབས་མགོན་ཆེན་པོ་མཆོག་ནི་ཁ་བྲལ་རིང་ལུགས་པ་ཞིག་ཡིན་པར་ངོས་འཛིན་བྱེད་ཀྱི་ཡོད་པ་རེད། རྒྱ་ནག་གཞུང་གིས་དུས་རྟག་ཏུ་དེ་ལྟར་བརྗོད་དགོས་དོན་ལ་སོགས་པའི་གནད་དོན་ཞིག་ནི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ཆགས་ཀྱི་ཡོད་པ་རེད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་གིས་ཚོར་བ་རྣོ་པོའི་སྒོ་ནས་ཐེ་བྱུས་བྱེད་བཞིན་ཡོད་པ་རེད་ལ་དེ་ཡང་རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ཕེབས་དགོས་ཀྱི་རེད་ལ་ཡང་སྲིད་དེ་ཡང་རྒྱ་ནག་གཞུང་གིས་ངོས་ལེན་ཐུབ་པའི་ཡང་སྲིད་ཅིག་དགོས་ཀྱི་རེད་ཅེས་བརྗོད་བཞིན་ཡོད་པ་རེད།

གསར་འགོད་པ་དབྱངས་སྒྲོལ།
༧གོང་ས་མཆོག་ལ་བཀའ་འདྲི་ཞུས་བའི་ལས་རིམ་ཆ་ཚང་གཤམ་གྱི་དྲ་ཐག་ནས་གཟིགས་ཐུབ།