༸གོང་ས་མཆོག་ནས་རྒྱ་སྒོར་འབུམ་བཅུ་ཞལ་འདེབས།

༄༅༎སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། ཕྱི་ཟླ་དགུ་པའི་ཚེས་༢༩ ཉིན་བསྩལ་གནང་བའི་ཐུགས་གསོའི་གསུང་འཕྲིན་ནང༌། ད་བར་དུ་ཨོ་རི་ས་ མངའ་སྡེའི་ནང་བྱུང་མྱོང་མེད་པའི་ཆུ་ལོག་གི་གནོད་འཚེ་ཚབས་ཆེན་པོ་བྱུང་བ་དེར་ཧ་ཅང་གི་བློ་ཕམ་བྱུང༌། ལྷག་པར་དུ་རང་འབྱུང་གནོད་འཚེ་དེ་རྐྱེན་པས། མངའ་སྡེ་དེའི་མི་མང་པོ་ཞིག་འདས་གྲོངས་སུ་ཕྱིན་པ་དང། རྒྱུ་ནོར་གྱོང་གུད། མི་དམངས་ས་ཡ་མང་པོ་གནོད་འཚེ་སྡུག་པོ་བྱུང་ཡོད་པ་དེར་བློ་ཕམ་བྱུང། ངོས་ནས་གནོད་འཚེ་དེའི་ནང་གོད་ཆགས་ཕོག་པའི་མི་དམངས་ཚོར་སེམས་གསོ་དང་གདུང་སེམས་མཉམ་བསྐྱེད་ཡོད། ངོས་ནས་གོད་ཆགས་ཕོག་པ་ཚོར་ངལ་སེལ་ཆེད་ཏྰ་ལའི་བླ་མའི་ཐེབས་རྩའི་མཚན་ཐོག་ནས་རྒྱ་གར་གྱི་སྒོར་མོ་འབུམ་༡༠ ཡི་རོགས་རམ་གྱི་ཞལ་འདེབས་ཕུལ་རྒྱུ་ཡོད་ཅེས་བཀོད་གནང་ཡོད་འདུག
ཨོ་རི་ས་ མངའ་སྡེ་གཞུང་གིས་གསུངས་ན། མངའ་སྡེའི་དེའི་རྫོང་ཁག་༣༠འི་ནང་ནས་རྫོང་ཁག་༢༠འི་ནང་ཆུ་ལོག་གི་གནོད་འཚེ་བྱུང་ཡོད་པ་མ་ཟད། མི་གྲངས་༤༠ རྐྱེན་ལམ་དུ་ཕྱིན་པ་དང༌། ལོ་ཏོག་དང་སྡོད་ཁྱིམ་གནོད་འཚེ་ཕྱིན་པ་ཁྱོན་རྒྱ་གར་གྱི་སྒོར་མོ་ས་ཡ་ཉིས་བརྒྱ་ལྷག་གི་གྱོང་གུད་བྱུང་ཡོད་པའི་སྐོར་གསུངས་ཡོད་པ་རེད། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དེ་སྔ་ཨོ་རི་ས་ མངའ་སྡེའི་ནང་ཆིབས་བསྒྱུར་བསྐྱངས་གནང་ཡོད་པའི་ནང༌ནས་། ཉེ་ཆར་༢༠༡༠ ལོར་བསྐྱར་དུ་ཆིབས་བསྒྱུར་བསྐྱང་སྟེ། ཆོས་འབྲེལ་དང་ནང་པའི་དགོན་པ་དབུ་འབྱེད་མཛད་པ་དང༌། ཨོ་རི་ས་ མངའ་སྡེ་དེའི་ནང་གི་ཕུན་ཚོགས་གླིང་ཞེས་པའི་བོད་པའི་གཞིས་ཆགས་ཤིག་ཡོད་པ་དེ་ནི། བཙན་བྱོལ་སྤྱི་ཚོགས་ནང་ནས་བོད་མི་ཕོན་ཆེ་གནས་སྡོད་བྱེད་ཡུལ་གྱི་གཞིས་ཆགས་གྲས་ཤིག་ཡིན་པ་དང༌། དེའི་ནང་དུ་ཁྱོན་བོད་མི་བརྒྱ་ཕྲག་འགའ་ཤས་ཡོད་པ་རེད།།