ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་༢༨འཁོར་བའི་དུས་དྲན།

༄༅༎ཕྱི་ཟླ་༡༢ ཚེས་༡༠ རེས་གཟའ་ཉི་མའི་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་། ༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ཧྲིལ་པོ་ ༢༨ འཁོར་བའི་དུས་དྲན་ཉིན་མོ་ཡིན་པས།  དྷ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་དུ་གཞུང་འབྲེལ་གྱིས་དུས་དྲན་སྲུང་བརྩི་ཞུས་ཡོད་པ་རེད།མཛད་སྒོའི་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་གཞུང་འཛིན་ཚོགས་པའི་ BJP འཐུས་མི་སྐུ་ཞབས་རཱམ་སྭ་རུབ་ཤར་མ་ Ram Swaroop Sharma ཕེབས་ཡོད་པ་རེད།
དེ་ནས་ཧིན་བོད་མཛའ་འབྲེལ་ཚོགས་པའི་སློབ་སྟོན་པ་སྐུ་ཞབས་རཱམ་སྭ་རུབ་ Ram Swaroop དང་དབུས་བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་གྱིས་བཀའ་ཤག་གི་གསུང་བཤད་དང་། བཀའ་ཤག་གི་གཏམ་བཤད་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འཛམ་གླིང་ཞི་བདེ་དང་སྐྱེ་འགྲོ་ཀུན་ལ་བདེ་སྐྱིད་བསྐྲུན་ཕྱིར། སྐུ་ཚེའི་ཐུགས་བསྐྱེད་དམ་བཅའ་ཇི་ལྟར་མཛད་པ་ལྟར་སྐུ་ངལ་ལ་མ་འཛེམས་པར་འཛམ་གླིང་གི་ཡུལ་གྲུ་དུ་མར་༸ཞབས་ཀྱིས་བཅགས་ཏེ་འགྲོ་བ་མིའི་བཟང་སྤྱོད་གོང་འཕེལ་གཏོང་ཆེད་ཆོས་ལུགས་ལ་མ་བརྟེན་པའི་བྱམས་པ་དང་། སྙིང་རྗེ། བཟོད་སྲན། གཞན་ཕན། ལྷག་བསམ་སོགས་རང་རྒྱུད་ལ་འཇགས་ཐབས། དེ་ཡང་གཙོ་བོར་མི་མང་དཀྱུས་མ་དང་། ལྷག་པར་གཞི་རིམ་དང་མཐོ་རིམ་སློབ་གྲྭར་འགྲིམ་བཞིན་པའི་མི་རབས་གསར་པའམ་གཞོན་སྐྱེས་ཚོ་དམིགས་བསལ་གལ་ཆེར་བརྩི་གནང་གིས་བཟང་སྤྱོད་དེ་དག་སྤྱི་ཚོགས་ཁྱོན་ཡོངས་ལ་སློབ་སྤེལ་ཡོང་ཆེད་དང་། དེ་བཞིན་རྡུལ་ཕྲན་མཚོན་ཆ་དང་དམག་འཁྲུག་མེད་པའི་འཛམ་གླིང་ཞི་བདེ་དང་། འགྲོ་བ་མིའི་སྤྱི་ཚོགས་བྱམས་བརྩེ་ལྡན་པ་ཞིག་བསྐྲུན་རྒྱུར་འབད་བརྩོན་དང་ཐུགས་ཁུར་ཧ་ཅང་ཆེན་པོ་མཛད་བཞིན་པ་ནི་ཀུན་གྱི་བསྔགས་འོས་སུ་གྱུར་བའི་རླབས་ཆེན་གྱི་མཛད་འཕྲིན་ཞིག་ཡིན་ཞེས་༸གོང་ས་མཆོག་གི་མཛད་འཕྲིན་ཆེ་ཁག་འཁོད་ཡོད་པ་རེད།།
གསར་འགོད་པ་ཕྲེང་རིང་བསྟན་འཛིན་ནོར་བུ།