བོད་གཞུང་ཆོས་རིག་ལས་ཁུངས་ནས་གསར་འགོད་གསལ་བསྒྲཌ།

༄༅༎ད་རང་སྔ་དྲོ་ཆུ་ཚོད་༡༠ཐོག་རྡ་ས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་ནང་གི་གསར་འགོད་པ་༢༥ཙམ་འདུ་འཛོམས་ཐོག་བཙན་བྱོལ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་ཉེ་ལམ་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས། ཞེས་པའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཀའ་ཡིག་ཨང་བརྒྱད་པ་ཞེས་འབོད་པ་དེར་བཙན་བྱོལ་བོད་གཞུང་ཆོས་རིག་ལས་ཁུངས་དང་བོད་ཀྱི་བསྟན་བདག་བླ་ཆེན་མཐུན་མོང་ནས་ངོས་ལེན་མེད་པའི་གསར་འགོད་གསལ་བསྒྲགས་ཤིག་སྤེལ་གནང་བཞག། 

གསར་འགོད་གསལ་བསྒྲགས་དེའི་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སུ་”ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་ཆོས་དད་ཀྱི་རང་དབང་ཡོད། རྒྱལ་ཁབ་ཀྱི་ལས་ཁུངས་དང། སྤྱི་ཚོགས་ཀྱི་ཚོགས་པ། མི་སྒེར་བཅས་གང་ཡིན་རུང་བཙན་ཤེད་ཀྱིས་སྤྱི་དམངས་ལ་ཆོས་ལ་དད་མོས་བྱེད་དུ་འཇུག་པའམ་ཆོས་ལ་དད་མོས་བྱེད་དུ་མི་འཇུག་པ་བྱས་མི་ཆོག ཆོས་ལ་དད་པ་ཡོད་པའི་སྤྱི་དམངས་དང་ཆོས་ལ་དད་པ་མེད་པའི་སྤྱི་དམངས་སུ་ལའང་མཐོང་ཆུང་བྱེད་མི་ཆོག རྒྱལ་ཁབ་ཀྱི་ཆོས་ལུགས་ཀྱི་རྒྱུན་ལྡན་བྱེད་སྒོ་སྲུང་སྐྱོང་བྱེད་རྒྱུ། མི་སུ་ཡིན་རུང་ཆོས་ལུགས་ལ་བརྟེན་ནས་སྤྱི་ཚོགས་ཀྱི་སྒྲིག་ལམ་གཏོར་བཤིག་གཏོང་བ་དང། སྤྱི་དམངས་ཀྱི་ལུས་ཁམས་བདེ་ཐང་ལ་གནོད་འཚེ་གཏོང་བ། རྒྱལ་ཁབ་ཀྱི་སློབ་གསོའི་ལམ་ལུགས་ལ་འགོག་རྐྱེན་བཟོ་བ་བཅས་ཀྱི་བྱ་བ་བྱེད་མི་ཆོག
ཆོས་ལུགས་ཀྱི་ཚོགས་པ་དང་ཆོས་ལུགས་ཀྱི་ལས་དོན་ཐད་ཕྱི་རྒྱལ་གྱི་སྟོབས་ཤུགས་ཀྱི་བཀོད་པར་ཉན་མི་དགོས།” ཞེས་གསལ་ཡང། ཉེ་ཆར་ ༢༠༡༠ཟླ་༩ཚེས་༣༠ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆོས་དོན་ལས་ཁུངས་ཀྱིས་བཀའ་ཡིག་ཨང་༨ཟེར་བའི་འོག་“བོད་བརྒྱུད་ནང་བསྟན་གྱི་དགོན་པའི་དོ་དམ་བྱེད་ཐབས།” ཞེས་པའི་ཡིག་ཆ་ཞིག་ཁྱབ་སྤེལ་བྱས་ཏེ། འདི་ལོ་ཕྱི་ཟླ་༡༡ཚེས་༡ནས་ལག་བསྟར་བྱེད་རྒྱུ་ཡིན་ཚུལ་འཁོད་འདུག་པ་ དེ་ནི་གོང་དུ་དྲངས་པའི་རྩ་ཁྲིམས་ཀྱི་ཆ་རྐྱེན་དང་རྩ་འགལ་ཡིན་པ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཡུལ་མི་རྣམས་ལ་ཆོས་དད་རང་དབང་གཏན་ནས་མེད་པ་དང། རྒྱ་ནག་ནང་ཁྲིམས་ཀྱི་དབང་སྒྱུར་མེད་པར་གང་ཟག་གི་དབང་སྒྱུར་ཡིན་པའི་གནད་དོན་གསལ་སྟོན་བྱས་འདུག
བོད་བརྒྱུད་ནང་བསྟན་སྤྱི་དང་བྱེ་བྲག་ཆོས་བརྒྱུད་སོ་སོའི་དབུ་ཁྲིད་བླ་ཆེན་དང། མཁས་དབང་རྣམ་པ་བོད་ཀྱི་ཕྱི་ལ་བཙན་བྱོལ་དུ་བཞུགས་བཞིན་པ་ཡིན་ཞིང། ཆོས་ཕྱོགས་ཀྱི་ལམ་སྟོན་དང། དཔེ་ཁྲིད། དབང་ལུང་མན་ངག་གི་བརྒྱུད་པ་སོགས་བཙན་བྱོལ་དུ་བོད་མིའི་ཁྲོད་དུ་ཡོད་པ་རྣམས་”བྱ་ཐབས་”འདིའི་ལྐོག་གཡོའི་འོག་བོད་དུ་བཀག་སྡོམ་བྱ་རྒྱུར་དམིགས་པ་ཞིག་དང། དགོན་སྡེ་སོ་སོའི་ཆོས་ཕྱོགས་ཀྱི་གལ་ཆེའི་བྱེད་སྒོ་ཁག་བྱེད་མི་ཐུབ་པའམ། བྱ་ཐབས་ཧ་ཅང་ཁག་པོ་བཟོས་ཏེ་བོད་བརྒྱུད་ནང་བསྟན་གྱི་སྲོལ་རྒྱུན་དང་སློབ་གསོ་རྩ་མེད་གཏོང་རྒྱུ་མ་ཟད། བོད་བརྒྱུད་ནང་ཆོས་ཀྱི་སྙིང་དོན་བླ་སློབ་ཀྱི་འབྲེལ་བ་ཡང་བཅད་དེ་དགོན་སྡེ་ཁག་དང་ཆོས་རྒྱུན་རྩ་མེད་བཟོ་རྒྱུའི་ཐབས་ལམ་ཉག་ཅིག་ཡིན་པར་བརྟེན། “བྱེད་ཐབས་”འདི་ལ་གཞིས་བྱེས་བོད་བརྒྱུད་ནང་བསྟན་གྱི་བསྟན་བདག་བླ་ཆེན་ཁག་དང། དགོན་སྡེ་ཁག་གི་མཁན་སློབ། འདུས་མང། མང་ཚོགས་བཅས་ནས་ངོས་ལེན་རྩ་བ་ནས་མེད་ཅེས་ མཐའ་གཅིག་ཏུ་ངོ་རྒོལ་གྱི་ཡོངས་ཁྱབ་གསལ་བསྒྲགས་སུ་བསྟན་བདག་བླ་ཆེན་ཁག་དང། བཙན་བྱོལ་བོད་གཞུང་ཆོས་རིག་ལས་ཁུངས་ཐུན་མོང་ནས་དེ་རིང་གསལ་བསྒྲགས་དེ་སྤེལ་གནང་བཞག།