རྒྱ་གར་དུ་ཞིང་པར་གུན་གསབ་སྤྲོད་རྒྱུར་རྒྱབ་སྐྱོར།

༄༅༎རྒྱ་གར་གྱི་ཀོང་རེ་སེ་ཚོགས་པའི་ངོས་ནས་ཞིང་པ་ཚོའི་ས་ཞིང་ཐོབ་ཐང་ཐོག་བཅོས་བསྒྱུར་གྱིས་གུན་གསབ་ཆེ་ཙམ་སྤྲོད་རྒྱུར་རྒྱབ་སྐྱོར་གནང་ཡོད་འདུག

དེ་ཡང་ད་ལྟའི་གཞུང་འཛིན་ཀོང་རེ་སེ་ཨ་ཡི་ཚོགས་པའི་གཙོ་འཛིན་ལྕམ་སོ་ནི་ཡ་གན་རྡི་མཆོག་གིས་དེ་རིང་རྒྱལ་ས་ལྡི་ལིའི་ནང་གསུངས་བཤད་གནང་བའི་ནང་། ཞིང་པ་ཚོར་ས་ཞིང་འདེབས་ལས་བྱེད་ཡུལ་གྱི་ས་ཆའི་ཐོག་འཛུགས་སྐྲུན་གྱི་ལས་འཆར་གསར་གཏོད་བྱེད་པའི་སྐབས་ས་ཆ་དེ་དག་གི་སྟེང་སྟོན་ཐོག་ཐོན་སྐྱེད་ཡག་པོ་ཡོང་གི་ཡོད་པའི་ས་ཆ་ཞིག་ཡིན་ན་དེར་གཞིགས་ནས་འཛུགས་སྐྲུན་ལས་གཞི་གསར་གཏོད་བྱེད་དགོས་མིན་ཞིབ་འཇུག་ཡག་པོ་བྱེད་དགོས་ཀྱི་རེད།

གང་ཡིན་ཟེར་ན་སྟོན་ཐོག་ཐོན་སྐྱེད་ཡག་པོ་ཡོང་ས་ཞིག་གི་ས་ཆ་དེ་བཟའ་འབྲུའི་ཐོན་ཁུངས་དགོས་ངེས་ཤིག་ཆགས་ཀྱི་ཡོད་རེད། གལ་སྲིད་ས་ཞིང་འདེབས་ཡུལ་གྱི་ས་ཆ་རིགས་ལ་འཛུགས་སྐྲུན་བྱེད་དགོས་ཀྱི་ཡོད་པ་ཡིན་ན། དེར་གཞིགས་པས་ཞིང་པ་ཚོར་གནས་སྤོས་བྱེད་ཡུལ་དང་། གུན་གསབ་སྤྲོད་རྒྱུ་སོགས་ལྡེང་ངེས་དང་། དགོས་ངེས་ཤིག་ངེས་པར་དུ་སྤྲོད་དགོས་ཀྱི་རེད་ཅེས་གསུངས་ཡོད་འདུག

ཉེ་ཆར་ཀོང་རེ་སེ་ཚོགས་པའི་སྤྱི་ཁྱབ་དྲུང་ཆེ་ར་ཧུལ་གྷན་རྡིས་སྲིད་བློན་མཆོག་དང་མཇལ་འཕྲད་ཀྱིས་གནད་དོན་འདིའི་ཐོག་བཀའ་མོལ་ཞུས་ཡོད་པ་རེད། ད་ལྟའི་ཆར་རྒྱ་གར་གྱི་ཞིང་པ་ཚོར་ས་ཞིང་འདེབས་ཡུལ་དུ་འཛུགས་སྐྲུན་བྱེད་པའི་སྐབས་གཞུང་ནས་གུན་གསབ་སྣེ་སེལ་ཞིག་ལས་སྤྲད་ཀྱི་མེད་པ་རེད། ཁྲིམས་གཞི་དེ་ནི་དེ་སྔ་དབྱིན་ཇིའི་དབང་འོག་ཏུ་ཡོད་པའི་སྐབས་ཀྱི་ལམ་སྲོལ་རྙིང་པ་ཞིག་ཡིན་པ་རེད། འོན་ཀྱང་ད་རེས་ཀོང་རེ་སེ་ཚོགས་པའི་ངོས་ནས་ཞིང་པའི་ས་ཞིང་གུན་གསབ་ཀྱི་ཁྲིམས་གཞི་བཅོས་སྒྱུར་གཏོང་རྒྱུའི་གླེང་སློང་འདི་ནི་ཆབ་སྲིད་ཀྱི་གནད་འགག་ཞིག་འོག་ནས་ཡིན་པའི་དཔྱད་ཞིབ་བྱེད་ཀྱི་ཡོད་པ་རེད།