སྙིང་རྗེའི་ཀུན་སློང་གིས་རང་གི་ཚེ་སྲོག་བློས་བཏང་བྱས་བ་རེད།

བོད་མིས་རང་ལུས་མེར་བསྲེཊ་ནི་སྙིང་རྗེས་ཀུན་སློང་གིས་རང་གི་ཚེ་སྲོག་བློས་བཏང་ནས་ངོ་རྒོལ་བྱས་བ་ཡིན་པ་༧གོང་ས་མཆོག་གིས་གསུངས་འདུག
དེ་ཡང་བོད་ཀྱི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་ཡུ་རོབ་ཀྱི་རྒྱལ་ཁབ་བཞིའི་མཛད་རིམ་བསྐྱང་བཞིན་པའི་ཁྲོད། གསར་འགོད་པས་བོད་ནང་གི་བོད་མིའི་རང་ལུས་མེར་བསྲེགས་ཀྱི་གནས་ཚུལ་སྐོར་བཀའ་འདྲི་ཞུས་པའི་སྐབས། ༧གོང་ས་མཆོག་གིས། བོད་ནང་བོད་མི་རང་ལུས་མེར་བསྲེགས་མཁན་ཚོས་ཁོང་ཁྲོའི་ཀུན་ནས་བླངས་ཏེ་གཞན་ལ་འཚེ་བ་བྱེད་ཀྱི་མེད་པ་དང་། དེ་ནི་སྙིང་རྗེའི་ཀུན་སློང་གིས་རང་གི་ཚེ་སྲོག་བློས་བཏང་ནས་རྒྱ་ནག་ཞུང་གི་སྲིད་ཇུས་ལ་ངོ་རྒོལ་བྱེད་ཀྱི་ཡོད་པ་རེད་ཅེས་གསུངས་པ་དང་། ལྷག་དོན་དུ་བོད་ནང་གི་དགེ་འདུན་པ་རྣམས་ཀྱིས་བོད་ནང་བོད་ཀྱི་རིག་གཞུང་དང་། ནང་ཆོས་གཅེས་འཛིན་གྱི་ཐོག་རྒྱ་ནག་གིས་དྲག་སྤྱོད་ཀྱི་སྲིད་བྱུས་སྤེལ་བཞིན་པ་དངོས་སུ་མཐོང་དུས་འུ་ཐུག་ནས་སོ་སོའི་ཚེ་སྲོག་བཅད་ཀྱི་ཡོད་པ་རེད་ཅེས་གསུངས་ཞོར་༧གོང་ས་མཆོག་གིས་རང་ལུས་མེར་བསྲེགས་ཀྱི་གནས་ཚུལ་དེ་རྣོ་ངར་ཅན་གྱི་གནས་ཚུལ་ཞིག་ཡིན་པས་གནས་ཚུལ་དེ་ཚོ་བྱུང་བར་༧གོང་ས་སྐྱབས་མགོན་ཆེན་པོ་མཆོག་ཐུགས་ཕམ་ཆེན་པོ་བྱུང་བ་དང་། ལས་འགུལ་དེའི་ཐོག་ནས་རྒྱ་ནག་གིས་བོད་ཐོག་འཛིན་པའི་སྲིད་བྱུས་ཐོག་ཤུགས་རྐྱེན་ཆེན་པོ་བཟོ་ཐུབ་པའི་ཡིད་ཆེས་གནང་གི་མེད་པའི་སྐོར་གསུངས་འདུག ད་དུང་༧གོང་ས་མཆོག་གིས་བོད་ནང་གི་རང་ལུས་མེར་སྲེག་གི་དངོས་ཡོད་གནས་སྟངས་གང་ཡིན་པ་ཕྱི་ནས་ཞིབ་འཇུག་རྩད་གཅོད་གནང་དགོས་པའི་སྐོར་བཀའ་ནན་པོ་གནང་འདུག   
སྤྱི་ལོ་༢༠༠༩་ནས་ད་བར་བོད་ནང་བོད་མི་༡༣༡་ཙམ་གྱིས་རང་ལུས་མེར་བསྲེགས་བཏང་ནས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་བྱས་ཡོད་པ་དང་། ཕྱི་ལོ་༢༠༡༤ ལོར་བོད་མི་དྲུག་གིས་རང་ལུས་མེར་བསྲེག་བཏང་ཡོད་པ་རེད།  

གསར་འགོད་པ་ཀརྨ་རྡོ་རྗེ།