རྒྱ་ནག་ཏུ་རང་དབང་རྩོད་ལེན་མཁན་ཞིག་ལ་ཁྲིམས་བཅད།

༄༅༎རྒྱ་ནག་ནང་འོས་བསྡུའི་རང་དབང་ཆེ་ཙམ་དགོས་རྒྱུའི་རྩོད་ལེན་གནང་མཁན་ལི་ཧྲུའང་རྡེ་ཐོག་Credit Card གིས་དངུལ་བུན་མ་སྤྲད་པའི་ནག་ཉེས་བཙུགས་ཏེ་ཟླ་བ་བཞིའི་རིང་བཙོན་འཇུག་བྱ་རྒྱུའི་ཁྲིམས་ཐག་ཁ་ས་བཅད་ཡོད་ནའང༌། འགྲོ་བ་མིའི་ཐོབ་ཐང་ཚོགས་པ་ཁག་གིས་ དེ་ནི་ལི་འཛིན་བཟུང་བཙོན་འཇུག་བྱ་རྒྱུར་དོན་མེད་ཁོང་ལ་མ་ཉེས་ཁ་གཡོག་བཙུགས་པ་ཞིག་ཡིན་སྐོར་སྐྱོན་བརྗོད་གནང་བཞག།

བར་ལམ་ཞིག་ལ་རྒྱ་ནག་གཞུང་གིས་རྒྱལ་ཡོངས་ནས་ ཨ་རབ་ཡུལ་ཁག་དང་འདྲ་བའི་མང་ཚོགས་ཀྱི་དམངས་གཙོའི་གྱེན་ལངས་མི་ཡོང་བའི་དམིགས་ཡུལ་ཐོག་ནས་རྒྱ་ནག་ནང་གི་ཁྲིམས་རྩོད་པ་དང༌། ཐོབ་ཐང་དོན་གཉེར་བ། དྲ་གནས་སྤེལ་མཁན་གྱི་མི་སྣ་མང་པོ་ཞིག་འཛིན་བཟུང་བྱས་པའི་སྐབས་སུ་ཕྱི་ཟླ་གསུམ་པའི་ནང་ལི་ཧྲུའང་རྡེ་འཛིན་བཟུང་བྱས་ཡོད་པ་རེད། ཧོང་ཀོང་ནང་རྟེན་གཞི་བྱས་པའི་རྒྱ་ནག་གི་འགྲོ་མིའི་ཐོབ་ཐང་སྲུང་སྐྱོབ་ཚོགས་པས་ ལི་ནི་རྒྱ་གཞུང་གིས་ཉེ་བའི་ཆར་འཛིན་བཟུང་བྱས་པའི་གྲས་ནས་ཁྲིམས་གཅོད་་བྱས་པ་ཐོག་མ་དེ་ཡིན་སྐོར་འགྲེལ་བརྗོད་བྱས་བཞག།

ཁྲིན་ཏུ་གྲོང་ཁྱེར་ཁྲིམས་ཁང་གིས་ལི་ཧྲུའང་རྡེ་ལ་དུས་ཚོད་ཐུང་ཐུང་ཞིག་ནང་ཁྲིམས་གཅོད་་བྱས་ཡོད་པ་དང། ལི་ཡི་ནག་ཉེས་ཐེར་འདོན་བྱས་ནས་ཟླ་བ་བཞིའི་རིང་བཙོན་འཇུག་དང་རྒྱ་མིའི་སྒོར་མོ་ཁྲི་གཉིས་ཉེས་ཆད་བཏང་ཡོད་སྐོར་ལི་ཡི་ཁྲིམས་རྩོད་པ་ཟུར་པ་རན་ཐོང་དང་གྲོགས་པོ་ཤིང་ཆིང་ཤན་ཡིས་བརྗོད་འདུག།

ལི་ཡིས་ Credit Card གི་བུ་ལོན་དུས་ཐོག་སྤྲོད་འཇལ་ཐུབ་མེད་པའི་ནག་ཉེས་བཙུགས་ཏེ་ཐོག་མར་ཕྱི་ཟླ་༣ཚེས་༢༤ཉིན་འཛིན་བཟུང་བྱས་ཡོད་པ་རེད། ཁོང་གི་གྲོགས་པོ་དང་སྤུན་མཆེད་ཚོས་ཕྱི་ཟླ་༤ཚེས་༢ཉིན་བུ་ལོན་གཙང་སེལ་སྤྲོད་འཇལ་བྱས་ཡོད་ནའང༌། ལི་ཐོག་ཁྲིམས་འགལ་བྱས་པའི་ནག་ཉེས་བཙུགས་ཡོད་སྐོར་ ཧོང་ཀོང་ནང་གི་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་པ་ཚོས་འགྲེལ་བརྗོད་བྱས་བཞག། ལི་ཡི་ད་ལྟའི་ཁྲིམས་རྩོད་པ་དང༌། ཁྲིམས་ཁང་གཉིས་ཀས་གྱོད་གཞི་དེའི་ཐད་བསམ་ཚུལ་གང་ཡང་བཏོན་མི་འདུག།