འབྲི་ཆུའི་ཐོག་ཉ་གསོག་འཇོག་ཆུང་དུ་གཏང་འཆར་ལ་སྐྱོན་བརྗོད།

༄༅༎རྒྱ་ནག་ཁོར་ཡུག་སྲུང་སྐྱོབས་ལས་ཁང་གིས་རྒྱ་ནག་གི་འབྲི་ཆུའི་ཆུ་སྟོད་རྒྱུད་དུ་རང་འབྱུང་གི་ཉ་སོག་འཇོག་བྱེད་སའི་ས་ཆའི་རྒྱ་ཁྱོན་ ཆུང་དུ་གཏོང་རྒྱུའི་ཐག་གཅོད་ལ་རྒྱ་ནག་ནང་ཡོད་པའི་ཁོར་ཡུག་སྲུང་སྐྱོབས་པ་ཚོས་བསྐྱོན་བརྗོད་ཤུགས་ཆེ་བྱེད་བཞིན་ཡོད་པ་རེད།   ཁོར་ཡུག་སྲུང་སྐྱོབ་པ་ཚོས་རྒྱ་ནག་གཞུང་གིས་འབྲི་ཆུའི་ཆུ་སྟོད་ཀྱི་རང་འབྱུང་ཉ་གསོག་འཇོག་བྱེད་སའི་ས་ཁྱོན་ཆུང་དུ་གཏོང་རྒྱུ་དེས་  དེའི་བརྒྱུད་དུ་ཨར་ལས་འཛུགས་སྐྲུན་གྱི་ལས་གཞི་སྤེལ་རྒྱུ་སོགས་ཀྱིས་ སྲུང་སྐྱོབས་བྱེད་སའི་འབྲི་ཆུའི་ནང་གི་ཤིན་དུ་དཀོན་པའི་རང་འབྱུང་ཉའི་རྣམ་གྲངས་ལ་གནོད་སྐྱོན་བཟོ་རྒྱུ་ཡིན་ལུགས་གསུང་གི་ཡོད་པ་རེད། རྒྱ་ནག་གཞུང་ཕྱོགས་ནས་ཉ་གསོག་འཇོག་བྱེད་སའི་ས་ཐིག་ལ་འགྱུར་ལྡོག་གཏོང་གི་ཡོད་ཚེ་ དེའི་ཐོག་ནས་མ་འོངས་ས་ཆ་དེའི་བརྒྱུད་དུ་ཆུ་མཛོད་རྒྱབ་རྒྱུར་མོས་མཐུན་བྱས་པ་དང་ཁྱད་པར་མེད་པ་རེད་ཅེས་ཨ་རིའི་ནང་རྟེན་གཞི་བྱས་པའི་རང་བྱུང་ཐོན་ཁུངས་ལ་བདག་གཅེས་བྱེད་མཁན་གྱི་ཚོགས་པའི་འབྲི་ཆུའི་ནང་གི་ཤིན་དུ་དཀོན་པའི་རང་བྱུང་ཉ་བདག་གཅེས་ལས་འཆར་གྱི་འགན་འཛིན་གོའོ་ཇའོ་ཡུའུ་ནས་གསུངས་འདུག