སྒྱུ་རྩལ་བ་ཨའེ་བེ་བེས་ཁྲིམས་ཁང་དུ་ཞུ་གཏུགས་བྱ་རྒྱུ།

༄༅༎རྒྱ་རིགས་སྒྱུ་རྩལ་བ་ཨའེ་ལྦེ་ལྦེ་ཡི་ཐོག་གཞུང་གིས་དཔྱ་འཁྲལ་ཉེས་ཆད་བཏང་བ་དེར་བསྐྱར་ཞིབ་བྱེད་དགོས་པའི་ཞུ་གཏུགས་བྱ་རྒྱུ་ཡིན་ཞེས་སྒྱུ་རྩལ་བ་ཨའེ་ལྦེ་ལྦེ་ཡིས་འདི་ཚེས་ ༡༡ ཉིན་ཧྥེ་རེནས་གསར་ལས་ཁང་ལ་གསུངས་འདུག  
དེ་ཡང་འདི་ལོའི་ལོ་སྟོད་དུ་རྒྱ་ནག་གཞུང་གིས་སྒྱུ་རྩལ་བ་ཨའེ་ལྦེ་ལྦེ་གློ་བུར་དུ་འཛིན་བཟུང་གིས་ཉིན་གྲངས་བརྒྱད་བཅུའི་རིང་དོ་དམ་བཀག་ཉར་འོག་བཞག་པའི་རྗེས་གློད་བཀྲོལ་བཏང་བ་དང་ཆབས་ཅིག་ སྒྱུ་རྩལ་བ་ཨའེ་ལྦེ་ལྦེ་ཡིས་གཞུང་ལ་ རྒྱ་མིའི་མི་མང་ཤོག་སྒོར་ས་ཡ་བཅོ་ལྔའི་དཔྱ་འཁྲལ་འབུལ་དགོས་པའི་ཉེས་ཆད་བཏང་ཡོད་པ་ལྟར། ཉེས་ཆད་དེ་འདི་ཚེས་ ༡༥ འི་ནང་ཚུད་འབུལ་དགོས་ཀྱི་ཡོད་ཀྱང༌།  འདི་ཚེས་ ༡༡ ཉིན་ཧྥེ་རེནས་གསར་ལས་ཁང་ལ་གནས་ཚུལ་ངོ་སྤྲོད་གནང་བའི་ནང༌། དཔྱ་འཁྲལ་གྱི་ཉེས་ཆད་དེ་འབུལ་རྒྱུར་ང་ཚོས་ད་བར་ཁས་ལེན་བྱས་མེད་ལ། དཔྱ་འཁྲལ་འབུལ་རྒྱུའི་དུས་ཡུན་མ་རྫོགས་གོང་གཞུང་གིས་ཉེས་ཆད་དེར་བསྐྱར་ཞིབ་བྱེད་དགོས་པའི་ཞུ་གཏུགས་བྱེད་ཀྱི་ཡིན། ཁྲིམས་ཁང་ལ་ཞུ་གཏུགས་བྱ་རྒྱུར་འགྲོ་སོང་མི་མང་ཤོག་སྒོར་ས་ཡ་བརྒྱད་དགོས་ཀྱི་ཡོད་པ་དེའི་ཆེད། ཉེ་ལམ་ཁོང་ལ་གདུང་སེམས་མཉམ་བསྐྱེད་བྱེད་མཁན་གྱི་མི་མང་ཚོས་ཞལ་འདེབས་བརྒྱབ་པའི་དངུལ་རྣམས་བེད་སྤྱོད་བྱ་རྒྱུ་ཡིན་ཞེས་གསུངས་འདུག