བོད་ནང་ཡུལ་སྐོར་སྤྲོ་འཆམ་པ་གཏང་རྒྱུའི་དུས་ཚོད་ཕྱིར་འགྱངས་བྱ་རྒྱུ་ཡིན་པ།

༄༅༎བོད་ནང་ཡུལ་སྐོར་སྤྲོ་འཆམ་པ་གཏང་རྒྱུའི་དུས་ཚོད་ཕྱིར་འགྱངས་བྱ་རྒྱུ་ཡིན་འདུག ཉེ་ཆར་བོད་ནང་དོན་རྐྱེན་བྱུང་བའི་རྗེས་སུ་བོད་ནང་གི་གནས་སྟངས་རྒྱ་ནག་གཞུང་ནས་བཏང་འཛིན་ཡག་པོ་བྱེད་ཐུབ་ཀྱི་ཡོད་པ་དང་། ཕྱི་རྒྱལ་ཡུལ་སྐོར་སྤྲོ་འཆམ་པ་ཚོ་བོད་ནང་ཕྱི་ཟླ་ལྔ་པའི་ཚེས་ཤར་ཙམ་ནས་འགྲོ་འོང་བྱ་རྒྱུ་འགོ་འཛུགས་རྒྱུ་ཡིན་ལུགས་གསལ་བསྒྲཊ་བྱས་ཡོད་པ་རེད། འོན་ཀྱང་བོད་ཀྱི་ཡུལ་སྐོར་སྤྲོ་འཆམ་ལས་ཁུངས་སུ་ཨེ་ཨེཕ་པི་གསར་འགྱུར་ལས་ཁང་ནས་ཁ་པར་ཐོག་བཀའ་འདྲི་གནང་བའི་སྐབས། མིང་བཏོན་གནང་འདོད་མེད་པའི་ལས་བྱེད་ཅིག་ནས། ད་ལྟའི་ཆར་བོད་ནང་གནས་སྟངས་ལྷིང་འཇགས་པོ་ཞིག་ཆགས་ཡོད་མ་རེད། དེ་འདྲ་ཡིན་དུས་སྔོན་འཆར་གཞིར་བཟུང་ཕྱི་ཕྱོགས་སུ་སྒོ་མོ་ཕྱེ་ཡི་མ་རེད་ཅེས་ལན་རྒྱབ་ཡོད་འདུག

ཡང་དྲིན་རྡུར་ཡོད་པའི་བོད་ནང་ཡུལ་སྐོར་སྤྲོ་འཆམ་བསྐྱོད་མཁན་ཚོའི་གོ་བསྒྲིགས་བྱེད་མཁན་གྱི་འབྲེལ་ཡོད་ལས་ཁུངས་ཀྱི་ལས་བྱེད་ཅིག་ནས། བོད་ནང་བསྐྱོད་ཆོག་པའི་དུས་ཚོད་ཕྱིར་འགྱངས་བྱས་ཡོད་པ་དངོས་འབྲེལ་རེད། ཡིན་ནའང་སླར་ཡང་ཕྱི་རྒྱལ་དང་། རྒྱལ་ནང་གི་ཡུལ་སྐོར་སྤྲོ་འཆམ་པ་བསྐྱོད་ཆོག་ཡོད་མིན་གྱི་དུས་ཚོད་ད་ལྟའི་འཆར་གང་ཡང་གསལ་བསྒྲགས་བྱེད་མ་སོང་ཞེས་འགྲེལ་བརྗོད་བྱས་འདུག ཉེ་ཆར་བོད་ནང་དོན་རྐྱེན་བྱུང་བ་ནས་བཟུང་རྒྱ་ནག་གཞུང་གི་གོ་བསྒྲིགས་འོག་ཕྱི་རྒྱལ་གསར་འགོད་པ་ཁག་ཅིག་དང་། ཕྱི་རྒྱལ་གནད་ཡོད་མི་སྣ་ཁག་ཅིག་བཅས་མ་གཏོགས་ད་བར་ཕྱི་ཕྱོགས་ནས་ཡོང་མཁན་ཚོར་དམ་དྲག་བྱས་ཡོད་པ་རེད༎