རྒྱ་ནག་གིས་ཕེ་རན་སི་དང་ཚོང་འབྲེལ་ཆུང་དུ་གཏོང་རྒྱུའི་ཉེན་བརྡ།

༄༅༎བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཕེ་རན་སི་སྲིད་འཛིན་ནི་ཀོ་ལ་སེ་སར་ཀོ་ཛི་རྣམ་གཉིས་མཇལ་འཕྲད་གནང་རྒྱུའི་འཆར་གཞིར་རྒྱ་ནག་གཞུང་ཕྱོགས་ཁོང་ཁྲོ་ཆེན་པོས་རྒྱ་ནག་དང་ཕེ་རན་སི་བར་གྱི་ཚོང་གི་འབྲེལ་ལམ་ཆུང་དུ་གཏོང་རྒྱུའི་ཉེན་བརྡ་གཏོང་བཞིན་ཡོད་པ་རེད།

དེ་ཡང་གཟའ་འཁོར་རྗེས་མའི་ནང་པོའོ་ལེན་ཡུལ་གྲུའི་ནང་ཚོགས་རྒྱུའི་རྒྱ་ནག་དང་ཡོ་རོབ་མཉམ་སྦྲེལ་སྒྲིག་འཛུགས་ཀྱི་ལྷན་ཚོགས་ཚོགས་རྒྱུ་ཡིན་ཡང་རྒྱ་ནག་ཕྱོགས་ནས་ཕེ་རན་སི་སྲིད་འཛིན་གྱིས་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་གནང་རྒྱུ་ཡིན་པ་དེར་ངོ་རྒོལ་རྣམ་འགྱུར་མཚོན་ཕྱིར་ལྷན་ཚོགས་ནང་རྒྱ་ནག་མཉམ་ཞུགས་བྱ་རྒྱུ་མིན་པའི་ཐག་གཅོད་བྱས་ཡོད་པ་དང་རྒྱ་ནག་ཕྱོགས་ཀྱི་བྱ་སྤྱོད་དེ་ཡིས་ཡུལ་གྲུ་གཉིས་བར་གྱི་ཚོང་ལས་ཀྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་པའི་ངོས་འཛིན་བྱེད་ཀྱི་ཡོད་པ་རེད། ན་ནིང་ཡང་རྒྱ་ནག་ཕྱོགས་ནས་ཡོ་རོབ་ཀྱི་རྒྱལ་ཁབ་ཇར་མ་ནིའི་སྲིད་བློན་ལྕམ་ཨེན་ཇེ་ལ་མར་ཀེལ་མཆོག་གིས་བོད་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྲིད་བློན་གྱི་ཕོ་བྲང་དུ་མཇལ་འཕྲད་ཞུས་པར་ཁོང་ཁྲོ་ཆེན་པོས་ཇར་མ་ནི་གཞུང་དང་སྲིད་བློན་ལྕམ་ཨེན་ཇེ་ལ་མར་ཀེལ་མཆོག་ལ་སྐྱོན་བརྗོད་དྲག་པོ་ཞུས་པ་མ་ཟད་རྒྱ་ནག་དང་ཇར་མ་ནི་བར་གྱི་ཚོང་འབྲེལ་ལ་དོ་ཕོག་འགྲོ་རྒྱུའི་ཉེན་བརྡ་གཅིག་མཚུངས་བཏང་ཡོད་པ་རེད། དེ་རིང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིའུ་ཅན་ཁྲའོ་ཡིས་འཆར་ཅན་གྱི་གསར་འགོད་ལྷན་ཚོགས་ཐོག་ལ་བསྐྱར་ཏུ་ཕེ་རན་སི་སྲིད་འཛིན་གྱི་༸གོང་ས་མཆོག་དང་མཇལ་འཕྲད་ཞུ་རྒྱུའི་འཆར་གཞིར་རྒྱ་ནག་གཞུང་ཕྱོགས་ནས་ངོ་རྒོལ་ཡོད་པའི་གསལ་བཤད་བྱས་པ་དང་ཡིན་ནའང་གསར་འགོད་པའི་ཁྲོད་ནས་རྒྱ་ནག་གི་ཚོང་འབྲེལ་གྱིས་ཕེ་རན་སིའི་ཚོང་ལས་ཀྱི་འབྲེལ་ལམ་ལ་ཤུགས་རྐྱེན་ག་རེ་ཐེབས་ཀྱི་ཡོད་དམ་ཞེས་སྐད་ཆ་འདྲིས་པར་ལན་འདེབས་གང་ཡང་མ་བྱས་པར་ངའི་ངོས་ནས་ཕེ་རན་སི་ཕྱོགས་ནས་ང་ཚོའི་ལངས་ཕྱོགས་གསལ་པོ་ཡིན་པ་མཁྱེན་རྟོགས་ཡོད་པ་ཡིད་ཆེས་ཡོད་ཅེས་དང་ཕེ་རན་སི་ཕྱོགས་ནས་འདེམས་ཀ་མ་ནོར་ཞིག་བྱ་རྒྱུའི་རེ་བ་དང་ལྷག་པར་དུ་རྒྱ་ནག་དང་ཡོ་རོབ་མཉམ་སྦྲེལ་སྒྲིག་འཛུགས་ཀྱི་དབུ་ཁྲིད་ལྷན་ཚོགས་དེར་ཁོར་ཡུག་དང་ཆ་རྐྱེན་ཡག་པོ་ཞིག་སྐྲུན་རྒྱུའི་རེ་བ་ཡོད་ཅེས་བཤད་ཡོད་པ་རེད།