ཨ་རིའི་དམག་གྲུའི་སྐོར་བསྐྱོད་ལ་རྒྱ་ནག་གིས་སྐྱོན་བརྗོད་བྱས་འདུག

ཨ་རིའི་དམག་གི་གྲུ་གཟིངས་ལྷོ་རྒྱ་ནག་རྒྱ་མཚོའི་མཚོ་ཁུལ་དུ་སྐོར་བསྐྱོད་བྱས་པར་རྒྱ་ནག་གཞུང་གིས་སྐྱོན་བརྗོད་བྱས་ཡོད་འདུག
ཨ་རིའི་དམག་གི་གྲུ་གཟིངས་ལྷོ་རྒྱ་ནག་རྒྱ་མཚོའི་མཚོ་ཁུལ་དུ་བལྟ་ཞིབ་སྐོར་བསྐྱོད་བྱས་པའི་རྗེས། འདི་ཚེས་༢༡་ཉིན་རྒྱ་ནག་གཞུང་གིས་རྒྱལ་ཁབ་སུ་འདྲ་ཞིག་ཡིན་ན་ཡང་མཚོ་ཐོག་འགྲོ་བསྐྱོད་རང་དབང་ལ་ཁ་གཡར་ནས་གཞན་གྱི་བདག་དབང་མཚོ་ཁུལ་དུ་སྐོར་བསྐྱོད་ལས་དོན་སྤེལ་རྒྱུར་ངོ་རྒོལ་མཐའ་གཅིག་ཏུ་བྱ་རྒྱུ་ཡིན་ལུགས་བརྗོད་ཡོད་འདུག
ཨ་རིའི་མཚོ་དམག་ཚན་པས་གནས་ཚུལ་ཕྱིར་བསྒྲགས་བྱས་པར་ལྟར་ན། གཟའ་སྤེན་པ་ནས་བཟུང་ཨ་རིའི་དམག་གི་གནམ་གྲུ་འབབ་སའི་USS  Nimitz་རྟགས་ཅན་གྱི་དམག་གི་གྲུ་གཟིངས་གཙོས་པའི་ཨ་རིའི་དམག་གྲུས་བདག་དབང་ཐོག་རྩོད་གླེང་ཡོད་པའི་ལྷོ་རྒྱ་ནག་རྒྱ་མཚོའི་མཚོ་ཁུལ་དུ་རྒྱུན་ལྡན་གྱི་སྐོར་བསྐྱོད་ལས་དོན་སྤེལ་བཞིན་ཡོད་པ་བརྗོད་ཡོད་པ་རེད། ཡིན་ནའི་རྒྱ་ནག་གཞུང་གིས་ཨ་རིའི་རྒྱུན་ལྡན་གྱི་མཚོ་ཐོག་དམག་གྲུའི་སྐོར་བསྐྱོད་དེ་བཞིན་རྒྱ་ནག་གི་མཚོ་ཁུལ་བདག་དབང་གི་བདེ་འཇགས་ལ་ཉེན་ཚབས་བཟོ་གིན་ཡོད་ལུགས་བརྗོད་ཀྱི་ཡོད་ཅིང་། རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་Geng Shuang་གིས་དེ་རིང་གི་གསར་འགོད་ལྷན་ཚོགས་ཐོག་རྒྱ་ནག་གཞུང་གིས་རྒྱལ་སྤྱིའི་ཁྲིམས་ལུགས་བཞིན་མཚོ་ཐོག་འགྲོ་སྐྱོད་རང་དབང་ལ་སྲུང་བརྩི་ཞུ་བཞིན་ཡོད། ཡིན་ན་ཡང་རྒྱལ་ཁབ་སུ་འདྲ་ཞིག་ཡིན་ན་ཡང་འཇིགས་སྐུལ་དང་མཚོ་ཁུལ་རྒྱལ་ཁབ་ཁག་གི་བདག་དབང་དང་བདེ་འཇགས་ལ་གནོད་ཚབས་བཟོ་རྒྱུར་མཐའ་གཅིག་ཏུ་ནས་ངོ་རྒོལ་བྱེད་རྒྱུ་ཡིན་ཞེས་བཤད་ཡོད་འདུག
རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པའི་གཏམ་བཤད་འདི་ནི་ཨ་རིའི་དམག་གྲུས་ལྷོ་རྒྱ་ནག་རྒྱ་མཚོའི་མཚོ་ཁུལ་དུ་རྒྱུན་ལྡན་སྐོར་བསྐྱོད་ལས་དོན་སྤེལ་བཞིན་པའི་གནད་དོན་ཐོག་རྒྱ་ནག་གཞུང་འབྲེལ་གྱི་ལན་འདེབས་བྱས་པ་ཐོག་མ་དེ་ཡིན་པ་རེད།

གསར་འགོད་པ་འཆི་མེད།