སོག་པོའི་ཆབ་སྲིད་བཙོན་པ་ཞིག་གློད་འགྲོལ་གཏོང་བའི་རེ་སྐུལ།

༄༅༎སོག་ཡུལ་ནང་རྒྱ་ནག་གཞུང་དང་ལྷ་བ་མི་མཐུན་པའི་ཆབ་སྲིད་ཀྱི་བཙོན་པ་ཧ་རྡ་ ཨོ་ལིམ་པིག་རྩེད་འགྲན་གོང་ལ་གློད་འགྲོལ་གཏོང་དགོས་ལུགས་དོ་བདག་གི་བཟའ་ཟླས་འབོད་སྐུལ་ཞུས་ཡོད་འདུག

ཕྱི་ལོ་༡༩༩༦ལོར་ ཧ་རྡ་ཡིས་ལྷོ་ཕྱོགས་སོག་ཡུལ་དམངས་གཙོའི་མནའ་སྦྲེལ་དང་ངན་ལག་འདྲེས་ཀྱི་ཁ་བྲལ་གྱི་ལས་འགུལ་ནང་མཉམ་ཞུགས་བྱས་པའི་ནག་ཉེས་འོག་ནང་སོག་ནང་ལོ་བཅོ་ལྔའི་རིང་བཙོན་འཇུག་བྱས་ནས་ད་ཆ་ལོ་བཅུ་གསུམ་ཕྱིན་པའི་སྐབས་འདིར་དོ་བདག་གི་བཟའ་ཟླ་ ཞི་ན་ ཡིས་ ཕྲན་གྱི་བཟའ་ཟླ་ལོ་བཅུ་གསུམ་རིང་བཙོན་ཁང་ནང་བསྡད་ཟིན་པས་ ད་ཆ་ཨོ་ལིམ་པིག་རྩེད་འགྲན་གྱི་དགའ་སྟོན་གྱི་གོ་སྐབས་བཟང་པོ་དང་སྟབས་བསྟུན་ནས་གུ་ཡངས་གློད་འགྲོལ་ཡོང་བའི་རེ་འདུན་འཁོད་པའི་ཞུ་ཡིག་ཅིག་རྒྱ་ནག་སྲིད་འཛིན་ཧུ་ཅིན་ཏའོ་ལ་ཕུལ་ཡོད་འདུག་ཀྱང་ ད་བར་བཀའ་ལེན་གནང་ཡང་གནང་འབྱོར་མི་འདུག རྩེད་འགྲན་གྱི་དཔལ་འབར་ནང་སོག་ནང་རེས་གཟའ་མིག་དམར་ནས་ཉིན་བཞིའི་རིང་བསྐོར་བསྐྱོད་བྱས་ནས་ རེས་གཟའ་ཕུར་བུའི་ཉིན་ཧ་རྡ་བཙོན་འཇུག་བྱས་ཡུལ་ ཆི་ཕེང་ གྲོང་ཁྱེར་དུ་འབྱོར་གྱི་ཡོད་འདུག ནང་སོག་ནང་རང་སྐྱོང་གི་གནས་ཚད་གང་འཚམས་ཡོད་དགོས་ཀྱང་བོད་དང་ཤར་ཏུར་ཀི་སི་ཐན་གཉིས་ནང་བཞིན་རྒྱ་ནག་གཞུང་གིས་གདུག་རྩུབ་དྲག་གནོན་ཚད་མེད་གཏོང་མུས་ཡིན་པའི་ཐོག་ ས་ཁུལ་དེ་དག་ནང་རྒྱ་ཧན་མི་རིགས་ཁྱོན་ཆེན་འོར་འདྲེན་གྱི་ས་གནས་ཀྱི་ཡུལ་མི་རྣམས་རང་ཡུལ་དུ་གྲངས་ཉུང་མི་རིགས་ཆགས་ཡོད་ལུགས་འགྲེལ་བརྗོད་བྱས་འདུག