རྒྱ་ནག་གིས་བོད་ནང་དམག་འཐབ་གནམ་གྲུ་ཚོད་བལྟ་བྱས་པ།

༄༅༎རྒྱ་ནག་གིས་བོད་ནང་གསར་བརྒྱབ་བྱས་པའི་གནམ་ཐང་ཐོག་དྲག་པོའི་དམག་གི་བྱེད་སྒོ་མང་དུ་བཏང་ནས་ར་ཤི་ཡས་བཟོས་པའི་དམག་འཐབ་གནམ་གྲུ་ཚོད་བལྟ་བྱེད་འགོ་བཙུགས་་ཡོད་པའི་གནས་ཚུལ་ཐོན་འདུག་། རྒྱ་གར་གྱི་ཨིན་ཌི་ཡེན་ཨེ་སི་པེ་རེསི་ཉིན་རེ་གསར་ཤོག་ནང་སྤྱི་ཚེས་༣ཉིན་གནས་ཚུལ་སྤེལ་དོན་ལྟར་ན་ རྒྱ་གར་གྱི་བདེ་སྲུང་བློན་ཆེན་ཨེ་ཀེ་ཨེན་ཐོ་ནི་གྱིས་རྒྱ་གར་གྱི་བདེ་འཇགས་ཀྱི་གནད་དོན་བསྐྱར་ཞིབ་གནང་བའི་ནང་དོན་ཕྱིར་བསྒྲགས་གནང་བའི་ནང་བོད་ཀྱི་མཐོ་སྒང་དུ་རྒྱ་ནག་གིས་གནམ་ཐང་བདུན་གསར་བརྒྱབ་བྱས་ཟིན་པ་དང་ བོད་ནང་རྒྱ་ནག་གི་དྲག་པོའི་དམག་གི་ཟབ་སྦྱོང་སོགས་ཀྱི་ལས་དོན་མང་དུ་བཏང་བ་དང་ ལྷག་དོན་དུ་ར་ཤི་ཡས་བཟོས་པའི་དམག་འཐབ་གནམ་གྲུ་Sukhoi-30sརྟགས་ཅན་ཚོད་ལྟ་འགོ་བཙུགས་ཡོད་པའི་གནས་ཚུལ་ཤེས་རྟོགས་བྱུང་ཡོད་པ་རེད་འདུག་། རྒྱ་ནག་གི་བཅིངས་བཀྲོལ་དམག་གི་དམག་སྦྱོང་དེ་བོད་ནང་ཟླ་བ་གཉིས་སྔོན་དུ་བྱས་ཡོད་པ་དང་ དམག་སྦྱོང་དེ་ཡང་ཆེད་བཙུགས་བྱས་པའི་མྱུར་གཏོང་དམག་དཔུང་དང་ གནམ་དམག་དང་རྒྱུན་ལྡན་དམག་དཔུང་བཅས་སྡེ་ཚན་གསུམ་གྱི་མཉམ་འབྲེལ་གྱི་ཐོག་ནས་དམག་འཐབ་ཆུང་གྲས་ཀྱི་ཐབས་བྱུས་ཐོག་ཟབ་སྦྱོང་དང་ ལྷག་དོན་དུ་མེ་འཁོར་སོགས་ཀྱི་བརྒྱུད་ནས་བོད་ནང་དྲག་པོའི་འཕྲུལ་རིག་མྱུར་དུ་དབོར་འདྲེན་སོགས་ཀྱི་ཟབ་སྦྱོང་ཚོད་ལྟ་བྱས་ཡོད་པ་རྒྱ་གར་གྱིས་ཤེས་རྟོགས་བྱུང་ཡོད་པ་བཅས་ཀྱི་གནས་ཚུལ་ཐོན་འདུག།