རྒྱ་ནག་གི་འགྲོ་བ་མིའི་ཐོབ་ཐང་ཐོག་ཐེ་ཇུས་བྱེད་མི་ཆོག་བཤད།

༄༅༎ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཀྲེན་མཆོག་གིས། རྒྱ་ནག་གཞུང་གིས་བར་ལམ་དམངས་གཙོ་དོན་གཉེར་ཅན་ཁག་ཅིག་འཛིན་བཟུང་བྱས་པ་རྣམས་གློད་བགྲོལ་གཏོང་དགོས་པའི་བཀའ་མོལ་གསུང་པའི་རྗེས། རྒྱ་ནག་གཞུང་གིས་ཨ་མི་རི་ཀར་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ཐོག་ཐེ་ཇུས་བྱེད་མི་ཆོག་པའི་ལན་འདེབས་བྱས་ཡོད་པ་རེད།

དེ་ཡང་ཨ་རིའི་ཕྱི་སྲིད་ལྷན་ཁང་གིས་འགྲོ་བ་མིའི་ཐོབ་ཐང་སྐོར་ལ་ལོ་ལྟར་ཞིབ་འཇུག་གནང་སྲོལ་ཡོད་པ་བཞིན། ཐེངས་འདིའི་ལོ་འཁོར་གྱི་ཞིབ་འཇུག་སྙན་ཐོའི་ནང་རྒྱ་ནག་གཞུང་གིས་དམངས་གཙོ་དོན་གཉེར་ཅན་དང༌། གསར་འགྱུར་བརྒྱུད་ལམ། རང་དབང་གི་དྲ་གནས་ལྟ་ཀློག་བྱེད་རྒྱུ་བཀག་འགོག་དང་རྡུང་རྡེག་གི་བྱ་སྤྱོད་ཤུགས་ཆེ་རུ་བཏང་བ་མ་ཟད། བོད་དང་ཤིང་ཅང་ནང་དུ་ཧ་ཅང་གི་ཚབས་ཆེ་བའི་དྲག་གནོན་བྱས་ཡོད་པའི་སྐོར་བཀོད་ཡོད་པ་རེད། རེས་གཟའ་པ་སངས་ཉིན་ཨ་རིའི་ཕྱི་སྲིད་དྲུང་ཆེ་ལྕམ་ཀི་ལིན་ཀྲེན་མཆོག་ནས་ཀྱང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ཐོག་རྡུང་རྡེག་གཏོང་བའི་གནས་སྟངས་ཇེ་སྡུག་ཏུ་ཕྱིན་ཡོད་པའི་སྐོར་གསུང་བ་རེད། འདི་ལོའི་ཕྱི་ཟླ་གཉིས་པ་ནས་བཟུང་སྟེ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་མཁན་གྱི་ཁྲིམས་རྩོད་པ་དང༌། རྩོམ་བྲིས་པ། སྒྱུ་རྩལ་བ། ཤེས་ལྡན་པ། འགྲོ་བ་མིའི་ཐོབ་ཐང་ལས་འགུལ་སྤེལ་མཁན་འཛིན་བཟུང་བྱེད་པ་དང་དོ་དམ་བཀག་ཉར་བྱེད་པའི་བྱ་སྤྱོད་གསལ་སྟོན་གནང་བ་མ་ཟད། དམིགས་བསལ་རྒྱ་ནག་གཞུང་གི་ནོར་འཁྲུལ་ཅན་གྱི་སྲིད་ཇུས་ལ་སྐྱོན་བརྗོད་གནང་མཁན་སྒྱུ་རྩལ་བ་ཨེ་ལྦེ་ལྦེ་ཟླ་བ་འདིའི་ཕྱི་ཚེས་གསུམ་ཉིན་དཔལ་འབྱོར་གྱི་ཁྲིམས་འགལ་ཉེས་བསག་གི་ནག་ཉེས་བཙུགས་ཏེ་འཛིན་བཟུང་བྱས་པའི་གནད་དོན་གསལ་བཏོན་གནང་འདུག ཨ་རིའི་ཕྱོགས་ནས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཇེ་སྡུག་ཏུ་ཕྱིན་པ་དེར་མུ་མཐུད་ནས་བློ་འཚབ་ཡོད་ཅེས་གསུང་ཡོད་པ་རེད།