རྒྱ་ནག་གཞུང་འབྲེལ་གསར་ཤོག་ཐོག་ཨ་རིར་སྐྱོན་བརྗོད་བྱས་པ།

༄༅༎ཨ་མི་རི་ཀས་ཤར་ཞི་བདེ་རྒྱ་མཚོའི་ཁུལ་ཚོང་དོན་འབྲེལ་ལམ་གྱི་ལས་གཞི་རྒྱ་སྐྱེད་བྱེད་བཞིན་པ་དེ་ནི། རྒྱ་ནག་ལ་དགྲ་འཛིན་འཁོན་སེམས་ཀྱི་རྣམ་འགྱུར་བསྟན་པ་ཞིག་ཡིན་ལུགས་ རྒྱ་ནག་གཞུང་འབྲེལ་གོལོ་སྦལ་ཀྲའེམ་སེ་(Global Times)ཞེས་པའི་གསར་ཤོག་གི་རྩོམ་སྒྲིག་པའི་ཆེད་གཏམ་གྱི་ནང་བཀོད་ཡོད་པ་རེད།
དེང་སྐབས་ཨ་མི་རི་ཀའི་ངོས་ནས་ཞི་བདེ་རྒྱ་མཚོའི་ཡུལ་གྲུ་ཕན་ཚུན་གྱི་ཐབས་བྱུས་དང་དཔལ་འབྱོར་མཉམ་འབྲེལ་མཐུན་ཚོགས་ཤིག་འཛུག་ཐབས་ཐད་འབད་བརྩོན་ཤུགས་ཆེ་གནང་བཞིན་ཡོད་པ་དང་། གཟའ་པ་སངས་ཉིན་ཉེ་ཧོང་ཡང་མཐུན་ཚོགས་དེའི་ནང་འཛུལ་ཞུགས་བྱ་རྒྱུའི་ཐག་གཅོད་བྱས་ཡོད་པ་དང༌། རྒྱ་ནག་གིས་གལ་ཏེ་རྒྱ་ནག་ཀྱང་མཐུན་ཚོགས་དེའི་ནང་འཛུལ་ཞུགས་ཡོང་རྒྱུའི་མགྲོན་བརྡ་བྱུང་ཚེ་འཛུལ་ཞུགས་བྱ་མིན་གྱི་བསམ་བློ་གཏང་རྒྱུ་ཡིན་སྐོར་བརྗོད་ཡོད་པ་རེད།
འོན་ཀྱང་རྒྱ་ནག་གི་་གཞུང་འབྲེལ་གསར་ཤོག་དེའི་ནང་། ཨ་མི་རི་ཀའི་ཕྱི་སྲིད་དྲུང་ཆེ་ ཧི་ལ་རི་ ཀིལན་ཊན་གྱིས་གཟའ་ཕུར་བུའི་ཉིན་ཨ་མི་རི་ཀའི་རྒྱལ་ས་ལྦ་ཤིང་ཊོན་ནས་ཀྲི་པི་པི་འམ། ཞི་བདེ་རྒྱ་མཚོའི་ཕན་ཚུན་གྱི་ཐབས་བྱུས་དང་དཔལ་འབྱོར་མཉམ་འབྲེལ་མཐུན་ཚོགས་ཞེས་པའི་ཨ་མི་རི་ཀ་དང་ཞི་བདེ་རྒྱ་མཚོའི་ཁུལ་གྱི་ཡུལ་གྲུ་འགའ་ཤས་དབར་ཁྲལ་མེད་པའི་ཚོང་དོན་འབྲེལ་ལམ་འཛུག་ཐབས་ཀྱི་ལས་གཞི་ངོ་སྤྲོད་ཀྱི་ལས་དོན་འགོ་འཛུགས་སྐབས། རྒྱ་ནག་གི་འགྲོ་བ་མིའི་ཐོབ་ཐང་ཐད་ལ་སྐྱོན་བཙུགས་གནང་ཡོད་པ་རེད་ཅེས་དང༌ ཀིལན་ཊན་གྱི་གཏམ་བཤད་དེས་ཨ་མི་རི་ཀས་ཞི་བདེ་རྒྱ་མཚོའི་ཐབས་བྱུས་དང་དཔལ་འབྱོར་མཉམ་འབྲེལ་མཐུན་ཚོགས་ཀྱི་ལས་གཞི་དེ་བརྒྱུད་སྟེ་རྒྱ་ནག་བཅུན་ཐབས་བྱེད་རྒྱུ་ཡིན་པའི་གཏམ་འཆལ་ཞིག་ཡོད་པ་དེ་དངོས་འབྲེལ་ཡིན་པའི་ཁུངས་སྐྱེལ་མཚོན་རྒྱུ་དང༌། གལ་ཏེ་དེ་ལྟར་མིན་པར་ ཨ་མི་རི་ཀའི་ངོས་ནས་དངོས་འབྲེལ་ཞི་བདེ་རྒྱ་མཚོའི་ཡུལ་གྲུ་ཕན་ཚུན་དབར་ཁྲལ་མེད་པའི་ཚོང་དོན་འབྲེལ་ལམ་ལམ་ལྷོངས་ལྡན་པ་ཞིག་འཛུགས་རྒྱུའི་བསམ་བློ་ཡོད་ཚེ། ཨ་མི་རི་ཀའི་ཕྱི་སྲིད་དྲུང་ཆེའི་ངོས་ནས་བཀའ་མོལ་གནང་སྟངས་དེ་མ་སྒྲིག་པ་ཞིག་རེད་ཅེས་བརྗོད་འདུག།