རྒྱ་ནག་གིས་ལྷོ་རྒྱ་ནག་རྒྱ་མཚོའི་ཁུལ་དུ་དམག་སྦྱོང་བྱས་པ།

༄༅༎རྒྱ་ནག་གཞུང་འབྲེལ་གསར་འགྱུར་རྒྱུད་ལམ་ཐོག་གཟའ་ལྷག་པའི་ཉིན་གནས་ཚུལ་སྤེལ་བ་ལྟར་ན་ རྒྱ་ནག་གི་མཚོ་ཐོག་དམག་དཔུང་གིས་རྒྱ་ནག་གི་ཁྱིམ་མཚེས་རྒྱལ་ཁབ་དང་བདག་དབང་རྩོད་གླེང་ཡོད་པའི་ལྷོ་རྒྱ་ནག་རྒྱ་མཚོའི་ཁུལ་དུ་གཟའ་མིག་དམར་ཉིན་དམག་དོན་སྦྱོང་རྡར་བྱས་ཡོད་པ་དང་ དམག་དོན་སྦྱོང་རྡར་དེའི་ནང་མཚོ་ཐོག་གི་རྐང་དམག་༡༨༠ལྷག་མཉམ་ཞུགས་བྱས་ཡོད་ཅིང་། དམག་གྲུ་༡༠༠ལྷག་དང་མཚོ་འོག་བསྐྱོད་ཐུབ་པའི་དམག་གི་གྲུ་གཟིངས་དང་ དམག་གི་གནམ་གྲུ་སོགས་བེད་སྤྱོད་བྱས་ནས་དམག་དོན་སྦྱོང་རྡར་བྱས་ཡོད་པའི་སྐོར་དམག་དཔུང་གི་དཔོན་རིགས་ནས་རྒྱལ་སྤྱིའི་དུས་དེབ་ཅེས་པའི་རྒྱ་ནག་གི་གསར་འགྱུར་རྒྱུད་ལམ་ལ་འགྲེལ་བརྗོད་བྱས་ཡོད་པ་རེད་   ཡང་གནས་ཚུལ་ནང་འཁོད་པར་ ད་རེས་ཀྱི་དམག་དོན་སྦྱོང་རྡར་དེའི་ནང་རྒྱ་ནག་དམག་དོན་སློབ་གྲའི་ནང་སློབ་སྦྱོང་བྱེད་བཞིན་པའི་རྒྱལ་ཁབ་༤༠ཙམ་གྱི་སློབ་མ་ཉིས་བརྒྱ་ལྷག་ཙམ་ཡང་ལྟ་ཞིབ་པའི་མིང་ཐོག་ནས་དམག་དོན་སྦྱོང་རྡར་དེའི་ནང་ཞུགས་ཡོད་པ་རེད་ པེ་ཅིན་ནང་ཡོད་པའི་རྒྱ་ནག་གི་དམག་དོན་གནད་དོན་ཉམས་ཞིབ་པ་ལིའི་ཇལ་གྱིས་གསུངས་ན་ ད་རེས་ཀྱི་དམག་དོན་སྦྱོང་རྡར་དེ་བཞིན་ཕྱོགས་གཅིག་ནས་རྒྱུན་ལྡན་གྱི་དམག་དོན་སྦྱོང་རྡར་ཞིག་ཡིན་པ་རེད་ལ་ ཕྱོགས་གཞན་ཞིག་ནས་བལྟས་ན་ལྷོ་རྒྱ་ནག་རྒྱ་མཚོའི་ཁུལ་གྱི་ད་ལྟའི་གནས་སྟངས་ཤིག་ཡང་མཚོན་ཐུབ་རྒྱུ་ཡིན་ཞིང་ རྒྱ་ནག་གཞུང་གིས་མཚོ་ཁུལ་དེའི་ནང་དམག་དོན་སྦྱོང་རྡར་བྱས་ནས་ཕྱི་ཕྱོགས་སུ་དམིགས་བསལ་གྱི་མཚོན་རྟགས་བསྟན་པ་ཞིག་མིན་ཡང་ དེའི་ཐོག་ནས་རྒྱ་ནག་གི་མཚོ་ཐོག་དམག་དཔུང་གི་སྟོབས་ཤུགས་ཕྱི་ཕྱོགས་སྟོན་པ་ཞིག་ཡང་མཚོན་ཐུབ་རྒྱུ་ཡིན་ལུགས་གསུངས་འདུག གོང་ཞུས་དམག་དོན་སྦྱོང་རྡར་དེའི་སྐོར་རྒྱ་ནག་སྲུང་སྐྱོབ་ལས་ཁང་གིས་ད་ལྟའི་ཆར་ལན་འདེབས་གང་ཡང་བྱས་མེད་པ་རེད་ ལྷོ་རྒྱ་ནག་རྒྱ་མཚོའི་གླིང་ཕྲན་ཁུལ་དུ་རང་འབྱུང་གི་གཏེར་ཁ་ཕུན་གསུམ་ཚོགས་པོ་ཡོད་པར་བརྟེན་ནས་ རྒྱ་ནག་དང་ ལྦིཏ་ནམ་ ཕེ་ལི་ཕིན་ མ་ལ་ཤི་ཡ་ ཐེ་ལྦན་སོགས་ཡུལ་ཁག་གིས་དེའི་ཁུལ་གྱི་བདག་དབང་ཡོད་པར་རྩོད་གླེང་བྱེད་བཞིན་ཡོད་པ་རེད༎