འབྲོག་པ་ལྔ་ཁྲི་ཙམ་གྲོང་ཁྱེར་ཕྱོགས་སུ་གནས་སྤོས་བྱེད་བཅུག་པ།

༄༅༎རྒྱ་ནག་གིས་བོད་ཀྱི་ས་ཁུལ་ཁག་ནས་འབྲོག་པ་མི་གྲངས་ལྔ་ཁྲི་ལྷག་ཙམ་འབྲོག་སའི་ཁུལ་ནས་གྲོང་ཁྱེར་གྱི་ཕྱོགས་སུ་གནས་སྤོས་བྱས་ཟིན་པ་དང་ད་དུང་མུ་མཐུད་ནས་བྱེད་འཆར་ཡོད་པའི་གནས་ཚུལ་ཐོན་འདུག

རྒྱ་ནག་གི་ཤིང་ཧ་གསར་སྤེལ་ཁང་གིས་གནས་ཚུལ་དྲིལ་བསྒྲགས་སྤེལ་དོན་ལྟར་ན་འདས་པའི་ལོ་ངོ་བཞིའི་ནང་བོད་ཀྱི་འབྲོག་ཁུལ་ནས་བོད་མི་བཞི་ཁྲི་དགུ་སྟོང་དྲུག་བརྒྱ་སུམ་ཅུ་སོ་གཅིག་གྲོང་ཁྱེར་གྱི་ཉེ་འགྲམ་དུ་གཏན་སྡོད་ཀྱི་ཆེད་དུ་གནས་སྤོས་ཀྱི་ལས་འཆར་ལག་ལེན་བསྟར་ཟིན་པ་དང་མུ་མཐུད་ནས་ལག་ལེན་བསྟར་ནས་བོད་ཀྱི་འབྲོག་པའི་ས་ཁུལ་ནས་བོད་མི་འབུམ་གཅིག་གནས་སྤོས་བྱེད་རྒྱུ་ཡིན་པའི་ཁྱབ་སྤེལ་བྱས་འདུག

རྒྱ་ནག་གིས་བོད་རིགས་གནས་སྤོས་བྱེད་དགོས་པའི་རྒྱུ་མཚན་གཙོ་བོ་གཉིས་བཤད་ཀྱི་ཡོད་ཅིང་བོད་ཀྱི་འབྲོག་པ་རྣམས་ཀྱི་གོ་ཕྱུགས་སེམས་ཅན་ཚོས་རྩྭ་ར་ཚད་གཞི་ལས་བརྒལ་བ་ཟ་བའི་ཤུགས་རྐྱེན་འོག་འཁོར་ཡུག་ལ་གནོད་འཚེ་བཟོ་གི་ཡོད་པ་དང་བོད་རིགས་འབྲོག་པ་རྣམས་ས་གནས་གཅིག་ནས་གཞན་དུ་རྒྱུན་ལྡན་ཐོག་གནས་སྤོས་བྱེད་མི་དགོས་པ་ས་གནས་གཅིག་ཏུ་གཞི་ཆགས་ནས་གཏན་དུ་སྡོད་པའི་ཆེད་དུ་ཡིན་པའི་འགྲེལ་བརྗོད་གནང་ཡོད་པ་རེད།

བཙན་བྱོལ་དུ་གནས་པའི་ཧུར་བརྩོན་ཅན་གྱི་བོད་རིགས་རྣམས་ཀྱིས་རྒྱ་ནག་གི་ལས་འཆར་དེ་བོད་ཀྱི་ཐུན་མོང་མ་ཡིན་པའི་གོམ་བསྲོལ་དང་འཁོར་ཡུག་གཅེས་སྐྱོང་ལ་ཕན་ཐོགས་བཞིན་པའི་འབྲོག་པའི་འཚོ་བ་དེ་རྩ་མེད་དུ་གཏོང་རྒྱུར་དམིགས་པ་ཞིག་ཡིན་པ་སྐྱོན་བརྗོད་གནང་གི་ཡོད་པ་བཅས་ཀྱི་གནས་ཚུལ་ཐོན་འདུག